#قبل_لحظات
-رشيد: سي صالح بغيتي تشوفني على ود شي موضوع ياك لاباس!
-صالح بوقار: نهار جيتي تشاورتي معايا على الزواج اللي بغيتي تتزوج، قلتي كتقلب على بنت الناس اللي تحن فداك الولد و تعاملو كيف ولدها ماشي براني عليها ياك
-رشيد: اييه و بصراحة لحد الآن مازال ما طحت على هادي اللي فعلا تعتابرو ولدها، الواليدة كتقلب و حتا انا
-صالح: انا عندي لك العروسة اللي تناسبك و تتهلا فأمير كيف ولدها حيت كتبغيه بصح، المشكل عندي فداكشي اللي وقع ماعرفتش واش غيكون عادي بالنسبة لك او لا، كنهضر على بنتي رنيم ا رشيد
قلبو فرفر من بلاصتو بوقع كلمات صالح اللي من زمان و هو كيتسناهم، من نهار دوا معاه على موضوع الزواج اللي تيفكر فيه على ود امير و على ودو حتا هو حيت كيبقى راجل محتاج لانثى فحياتو و هو متحمس للنهار اللي غيجي فيه الاقتراح من صالح براسو خصوصا من بعد ما خلاه يحل عينيه على الخطر اللي ممكن يلاحق رنيم من داك الشمكار الا بقات بلا ظهر بلا سند فحياتها يدافع عليها و مايخلي حتا حاجة تقيسها و هاد الهضرة بالضبط هي نفسها اللي عاودها لرنيم ملي وسعات فيه عينيها كتحاول تستوعب الاقتراح اللي اقتارح باها
-رشيد: شوفي ا رنيم يقدر يجيك هادشي فشكل و ماتتقبليهش و لكن خليني نكمل كلامي و فكري عاد جاوبي واخا
حركات راسها ايجابا غير كترمش
-رشيد: انا غنتزوج غنتزوج الا ماكنتيش نتي غتكون وحدة اخرى حيت محتاج لمرا فحياتي على ودي و على ود امير و هاد الموضوع كنت درت نهار فهاد السيمانة و هضرت فيه مع باباك تشاورت معاه حيت كتبقاو عائلتي، ماعمري فكرت فيك او شفت فيك شي شوفة ناقصة لدرجة نتخيلك مرتي حيت كتبقاي خالة ولدي و اخت المرحومة يعني صعيب نشوفك شي حاجة اخرى من غير هادشي و لكن فاش شفت شنو دار داك الشمكار غنكذب الا قلت ماخفتش عليك و حتا على أمير، نتي ماسمعتيهش كيف كان كيهدد و كيتحلف وليت كنقول تخرجي غير بوحدك الله يحفظ يتلقا لك مانعرفو فين نوليو، و نتي مزوجة و فظهرك راجل يدافع عليك ماشي هي و نتي بوحدك لا؟
مسحات دموعها الغزيرة كتحرك فراسها رفضا
-رنيم: ماكنعرفوش والله ما كنعرفو و ما فحياتي حتا واحد باش نتفارق عليه
يتيقها؟ اكيد لا
-رشيد: شوفي انا متيقك و عارفك مربية ماشي ديال داك التخربيق و لكن داك الشمكار منين غيعرف داركم و يعرف سميتك؟ را جاي قاصدك نتي
شدات راسها ماعارفة فاش خاصها تفكر
-رنيم: والله ما عرفت، هادشي حمقني سيمانة و انا كنفر غير منين يكون كيعرفني
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
