ماكانتش عارفة غيثة واش تصارحهم بشنو قالت لمها او تحفظ السر فقلبها و تحاول تتناساه، تهدنات بصعوبة و حبسات البكا و لكن شهقاتها كانو مازال كيجرحو حلقها كيف مجروح قلبها بالندم، مسحات اثار الدموع لي كانو على وجنتيها و حدرات راسها كتزير على ايديها في حين البنات جوجات جلسو حداها حاطين ايديهم على كتافها اما رنيم "كما العادة" تحنات على ركابيها و قابلات وجهها بوجه ختها مقوسة حجبانها بقلق
-رنيم: عافاك قولي لينا مالك، الا كان شي مشكل نحلوه و الا كانت شي حاجة مقلقاك شاركيها معانا نريحوك منها، نتي غير قولي شنو كاين
-غيثة بتلعثم وسط شهيقها: الا قلت لكم غادي تقلقو مني (هزات فيها عينيها المدمعين) انا ماشي خبيثة، والله ما محسادة و كنبغيكم بزاف
-سارة: دابا غير قولي شنو كاين و ريحي بالنا
هزات غيثة راسها فحورية و رجعات حدراتو مازال كتلعب بصبعانها كتضغط عليهم حتا حضناتهم رنيم بين ايديها خلاتها تحبس....
تنهدات تنهيدة عميقة و نطقات بلاما تهز راسها فيهم
-غيثة: غلطت غلط و انا معتارفة بيه، فالوقت اللي نتوما فرحانات ليا انا كنت مضاربة مع راسي اللي كان كيقول ليا خواتاتك حسن منك غادي يشوفهم العريس و غيسمح فيك نتي و يختار وحدة منهم فبلاصتك (بانت لها رنيم حدرات راسها مابقى تايبان غير شعرها لي كانت جامعاه شينيون بعشوائية و كملات بسرعة كتبرر كلامها) والله ما لخاطري ا رنيم فكرت هاكا، باغاكم تفرحو معايا و توقفو معايا فداك النهار و لكن عقلي كيصور ليا غير الحوايج الخايبين (نزلو دموعها مجددا) ماقادراش نثيق فراسي
سحبات ايديها من ايدين ختها كتمسح فدموعها بحالها بحال رنيم براسها لي كانت حادرة راسها ماباغاهاش تشوفها كتبكي، فلحظة وحدة تقلبات ديك الجلسة لجلسة دموع بين الخواتات بجوج اما الهام بقات غير كتشوف فيهم ماعرفات تواسيهم ولا تدور فيهم
-غيثة بالشهيق كتشوف فرنيم: تقلقتي مني ياك على هادشي كتبكي
-رنيم: وا لا لا، كنبكي حيت حاسة بايدي مربوطين ماعارفة كيفاش نعاونك تتجاوزي هاد المرض لي عندك (هزات عينيها فسارة لي بدورها كانت كتشوف فيها) ها شنو قلت لك، والله حتا كنت عارفاها غادي تفكر هاكا (حولات نظرها لغيثة لي جمدو دموعها) قلتها لسارة قلت لها بحال والو غيثة تشك فراسها و تقول البنات الا حضرو معايا ماغاديش نبان قدامهم، راك ختي و حافظاك كيف حافظة راسي غير ماتصدميش
-سارة: انا قلت فخاطري ماشي لهاد الدرجة حيت اصلا ماغاديش يشوفنا، كنت كنقول راك عارفة العادات شنو فيهم و غير من دوك العرسان اللي جاو قبل غتعرفي بلي اصلا ماكيشوفونا ماكنشوفوهم و كون تسولي غير ماما غتقول لك بلي مانقدروش نبانو ليه
أنت تقرأ
غفران- قصة عشق تستحق الصفح (مكتملة)
Roman d'amourهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
