قتلها بصح ماراني نشرب في حتى دوا ، بالاك كي راني هادوا ليمات منيش نرقد مليح وبزاف مسريسيا . قاتلي هيا امبوسيبل تصرى هاذي من ستراس يتخلطولك الهرمونات هكدا إلا من كاش دوا . شعلت فيها بيسك كون تتبقى تهدر هكا علابالي راح تفضحني قتلها راني قتلك ما شربت حتى دوا بسيف تقوليلي شربتي دوا أصلا انتي وش دخلك فيا نشرب حتى السم . قاتلي كالمي روحك مدام راني غير نشخص في الحالة تاعك هدا ما كان . نطقلها هو قالها معليش حكيمة امسحيها فيا . قاتلي نورمال مسيو اصيل راني برك حبيت ننصحها المهم كي تكون راح تخرجها عدي عليا للبيرو . قالي اوكي مرسي . هيّا خرجت قالي كون نضتي ضربتيها مشي خير . سكتت جاب كرسي حطو قدامي وقعد . قالي شوفي جوليا حطي الشي لي صرا بيناتنا بعيد ديريني خوك باباك صاحبك كيمامن قبل وقوليلي شا راكي تشربي حتى حالتك هكدا راني مطول بالي معاك وحابك تقولي الصح خير من نعرف كلشي وحدي وتندمي . قتلوا ماراني نشرب في والوا بسيف خليني في حالي أصلا انت هو سبابي وش يهمك فيا ان شاء الله نموت ياك مزالولي سمانتين ومتزيدش تشوف وجهي إذا نسيت نفكرك وش درت فيا شوف حالتي كيفاش منيش قادرة حتى نوقف بسبتك انت . تنهد وقالي بعد كامل وش درت فيك مزلتي حابة تتزوجي شكون راح يقبل بوحدة كيفك كون تكملي معاه في ليلتك يرميك ويفضحك . ضحكت قتلوا تسما درت هذاك الشي باه غير نبطل الزواج ، بصح نحب نقولك هو يحبني ويموت عليا وقابل بيا حتى كون نرقد مع ميات راجل فهمت هذا إذا كنت انت حاسب روحك راجل . حكمني على فكي وزير عليا قالي علابالك كون مش راكي مريضة وش ندير فيك على الهدرة لي راكي تقولي فيها . قتلوا علاه راني نكذب ياك استقويت عليا كي شفتني وحدي وماعندي حتى واحد ، كنت نشوفك ملاك كنت نقول غير انت لي مستحيل تأذيني ولا ضرني بصح انت لي اذيتني اكثر منهم كامل . هبطوا دموعي قتلوا مستحيل نسامحك يجي نهار وتندم كيما ندمت أنا على الساعة والنهار لي عرفتك فيهم . بقا يشوف معايا من بعد طلقني ووقف راح للتاقة وحد العشر دقايق باه دار عندي قالي ارقدي درك حتى يكمل السيروم ونجي نروحك وخرج . بقيت قاعدة نستنى في السيروم يكمل كي وصلت الخمسة باه دخل عندي بصح كي جا عندي كانت خزرتوا فيا مبدلة قبيل برك كانوا عينيه معمرين غير بالغش . بصح دوك حاجة فيه مبدلة جا قعد قالي مرقدتيش . درتلوا براسي لا . حط يدو على شعري قالي حبس عليك لوجاع شو ي قتلوا ايه شوي . دخلت الفرملية نحاتي الابرة تاع السيروم . وخرجت قدم راح يهزني قتلوا خلي برك نقدر نمشي قالي تمشي حفيانة جبتك بلا صباط. كمل هزني ستغليت الفرصة حطيت راسي على صدرو نشبع منو بالاك متكونش عندي فرصة أخرى نزيد نقدملوا ولا نمس حتى شعرة منو قدمت راسي اكثر منو نشم في ريحتواً حتى وصلنا للطنوبيل قالي نحطك من لور باه تتكسلي . قتلوا لا درك نقدر نقعد قعدني في الكرسي قداموا ديمارا كان وقت الفجر ريحة ندى مع صوت الآذان وشمس بدأت تشرق شفت معاه قتلوا افتحلي التاقة فتحهالي خرجت يدي قتلوا علابالك من وقت كنت صغيرة كانت عندي أمنية وحدة في حياتي نفيق هاد الوقت نلقا بابا خارج رايح يصلي وكي يرجع يجيبلي معاه كرواسون والخبز سخون وماما توجدلنا نفطرو كامل مع بعض من بعد يوصلني نقرى كيما قاع البنات ، شوف كبرت ما شفتوا ما شرالي الخبز السخون ما وصلني نقرا . تنهدت قتلوا أصلا حياتي كامل جامي تمنيت حاجة وتحققتلي . قالي متدريش على هاد الدنيا بالاك الأمنية لي شابة فيهم قاع هيا لي تتحقق شفت معاه كان هو امنيتي شابة فيهم قاع اني نتزوج بيه ونجيبو ولاد . قتلوا مستحيل تتحقق إلا في منامي . قالي مكانش حاجة اسمها مستحيل في الدنيا . قارا قدام كوشة هبط دخل شوي وخرج عاود دخل للحانوت وجا . ركب مدلي صاشي كان فيها خبز سخون وكرواسون وفيها حلوة . شفت معاه قتلوا بصح انت مشي بابا . قالي قبل بشهور كنت أنا باباك وخوك وكلشي في حياتك ولا لا . قتلوا الأب مستحيل يأذي ولادوا والأخ مستحيل يأذي اختوا . بصح أنا زهري أنا قاع بابات والخوات لي في حياتي يأذوني . كنا وصلنا للدار عاود هزني حطني في شمبرة فوق فوتاي قالي نبدلك الفراش بيسك كان تبهدل كامل ، ما جا كمل بدلوا كنت أنا صاي نعست راح نرقد . هزني وحطني في السرير غطاني غمضت عينيا ، باسني على خدي ووقف دخل ريمة قالها هذا لي موصيكم تبقوا معاها . قاتلوا علاه وش كاين . قالها كيفاش وش كاين لبارح لقيتها راح تموت وغارقة في دمها وتقوليلي وشبيها كيفاه عندها خمس ايامات وهيا بالوجاع ومفقتوش بيها قاتلوا مقاتليش والله ما علابالي كون راني قتلك لبارح قاتلنا راح نرقد خرجنا خليناها لباس عليها . قالي معليش فاتت من ليوم جيبي فراشك وقاع وش تحتاجي هنا وتبقاي معاها دقيقة متخليهاش وحدها فهمتي ريمة دقيقة مكانش حتى إذا دخلت للدوش دبري راسك تدخلي معاها . قاتلوا علاش وشبيها جوليا ، مريضة بزاف . قالها لالا متخافيش مابيها والوا بصح كيما وصيتك دقيقة متغفليش عليها ياك . درك جيبيلي ساشي نلم هذا الدوا لي كاين قاع هنا . راحت شوي ورجعت نسمع فيه يفتشوا في الشمبرة دوا لي عندي كامل لموه وحطوه في ساشي لمزية السيرانق و الدوا خبيتهم في بلاصة مستحيل يشكو فيها بيسك حطيتهم في فليزة في جيب تاع فاست تاع شتا في نص الخزانة . المهم نسمع فيهم كملوا هزو قاع الدوا وخرج وهيا جابت تلفونها وقعدت .
