دخلات للدار كتبكي و تهرنن تلقات ليها حورية مخرجة عينيها بقلق حتا وراتها الورقة فايديها و جلسو بجوجات يجدبو و الخوف راكبهم، عيطات حورية لصالح علماتو بشنو واقع و صورات ليه الورقة خلاتو يسول و يسقسي شنو ممكن يدار و داك النهار بالضبط داز عليهم ثقيل و طويل ما قادرينش يوصلو لعصام يستفسرو منو علاش رافع الدعوة واخا السبب كان واضح فالاستدعاء......
صباح اليوم الموالي داز فالكوميسارية، كانت جلسة استماع لسارة بحضور واليديها اللي بقاو برا كيتسناوها حتا خرجات لعندهم بعينين حمرين كتمسح فدموعها، الطريق كلها و هي ساكتة حتا وصلو للدار عاد انفجرت مجددا بالبكا كتشهق فحضن حورية اللي كان واكلها قلبها عليها
-سارة: حسيت براسي مجرمة ا ماما، كون تشوفي كيفاش كانو كيخرجو فيا عينيهم و كيسولو شي اسئلة بحال وجههم كتخلع
-حورية: ولد الحرام من فعلو، ولد الحرااااام اش بغا منا
-سارة بهلع: صافي غندخل للحبس الا مارجعتش ليه فلوسو؟ منين غنجيبهم ا ماما منين، كون كنت عارفة يقدر يتقلب عليا هاكا كون خليت ليه زبلو كلو مانقربش ليه وا كون ماقبلتش عليه اصلا
-حورية: دابا بلاما تخلعي ماكاين لا حبس لا والو، باباك مشا يشوف شي محامي يوجهنا لشنو غانديرو
رجعات عنقات مها كتبكي و حالتها بقات هاكاك حتا رجع صالح للدار كيسوط و كيستغفر ماعاجبو حال
-صالح: ماكنتش عارف بلي كاين فصل فالقانون كيعطي الحق للخطيب انو يرفع دعوة على خطيبتو الا قررات ماتكملش مشروع الزواج و يطالبها ترجع ليه كلشي، كنت واخذ الامور باستهزاء كنقول ما حد السيد ساكت اذن سمح فداكشي اللي بقا ماعطيناهش (استأنف كلامو بغضب) ماكنتش عارف بلي مازال كيصيفط لبنتك باش ترجع ليه المرض ديالو و هي ضاربة الطم، منين غنجيب ليه انا فلوس التخربيق لي جاب ليها، غير le relevé de compte bancaire فيه اكثر من جوج د المليون اللي صيفط من نهار خطبها للنهار اللي قلنا ليه الله يعاون عاد زيدي لبيسي و التيليفون لي باعت و خذات بفلوسهم بيسي و تيليفون جديد زعما مطورة، منين غنجيب ليه انا سبعة د المليون كاملة فيها كاع داكشي اللي خسر عليها، عندو reçu د كل درهم حطها بحال كان عارف غيحتاجهم باش يشطحنا كيف بغا، عاجبكم الحال دابا!!!
-حورية: وا الله يهديك ا صالح باش عرفنا حنا السيد خبيث غيتقلب علينا، كيف كذب حتا هي بغات تنتاقم و رجعات ليه غير اللي بغات و خلات اللي بغات
-صالح: حتا دابا توجد راسها للحبيبيس
-سارة بهلع: لا ا بابا عافاك والله ما نقدر، غنخرج نخدم و ندير اللي كان نجمع ليه فلوسو غير ماتخلينيش
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
