غفران- قصة عشق تستحق الصفح (مكتملة)

غــــــــفـــــــران -ندبات الألم- 64

فجهة خرى.........
دخل للدار هاز فايديه ساشيات د التقضية جاي مثقل بيهم حطهم لمو فارضية الكوزينة خلاها كترضي عليه، الدورة اللي دار بانت ليه أميمة خارجة من بيت الجلاس لابسة جلابة مخزانية كتجمع فشعرها اللي تحل ليها غير بان لها تبسمات و سرعات خطواتها جهتو تقابلات معاه مادة ليه ايديها
-اميمة: على سلامتك، جيتي مع الغذا نيشان

عقد حجبانو بغرابة
-غالي: شنو كاديري هنا؟

ماتوقعاتش سؤالو و ماكان عندها حتا جواب عليه، تبسمات باحراج و فالوقت اللي نوات تنطق سبقاتها صفية اللي خرجات من الكوزينة هازة طاجين فايديها
-صفية: البارح قلت لك الماكينة ماكنعرفش نخدمها اليوم بغيت نصبن لك حوايجك و عيطت لها هي اللي عتقاتني الله يرضي عليها، غسلو ايديكم و اجيو تبعوني

-اميمة: لا ا خالتي انا غنمشي حتا الدار كيتسناوني للغذا

-صفية: و تخسريها فوجهي ا بنتي؟ هاني سبقتكم

خلاتهم موراها هما اللي كل واحد تفرق لجهة، قصد غالي الحمام يغسل ايديه في حين أميمة دخلات للكوزينة حاسة بشي حاجة مبدلة، ماشي هاكا مولف كيتعامل معاها و ماشي هاكا المفروض تكون ردة فعلو ملي يشوفها فدارهم، غير البارح عطا الوقت للضيفة اللي كانت عندهم و هي بحال ماكايناش و اليوم حسات بيه بقا فيه الحال حيت لقاها فالدار و لكن هادشي كلو تبخر ملي لقاتو كيتسناها باش يدخلو بجوج

-غالي: لهلا يخطيك ا أميمة على هادشي اللي كاديري مع الواليدة، فرحان بشوفتك عندنا

تبسمات برقة و حدرات راسها بخجل
-اميمة: ماماك فمقام ماما و هادشي راك عارفو قبل كاع ما نتخطبو، كون هاني من جهتها الا ماكنتيش نتا كاينة انا...

خذا راسها باسو بعفوية و تبسم محاصر عينيها بعينيه
-غالي: لهلا يخطيك عليا..

تحقن وجهها بالد•م حاسة بقلبها غيفلت من بين ضلوعها بقوة نبضاتو اللي تسارعو، بادلاتو الابتسامة و تبعاتو داخلين لبيت الجلاس بمشاعر دافية كتدغدغ جوفها، كانت حاسة بمشاعر الاعجاب اللي كانو عندها من جهتو غاديين و كيتحولو لمشاعر اقوى ماغتقدرش تتحكم فيه و على حسب ما كيبان لها حتا هو كيبادلها نفسهم.........................

خذاتهم الماكلة كيتغذاو مجموعين فجو حميمي بيناتهم بثلاثة خصوصا بين صفية و اميمة اللي كانو كيبانو مفاهمات، كانت عاجباه هاد العلاقة اللي بيناتهم و كان مرتاح عل اقل واخا يدير لاكط و يطلب من أميمة تجلس مع الواليدة ديالو علاما يطلع ليها الوراق ماكانتش غترفض و هادي بالنسبة ليه حاجة ايجابية غتخليه يسرع اجراءات الزواج خصوصا و انو عارف مو غتكرفص بوحدها فغياب عصام اللي كان واخذ بلاصتو و هو ماكاينش...............