مسافة الطريق دوزوها و هما ساكتين فقط الموسيقى لي طالقها بلبلوتوت اللي كانت خدامة و كان كيدندن معاها او بالاحرى كان كيحاول يشغل راسو بيها باش مايتفرگعش عليها على دوك الكذوب لي كذبات عليه و الاهم ماباغيش يخوي عليها المزيودة و يدير شي حركة قبل ما يتأكد من مشاعرها من جهتو.....
تبع اللوكاليزاسيون اللي كانت طالعة ليه حتا وصل لوجهتو، هي غير شافتو وقف جبدات تيليفونها و عيطات للنگافة، رنة بجوج بثلاثة جاوباتها و دارو فين يتلاقاو..........
غير قطعات معاها هزات راسها فيه هو اللي كان حاضيها بشوفات فشلوها، حنحنات بتوتر و نطقات مهربة عينيها منو
-رنيم: انا شوية و نرجع
قلب عينيه للارجاء لقا الدنيا كتصفر و عاود ركز عينيه فعينيها مجاوبها بهدوء صوتو
-الياس: فين كاينة دارها؟
-رنيم: دوك العمارات اللي حدا الجامع
-الياس: خليني نقربك لتما
-رنيم: ماكاين لاش را ماشي شي مسافة غير خليك
ماعطاتوش الفرصة فين يعاود ينطق كانت باغا غير تهرب، خلات ليه صاكها و هزات معاها غير تيليفونها شداتو فايديها و نزلات واخذة طريقها مرة مرة كادور تشوف فيه هو اللي كان متبعها بعينيه حتا دخلات مع دريبة و اختفت عن الانظار، كملات هي طريقها حتا بان لها الجامع لي دوات لها عليه النگافة و عاود عيطات لها تنعت ليها.......
فدوك الاثناء كان الياس مرفوع كيفكر حتا رجع للواقع على الڤيبرور د تيليفونو، هزو مكره عند بالو خولة اللي كتعيط حتا لقا لابيل من سعد، طفا البلوتوت و جاوبو كيحك فذقنو
-الياس: ا با سعد
-سعد: فين وصلتو؟
-الياس: هاني كنتسناها مشات تجيب داكشي من عند ختنا
-سعد: الطريق باينة بعدا ياك! را ختنا ماعرفاتش تصيفط اللوكاليزاصيون غير جربت و صيفطت لك من داكشي اللي نعتات ليا
-الياس خرجو عينيه: كيفاش! دابا ماشي عاطيني شي حاجة لي متأكد منها؟ دابا رنيم نزلات لبلاصة يعلم الله واش نيت هي لبلاصة لي غتلقى فيها ختنا ولا لا؟
-سعد: واش ماهضراتش مع السيدة هي؟
-الياس: هضرات معاها و دارت معاها جهة شي جامع هنا
-سعد: اوا صافي را غتكون تلاقات معاها
-الياس: قطع قطع خليني نعيط لها نشوف شنو كاين
-سعد: اوك و لي كان قولو ليا
-الياس: تلاح....
أنت تقرأ
غفران- قصة عشق تستحق الصفح (مكتملة)
Romantizmهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
