ပြဿနာရှာတော်မမူစမ်းပါနဲ့ ဧကရာဇ်အရှင်ရေ || မြန်မာဘာသာပြန် ||

Chapter //23.1//

UNICODE

အခန်း (၂၃) ပြသနာရှာတော်မမူစမ်းပါနဲ့ ဧကရာဇ်အရှင်ရေ (အပိုဒ်ခွဲ ၁)

နွေးထွေးပြီး သင်းမြမြပူရှိန်းနံ့ကို သယ်ဆောင်လာတဲ့ လေပြေညင်းညင်းက သူ့နားထဲကို ဆော်သွေးတိုက်ခတ်လာတဲ့အခါမှာတော့ စုန့်ရှောင်းတစ်ယောက် တစ်ကိုယ်လုံး တောင့်တင်းသွားရပြီး မသက်မသာ ဖြစ်စွာနဲ့ လူးလွန့်နေတော့တယ်။

ကံကောင်းထောက်မ,စွာပဲ ယွီထန်က စုန့်ရှောင်းနဲ့ အချိန်ကြာကြာ ရစ်ပတ်ငြိတွယ်မနေပဲ တစ်ခဏတာလောက်‌ ပွေ့ဖက်ထားပြီးတာနဲ့ ပြန်လွှတ်ပေးလိုက်တယ်။ သူက ကျောမှီကူရှင်ပေါ်ကို မှီထားလိုက်ပြီး ပုံမှန်အမူအရာနဲ့ သူ့စာအုပ်သူ ပြန်ကောက်ယူလိုက်ကာ သဝဏ်လွှာတစ်စောင် ဖတ်ရှုနေသလို ဖတ်နေလိုက်ပုံများ... မသိရင် ခုနလေးတင်က စုန့်ရှောင်းအပေါ် အသားယူနေတဲ့သူက သူမဟုတ်သလိုပဲ။

စုန့်ရှောင်း ယွီထန်ကို ခိုးကြောင်ခိုးဝှက် ကြည့်လိုက်ပြီးမှ အိပ်ရာခေါင်းရင်းဘက်ကို ရွှေ့သွားလိုက်ပြီး ကျောမှီကူရှင်ပေါ်ကို မှီချလိုက်တယ်။

ယွီထန်ရဲ့ အိပ်ရာပေါ်က ဒီကျောမှီကူရှင် အကြီးကြီးက သူ ညဘက်စာဖတ်တဲ့အခါ သုံးဖို့ရာအတွက် အထူးပြုလုပ်ထားရှိထားတာ ဖြစ်လောက်မယ်။ ကူရှင်က အတော့်ကို သက်တောင့်သက်သာ ဖြစ်လှပြီး သူ့ရဲ့ ခါးနဲ့ ကျောရိုးကို ပြည့်ပြည့်ဝဝ ထောက်ထားပေးနိုင်တာကြောင့် အချိန်အကြာကြီး စာအုပ်ထိုင်ဖတ်ရင်တောင် ပင်ပန်းတယ်လို့ ခံစားရမှာ မဟုတ်ပေ။

စာရေးသူ ဟွမ်ယဲ့ဝမ်းဟယ်က အတော်လေး ဝီရိယရှိသူပဲ။ စာအုပ်ထဲက အပိုင်းအတော်များများမှာ ကိုးကားချက်တွေကို အလွန်အလေးအနက်ထား ရှာဖွေခဲ့ရကြောင်း သိမြင်နိုင်တယ်။ စာအရေးအသားပုံစံကို ဆန်းသစ်ချင်တာကြောင့်လည်း ဖြစ်နိုင်တယ်... ဂန္တဝင်ဆန်ဆန် အသုံးအနှုန်းတွေကိုတစ်မျိုး ဒေသန္တရ ဝေါဟာရတွေကို တစ်သွယ် ပေါင်းစပ်ရေးသားထားတယ်။ ဒါပေမယ့် စုန့်ရှောင်းလို ရှေးခေတ်က လာခဲ့တဲ့ သူတစ်ယောက်အတွက်တော့ ဒီလို မဆီလျော်တဲ့ ပေါင်းစပ်ရေးသားထားပုံကို ဖတ်ရတာက တစ်မျိုးတစ်ဖုံ စိတ်ဝင်စားစရာ ကောင်းနေတယ်လို့ ခံစားရတယ်။ သူ မကြာသေးခင်ကမှ သင်ထားတဲ့ နာမည်ကြီးဗန်းစကားနဲ့ ပြောရမယ်ဆို တော်တော့်ကို 'ဟန်ဆောင်ကာ မူပို'* ဖြစ်နေတာပဲ။