غفران- قصة عشق تستحق الصفح (مكتملة)

غــــــــفـــــــران -ندبات الألم- 65

عند سارة.........
ندمات حتا ندم زغب شعرها على ديك اللبسة اللي خرجات بيها هاكاك على اساس عايشة فشي دولة اخرى من غير المغرب، تكلخات و ترفعات حتا ما فكراتش مجرد تفكير انها ماعارفاش اصلا فين المفروض غتمشي، قالت ماحد رنيم معاها ماتخاف من والو، ها رنيم مشات و بقات هي فريسة للسان و عينين البراهش اللي تبعوها من فين..........

كيفاش و امتا ما حسات غير بواحد وقف عليها خلعها، عينيه ماتيبشروش بالخير و تقاسيم وجهو اكثر، غير لسانو اللي كيبلل بيه شفايفو كان عاطيها الخبار لشنو جاي اما هو بانت ليه دجاجة بكامونها خاص غير كيفاش يدخلها

-الزيونات كتسناي شي واحد ؟

بلعات ريقها مخرجة عينيها و بعدات منو قالبة وجهها على اساس ماسمعاتو ماشافتو.....

رجع قرب منها و هاد المرة قرب نيت حتا حسات بانفاسو كيلفحو بشرتها
-نوصلك فين بغيتي؟

دفعاتو كتكشكش
-سارة: اش كادير ا الاخ بعد مني

-ماتخافيش، نتي غير اجي معايا غنبرعك

-سارة بخوف: سير ا خويا بعد مني غيجي خطيبي دابا يلقاك واقف عليا ماغيوقعش خير

طلعها و نزلها بشوفاتو و ابتسامة جانبية مستهزئة شاقة ثغرو
-سعداتو هاد خطيبك (رجع قرب منها) شوفي كوني هانية را ماغيعيق بوالو غير اجي نوصلك فين بغيتي (جرها من ذراعها) ماتخافيش مني

ما جات فين تتجاحد معاه حتا حسات بشي حد جرو من قرفادتو بعدو عليها، الهزة اللي هزات راسها بان لها عصام خاشي وجهو فوجه لاخر محمر فيه بشوفتو
-عصام: غت**** ولا ن**** معاك السوايع؟

دفعو حتا بعد عاد دار لعندها حاني راسو
-عصام: غنوقف بعيد حتا تشدي طاكسي و نمشي

كانت كارهة تشوف فيه و لكن احترمت الموقف اللي دار معاها
-سارة: شكرا و لكن كتسنا شي واحد

طاح فبالو شكون ممكن يكون هاد الواحد داكشي علاش فكر يمشي بلاما يزيد يكحل الضواصا معاه
-عصام: ماحدي شفتك هنا بغيت نقول لك سمحي ليا على شنو درت، انا طلبت من الواليد ديالك السماحة و بغيت نطلبها منك حتا نتي حيت تكوني كيفما بغيتي تكوني ماعنديش الحق نعاقبك على شي حاجة انا ماسوقيش فيها، ماغنكدبش كنت بغيت نعيشك غير شوية من داكشي اللي عيشتي صاحبي باش تعرفي بلي الفلوس ماشي هما كلشي، لو كان تعرفي المعدن د غالي ماكنتيش تجرحيه بديك الطريقة او ترفضيه اصلا و من هادشي كلو تعلمت مانبقاش ندخل فشي شبوقات بعاد عليا، هاني خسرت ميمتي و خسرت خويا و رجعت وحيد كيف كنت شحال هادي....