فعشية اليوم الموالي، مور الغذا......
فالوقت اللي ناض صالح لبيتو يتكا يرتاح بقاو البنات جالسات مع مهم اللي كانت كتفرج فمسلسل متبعاه فدوزيم، كل وحدة منهم باش مرفوع تفكيرها و كل وحدة لاياش كتخطط الا سارة اللي كانت هازة الدنيا من الجهة الخفيفة مامسوقة لحتا حاجة اولا حيت ثايقة فقدراتها ثانيا حيت بالنسبة لها حتا حاجة ماتستاهل تعصب راسها على ودها.......
جمعات الوقفة كتنفض فحوايجها و نطقات كتشوف فمها اللي ردات لها البال
-سارة: ماما انا غنطلع نكمل حفاظتي
ما جات فين تحرك حتا حبساتها رنيم اللي خنزرات فيها
-رنيم: النوبة فيك اليوم ا الزوينة فين غادة؟
علات حاجب و نزلات لاخر مجاوباها ببرود
-سارة: انا كنحفظ، عندي مستقبل خاصني نوقف عليه اوك! را ماكاديرو حتا زفتة وحدة فيكم تكلف
-رنيم: را داك الفم عندك مازال غنهرسو، عرفي شنو كتقولي البرهوشة
قاطعات حوارهم حورية اللي لاحت سربيتة كانت شاداها فوق الطبلة بانفعال
-حورية: واش عندي ضريرات انا هنا و ماجايبة خبار؟ قبيلة سمعت غواتكم و درت عين ميكة قلت ماجالساش معاهم و لكن قدامي كتعايرو ياك لاباس؟ مابقاش الاحترام بيناتكم ولا ماكنبانش لكم انا ولا شنو كاين
-سارة: هضري معاها هي ا ماما من الصباح و هي حاطة عليا
-حورية بحدة: سارة! بيتك
ميقات فرنيم و قلبات وجهها خلاتهم موراها اما هاد الاخيرة تبعاتها بعينيها حتا اختفت و دارت لعند مها لقاتها عاقدة فيها حجبانها
-رنيم: ماتشوفيش فيا هاكا ا ماما را كتستفزني، فهمنا عندها مستقبل و كتوجد ليه و لكن ماتبقاش تحك على الضبرة فكل مرة تبقى تجبد الخدمة، كون لقيناها حتا حنا كون خدمنا
-حورية: ياك نتي اللي ماكنتيش باغا تخدمي اش تبدل دابا
-رنيم بغضب: طلع ليا الفراغ فراسي، بغيت نعمر وقتي حتا انا، دابا فاش بغيت الخدمة والله ما لقيتها، فينما بانت ليا شي ايكول دفعت ليها، الهام كادور على داكشي د العرس و انا كاندور على ليزيكول و لدابا حتا وحدة مقادة ما عيطات ليا
-حورية: ماتقنطيش من رحمة الله، را مازال الحال
-رنيم: مشا الحال ا ماما، بصراحة انا اللي مادفعتش بكري، ها شهر 9 دخل و الموسم الدراسي غيبدا كون كانت شي حاجة كون عيطو
-حورية: فيها خير ا بنتي، ياك كنتي قلتي غتخدمي غير من الدار!
-رنيم: ماشي ساهل نخدم من الدار، خاصني ندير فوغماسيون فالضومين اللي بغيت عاد نشوف الخدمة، نقري فايكول ماشي هي نخدم مع عملاء، مهم يكون خير ان شاء الله، نحيد عليا البيرمي بعدا و يحن الله
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
