#الحاضر
سدات المذكرة بابتسامة هادئة قبل ما تحضنها كتتنفس بروية، نفس الجلسة باش بدات هي نفسها اللي كانت دايرة غير هاد المرة بمشاعر مختلفين كليا على المرة اللولة، هاد المرة القلب مرتاح و النفس هادية حاسة بالدنيا واخذة الوانها و كلشي زوين فعينيها و اهم حاجة راضية بشنو كتب عليها الله من الاول للاخير...............
ناضت للخزنة اللي داير الياس فالماريو ديالهم حلاتها و خشات فيها ديك المذكرة و كأنها كتودعها، تلمسات حوافها بنفس الابتسامة قبل ما تحس بايديه حاوطو كرشها اللي كانت مازالة صغيرة ماباينش عليها الحمل، تكات براسها على صدرو كتسمع لكلامو الخافت
-الياس: غتدفنيها هنا؟
-رنيم: غندفنها و ماغنعاودش نزورها، كنت كنفكر نحرقها و لكن ماقدرتش، فيها ذكرياتي معاك
سد ديك الخزنة و غبر ساروتها فالبلاصة اللي مولفين كيحطوه فيها قبل ما يجرها معاه لطرف السرير جلسو عليه
-الياس: باش حاسة دابا ؟
-رنيم: شي حاجة اكثر من الراحة، شي حاجة مانقدرش نوصفها والله (ضحكات) باغا غير نضحك بحال عاد تحلو عيني على الدنيا و عاد شفت حلاوتها
-الياس: الدنيا حلوة غير حيت نتي فيها (مرر ايديه على شعرها) فنظرك ماغتحتاجيش تعاودي ديري استشارة نفسية؟ مازالة كتعاني من الكوابيس و...
-قاطعاتو بهدوء: مانحتاجش ا الياس، هادشي كلو غيفوت دابا حيت فرغت، باش تتغلب على مخاوفك خاصك تواجههم و هادشي اللي درت انا، ديك المذكرة فيها اسوء ايام حياتي و اكبر مخاوفي نهار كتبتهم و طويت الصفحة طويتها حتا من حياتي و انا عارفة اش كنقول
-الياس: و انا غير هادشي اللي باغي، ترجعي رنيم ديال شحال هادي
-رنيم: ان شاء الله (تنهدات بابتسامة) دابا عاد نقدر نستمتع بالحمالة
-الياس: مازال عندي سؤال و نسد انا وياك الصفحة د الماضي واخا (اومأت بالايجاب) بغيت نسول على غيثة، نهار كتبتي على الشك اللي شكات فيك و على داكشي اللي قريتي فلي نوط دخلتي فأزمة يمكن اكبر من الازمة اللي دخلتي ليها نهار كتبتي على الطريقة باش ما•تت، مازال حاسة بتأنيب الضمير ؟ مازال كتقولي نتي السبب فاشنو وقع لها؟
لاول مرة ماكيحسش بيها تصلبات بين ايديه ملي تذكرات سيرة ختها، لاول مرة كيبقاو ملامحها مكسيين بالهدوء و كتجاوبو عادي بلا مراوغات او تهرب
-رنيم: غيثة ظلماتني و اذاتني قبل ما تآذي راسها ا الياس، كانت عارفة كلشي و سكتات يعني شنو؟ (قوسات شفايفها) حاليا مابقيتش محملة راسي المسؤولية حيت انا اكثر وحدة كانت مقلوبة عليا القفة و دارت بيا، اكثر حاجة وراتني الكتابة هي نشوف الامور من زوايا مختلفة ماشي من زاوية وحدة كيف كنت كاندير، النهار الاول اللي جلست نكتب فيه ماشي هو هاد النهار اللخر اللي ساليت فيه كلشي و حطيت فيه كلشي بالتفاصيل يعني ببساطة انا دابا ماشي هي انا د شهراين قبل و د سنين قبل
أنت تقرأ
غفران- قصة عشق تستحق الصفح (مكتملة)
Lãng mạnهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
