فصباح اليوم الموالي........
فاقت رنيم مقفوزة بهلع من الحلمة اللي خلاتها تشوف راسها معطلة على الامتحان حتا ضاع ليها، ما تهدن روعها حتا هزات تيليفونها لقات لالارم بقات ليها 5 الدقايق عاد تصوني، رجعات تكات كتقلب فبلاصتها حتا دازت ديك 5 الدقايق و طفات لالارم عاد ناضت دارت روتينها الصباحي و لبسات حوايجها قبل ما تنزل للتحت لقات حورية فالكوزينة كتصاوب الفطور، فطريقها لعند مها تسلل لمسامعها صوت باها اللي كان كيقرا الورد الصباحي بخشوع اقشعر ليه جسدها مبسمة براحة نفسية، صبحات على مها بالخير و وقفات جنبها متبعاها بعينيها
-حورية: جلسي تفطري
-رنيم: شاداني الخلعة ا ماما مافياش
-حورية: غتمشي بالجوع؟ تزيدي الجوع على المرض
-رنيم: كرشي ملوية عليا بالتوتر ا حورية، نخرج من الكود و نفطر
-حورية: كي حاسة براسك اليوم؟
-رنيم: عادي كنقول راني بيخير و ماعرفت، مهم واش بابا غيوصلني؟
-حورية: هادشي اللي قال، يفطر و....
قاطع حوارهم دخول صالح اللي قربات منو رنيم باست ايديه كتصبح عليه بالخير هو اللي رضى عليها و جلس يفطر فصمت، زيرات على صاكها جالسة حداه كتهزهز فرجليها بتوتر غالب عليها حتا حسات بالترويعة فداك الصباح، تفكيرها كان فالكود اللي حسات براسها ناسياه و فالياس و فشنو داز بيناتهم حتا خرجات من قوقعتها على صوت باها اللي وجه لها كلامو بتساؤل
-صالح: موجدة شوية؟
-رنيم: موجدة غير دعي معايا ا بابا
-صالح: الله يسخر، الا واجدة نوضي خرجي الطوموبيل من الكاراج
خرجو عينيها بالخلعة
-رنيم: لا لا لا غادي غير ندير شي مصيبة
جاوبها بلاما يشوف فيها
-صالح: نوضي خرجيها را ماعندو مايوقع، الكونطاك فبيت النعاس
-رنيم: بلاش ا بابا
شاف فيها شوفة وحدة خلاتها تبلع كلامها و تنوض بالسيف عليها عاد تبعها هو و حورية وقفو عليها فباب الكاراج، طلعات هي للطوموبيل كتسمي بالله بقلب غيخرج من بلاصتو غير بالخلعة بلا مرض و ديمارات كتشوف فباها اللي كان واقف وقفتو المعتادة مشبك ايديه مور ظهرو كيرمقها بعقدة حجبانو اللي كتخلي نظراتو حادة بدون مجهود.........
لتواني بقات جالسة كتسترجع كل حاجة و بلاصتها، فين الكسيراتور؟ فين لومبرياج؟ تعفط على اللي فليمن و الوسط و لا اللي فليسر و الوسط؟ حتا من سمياتهم طيرهم ربي من عقلها اللي تبلونطا كتشوف عند رجليها ماعارفة ما دير حتا وقف عليها باها كيطل من النافذة اللي جهتها
-صالح: اوا تحركي را مشا الحال
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
