فدار الوافي............
فبيتها كانت جالسة على حافة النافذة معنقة رجليها و حاطة راسها على ركابيها متبعة الطيور فالسما، العقل غايب و القلب مكسور غافلة على اللي حلات الباب و دخلات كتقرب منها ما حسات بيها حتا حطات ايديها على راسها خلاتها ترجع للواقع قافزة، تبسمات ليها سارة بهدوء قبل ما تشد ايديها مزيرة عليها
-سارة: هاني جيت
اشارت لها رنيم على المذكرة اللي كانت محطوطة فوق السرير، هزاتها سارة و عطاتها لها هي اللي حلاتها على صفحة جديدة كتكتب مخلية ختها كتقرا اش كتخطط
-رنيم: بقات بلاصتك
-سارة بغرور مصطنع: هاااء راني عارفة بقات بلاصتي را سارة هادي
ضحكات سارة بخفة كتسنى ضحيكة او غير ابتسامة صغيرة تبين لها بلي بدات تحسن بلا فايدة، شافت فيها رنيم ببرود و رجعات تكتب
-رنيم: غالي لاباس عليه؟
-سارة: الحمد لله، سلم عليك بزااف
-رنيم: يسلم عليه الخير (تنهدات مركزة عينيها فما وراء النافذة قبل ما تعاود تكتب) مازال ما هداك الله تمشي؟
زيرات سارة على شفايفها معلية راسها للفوق ماباغاش تبكي خصوصا قدامها، مررات ايديها على شعر ختها بابتسامة باهتة
-سارة: مانقدرش نخليك بوحدك
-رنيم: عام و نص و نتي مأجلة فرحك على ودي، نقولو العرس حلفتي ماديريهش و لكن راجلك شنو ذنبو يصبر عليك هاد المدة كلها؟ نزل استقر فالمغرب على ودك غير باش يوقف معاك، جا الوقت باش تشوفي حياتك اما انا معايا الله
رجعات ليها سارة المذكرة بعينين مغرغرين
-سارة: مانقدرش ا رنيم
-رنيم: الخير اللي درتي فيا نتي و راجلك و الوقفة اللي وقفتو معايا عمري فحياتي نساها، ماغنكونش انانية و نخليكم مفارقين غير باش انا نلقى شكون يجلس معايا و شكون يواسيني، انا ماشي بيخير و لكن عايشة و سوا كنتي معايا ولا لا ا سارة انا عايشة غير شوفي حياتك عافاك ا ختي بلاما تخليني نحس بتأنيب الضمير من جهتك حتا نتي
-سارة: رنيم را الماكلة هي اللخرة الا ماطلعتهاش لك انا ماتاكليهاش، الجلسة الا ماكنتش فيها ماتجلسيش مع ماما و بابا، كيفاش بغيتيني نمشي و نشوف حياتي و نتي حياتك واقفة عليا، انا محتاجاك و نتي محتاجاني علاش غنمشي؟
سدات رنيم المذكرة بايديها ساهية فالفراغ قدامها قبل ما تعاود تحلها كتكتب
-رنيم: بغيت نخرج من هاد الحالة اللي انا فيها، يمكن عمر صوتي يرجع ليا و لكن مضطرة نواجه الدنيا بشنو فيها و من بين الحوايج اللي خاصني نواجه هما واليديا، خلي الفرحة تدخل للدار شوية و ديري ليلتك و سيري مع راجلك ا سارة، مسكين صابر حيت عارف شنو داز علينا و لكن طال الزمان ولا قصار صبرو غيسالي و ماغيبقاش عاقل عليك
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
