فزوال يوم جديد...............
نزلات من الطاكسي هازة صاكها و عينيها على الشارع قدامها حاضية مع الطوموبيلات قبل ما تقطع للجانب الآخر، فعقلها الف مطرقة و اهم مطرقة هي امتحاناتها اللي قراب و خاصها ليهم الوقت و الجهد، الوقت كاين و لكن الجهد و الگانة مشاو مع تفكيرها المرهق فالموضوع اللي مازال مأرقها بالرغم من مرور اكثر من ثلاث اشهر على العملية اللي دارت.............
و هي فطريقها للدار وقفها صوت انثوي ممزوج بصوت تنفس غير منتظم دليل على اللي كتعيط لها كانت كتجري او كتمشا بسرعة، دارت عندها سارة بغرابة سرعان ما تحولات لابتسامة ملي لقاتها شيماء اللي وقفات عليها
-شيماء بتعب: الله ا ختي ملي نزلتي من الطاكسي و انا كنعيط لك (حطات ايديها على صدرها) سخفت والله
-سارة: والله ما سمعتك را عقلي ما معاياش
-شيماء: و شكون خذاه ا ختي لدرجة تصمكتي
-سارة: غير القراية و الامتحانات اللي قربو ليا، عقلي مشتت و مرفوع
-شيماء: اوا الا كان هاكا ماشي مشكل، فهاد الوقت خاص الوحدة تضمن مستقبلها و يكون عندها علاياش ترجع، الوقت و الزمان هذا و بنادم ما فيه ثقة........
من نهار جات عندها للكلينيك و بمرور الايام و لقاءاتهم اللي كثرو بالصدفة و اللي فالواقع كيكونو غير فالزنقة كيف ديك الساعة و سارة منوية من شيماء علاش؟ ماكانتش عارفة، واش بسبب توصيات مها و عگوزتها اللي واخا ماتسوقاتش ليهم الا و انها دارت بيهم و ماحاولاتش تبين لراجلها بلي مازال كتلاقا معاها غير باش ماتجيش الفرصة اللي يقول لها نشوفها او يتعرف عليها واخا عارفة غالي ماغيطلبهاش و لكن خذات احتياطها، واش حيت كلام شيماء فكل مرة تتلاقا معاها يفشلها و يخلي املها فالوليدات و فحياة زوجية سعيدة يتبخر ماكانتش عارفة، اللي عارفة هو شي حاجة فهاد السيدة ماكتخليهاش ترتاح واخا كتقنع راسها بلي ماشافت منها حتا حاجة تضرها.............
-سارة: ديما كنبغي نسولك و ماكنلقاش الفرصة، واش عندك شي تجربة زواج فاشلة او علاقة فاشلة؟ حيت من هضرتك كنحس بيك مافرحتيش فحياتك و ماواخذاهاش بايجابية
لتواني بقات شيماء واقفة مسمرة ماكترمش حتا حسات سارة بلي قالت شي حاجة ماشي هي هاديك، قبل ما تعاود تنطق هاد الاخيرة ضحكات شيماء بخفة مازال حاطة ايديها على صدرها
-شيماء: الا جيت نعاود لك غتصدمي، شوفي انا عييت و سخفت اجي نجلسو فشي كافي نهضرو شوية
-سارة: هههه اويلي من نيتك، اشمن كافي كتهضري عليه
-شيماء: هاااء واش على ود راجلك زعما!
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
