عند غالي............
دخل للدار كينادي على مو كيف مولف ديما و عينيه كيقلبو عليها حتا لقاها فالكوزينة كتشحر فاتاي، باس راسها و ذرعها بهدوء نفسي متبع معاها شنو كادير
-صفية: شفتك رجعتي دغيا، فاش بغاك هشام؟
-غالي: خليني من هشام دابا و اجي نجلسو بغيت نهضر معاك
هزات فيه راسها غير لمحات ابتسامتو و عينيه اللي كيبريو ضيقات فيه الشوفة
-صفية: الله يسمعنا خبار الخير....
تعاون معاها حتا حطو الطبلة عاد جلسو واحد كيشوف فلاخر
-صفية: هاني كنسمعك ا حبيبي
-غالي: عقلتي على سارة ا ميمتي ؟
-صفية بابتسامة: و على انا نساها؟ شحال من مرة كنتلاقاها فالعشية كتكون راجعة من الخدمة مهلوكة و كتعطيني الوقت تسول فيا عاد كتمشي (تبسمات) كنت عارفة غيجي النهار اللي غتعاود تجبدها، تتوكل على الله و دير دارك؟
-غالي: هذا هو الوقت ياك
-صفية: غير عمرتي راسك على والو و جلستي تضيع فالوقت، البنت مربية و بنت الناس كون كانت شي حاجة انا اول وحدة نقول لك حبس
-غالي: واش نكذب عليك ا ميميتي؟ مابغيتش نظلمها، احسن حاجة وقعات هي جلست هاد المدة كلها حتا اقتنعت بلي فعلا باغيها بغض النظر على كاع داكشي اللي داز، حياتنا كنعيشوها مرة وحدة و ماحدي عارف راسي ماغنقدرش مع شي وحدة اخرى نفضل نكمل حياتي معاها هي، كنبغيو الواحد بالزوين فيه و الخايب فيه، كيفما انا فيا الخايب و الزوين حتا هي نفس الشي و هادشي اللي غيكملنا اصلا (ارتاح فجلستو) غنتوكل على الله و اللي فيه الخير ربي غيآتي بيه
-صفية: انا ماتسالني غير الله يكمل بالخير، حتا انا كنشوفها بنت الناس و مانظنش تلقى معاها المشاكل (ترفعات بالتفكير) و لكن ا غالي كيفاش غتخطبها من باها و هو عارفك صاحب و خو عصام؟
شد فراسو بتفكير عميق
-غالي: هادشي فاش لقيتيني كنفكر، بلا هاد السيمانة اللي حنا فيها بقات ليا 15 يوم و غنرجع لقطر و هاد المرة ماناويش نرجع و نخليها مورايا، والله كون جات عليا ندير كلشي فهاد ل 15 يوم و لكن هاد المشكل اللي لاحني فيه داك (زم فمو و تنهد مستأنف كلامو بتفكير) مهم ان شاء الله خير، ماغيكون غير الخير
-صفية: فاش كتفكر؟
-غالي بسهو: حتا نقول لك من بعد.......................
فالمساء..................
جمعات سارة الماعن د العشا كتغسل فيهم فالوقت اللي حورية كانت كتمسح و ترجع حتا سالاو عاد جلسو بجوجات يكملو كلامهم اللي بقا فالنص قبل العشا، صوت التلفازة المجهدة كان عالي خلاهم ياخذو راحتهم فالكلام بلاما يخافو يسمعهم صالح او يحس بيهم خصوصا و انهم عارفينو حال تاني فمو فالافلام الهندية ديالو، جرات حورية الكرسي حتا قربات من سارة و جلسات حداها كتلولب فراسها
أنت تقرأ
غفران- قصة عشق تستحق الصفح (مكتملة)
Romanceهي قصة بنت كيقودها القدر للزواج براجل اختها المتوفية باش تكتاشف فالاخير بلي مو ت اختها يثير الشكوك و الاهم داك الزواج ماشي صدفة 💔 هي قصة حب من حطام قلبين، قصة واقعية 100٪ تجمعو فيها جوج وقائع من صلب الواقع و اكيد انكم سمعتوهم او ديجا دازو عليكم الا...
