نزلات سارة من الطاكسي كتفور غير بوحدها، الردخة اللي ردخات الباب د الطاكسي خلات الشيفور كيهلل عليها زاد كمل على ما بيها حتا بدات تبكي، صونا التيليفون فجيبها و جبداتو ناوية تقطع و فعلا قطعات لان النمرة اللي طلعات ليها ماعرفاتهاش، المرة اللولة و الثانية وصلها ميساج فيه كلمة وحدة "جاوبي!"........
علات حاجبها بنرفزة و غير طلعات لابيل من جديد جاوبات ناوية تغرق لهذا اللي برزطها حتا سمعات صوت نسائي باين فيه العمر فكرها غير فأم غالي
-صفية: السلام عليكم بنتي سارة
مسحات دموعها و جاوباتها بغرابة
-سارة: واش خالتي صَفية؟
-صفية بابتسامة: هي هادي ا بنتي لاباس عليك؟
جاوباتها سارة على سلسلة اسئلتها متشوقة غير للسبب علاش عيطات ليها
-سارة: محتاجاني فشي حاجة ا خالتي ؟
-صفية: بغيت نجلس معاك الا كان عندك شوية الوقت، تقدري تجي لعندي؟
-سارة: اهاه مرحبا و لكن نقدر نعرف فاش بغيتيني؟
-صفية: حتا تجي و نقول لك كلشي......
قطعات معاها سارة و بلاما تفكر جوج د المرات قصدات الدار اللي عرفاتها غير بالمحل د غالي، دقات جوج دقات و بعدات متبعة الحس اللي جاها من مور الباب حتا تحل على وجه صفية اللي كانت مبسمة ليها بطيبة كترحب بيها بحفاوة
-صفية: مرحبا ببنتي، دخلي ماتحشميش
تكذب الا قالت ماكانتش حشمانة و متوترة اولا من هاد الدخلة على السيدة ثانيا من احتمالية انها تشوفو و هاد الاحتمالية بالضبط كانت كتطلب الله ما تتحققش و ما يكونش فالدار.........
زيداتها صفية للصالون اللي على قد ما كان صغير كان مبهج بالفراش التقليدي الفخم باش كان مفرش، زادت حشمات سارة على عرضها و حسات براسها صغيرة بداك التفكير اللي كان عندها خصوصا من جهة غالي و مستواه......
-صفية: لاباس عليك ا بنتي؟ الواليدين بيخير؟ كي بقيتو؟
-سارة بخجل: الحمد لله ا خالتي كلشي بيخير
-صفية: اوا مرحبا بك عندي، قلتي ليا كنتي خارجة باينة ماكليتي والو هاد العشية، بلاتي نحط لينا كاسكروط و نهضرو
حبساتها سارة بايديها حاسة بدموعها على طرف الجفون
-سارة: بلاما تعذبي راسك ا خالتي والله ما عندو منين يدوز غير خليك معايا قولي ليا فاش بغيتيني
-صفية باهتمام: و مالكي ا بنتي على هاد الهضرة ؟ (تفكرات مو…ت غيثة و حزنات) المو…ت علينا حق ا سارة، ختك بغاها الله و لا اعتراض على مشيئة الله
أنت تقرأ
غفران- قصة عشق تستحق الصفح (مكتملة)
Roman d'amourهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
