-هو في حد بيموت ببُعد حد عنه ؟
-طبعا لأ
-أظن انك فهمت قصدي، ممكن توضحلي اذا أمكن؟
-بصي في العموم محدش بيموت بالبعد، في حاجات تانية بتموت وبتولد مشاعر وحشة، مثلا خطيبك سابك أكيد مش هتموتي وهتكملي حياتك بس قلبك هيموت أو بمعني أصح هيتكسر وهيفقد الثقة في الناس ، ودي بتولد كره كبير تجاه ناس مش ليهم أي ذنب ، فهمتي ؟
-أه
سيبت غيث ومشيت كنت سرحانة وبفكر في كلامه ، هو فعلا في ناس بتأذي للدرجة دي ! لحد ما قطع تفكيري أو الأصح خضني الاستاذ أحمد
-هو انت مش ناوي تبطل يابني وتعقل وتحترم اني أختك الكبيرة ولا هو نو استيعاب خالص
-ايه يا نونو بهزر معاكي !
-دا هزار ازاي يعني فهمني !! ان شاء الله هموت في يوم بسببك وكمان ايه نونو دي كمان اسمي نور ايه جاب نونو لـ نور ها !
-مزاجي ياستي الله
-طب يلا يا شاطر روح العب بعيد
محدش يعرف اني بحب الكتابة في البيت غير غيث ، شيء طبيعي عشان أهلي هيعتبروها تخاريف وأي كلام لكن غيث كان بيشجعني دايما ، وأنا فعلا بحبه مش لأنه ابن عمي وبس لأ أنا حبيته عشان هو الوحيد اللي بيقف جمبي ويساعدني ويسمع مشاكلي بدون زهق وبيحلهالي كمان ، لكن هو خاطب دا اللي بقا يخليني أتجنبه عشان متمسكش بيه أكتر وأتعلق بيه وهو في الآخر مش ليا .
=بكرا العيد تحبي نخرج فين يا نور ؟
-نخرج ! نخرج فين يا مريم أنا بفكر في المصيبة اللي فيها دي
=مصيبةد !! مصيبة ايه يا بنتي ؟
-يوووه بقاا هضطر أحكيلك اقعدي ياستي
وعد صديقتي الوحيدة من اعدادي لحد دلوقتي واحنا مع بعض "احنا في آخر سنة في كلية العلوم" وبالفعل بدأت أحكيلها مفيش غيرها تقدر تسمعني أو يمكن تفهمني
-البيه هياخد رانيا ويخرجوا وعايزاني أخرج ! دمي محروق وبيغلي وتقوليلي نخرج ! انتي طبيعية يابنتي ولا ايه بالظبط ؟
-قولي كدا بقا حبيب القلب مزعلك
-اخرسي خالص أنا مش ناقصاكي
ضحكت بمكر-طب واللي يقدر يساعدك تعمليله ايه ؟
-ها ؟ قولتي ايه ؟ هتساعديني ازاي ؟
-المقابل يا هانم المقابل
-هخرجك بس نفركش الخروجة دي بالله
غمزت-سيبيها عليا
-مصاحبة شبح أقسم بالله شبح
وبالفعل خروجتهم اتلغت مش عارفة مريم عملت ايه بس فرحت أوي ، بس كان باين ان غيث زعلان ، طب وفيها ايه ما يخرج معايا أنا عادي علي فكرة أنا بنت عمه بردو ، كان قاعد في الجنينة وساند علي الشجرة وسرحان
-ايه يا عم الحبيب مزعلاك ولا ايه ؟
-هي مين دي ؟
-الشجرة
ضحك وضحكته ردت روحي-لا ياستي الشجرة عاجباني ومخلياني مبسوط كمان
مبسوط ! يعني ايه مبسوط ؟
-ها.. أه ياعم ربنا يخليهالك ، أه بصحيح هتخرج بكرا مع صحابك وكدا ؟
-لأ هفضل قاعد علي قلبكو هنا ها ياتري التحقيق خلص ؟
-طب ما تاخد قل... لا متاخدش في بالك أنا ماشية
مشيت وكنت حاسة بابتسامته ، ياتري هو فهم ايه بقا ولا هو بيبتسم الابتسامة الصفرا دي ليه !
هو معتبرني أخته وقالهالي كذا مرة وكنت ببين اني مبسوطة قدامه لكن لأ أنا كنت بعيط من جوايا هو ازاي شايفني أخته ! أنا بحبه ومستحيل يكون أخويا في يوم من الأيام .
-ها بنتي حبيبتي أخبارها ايه النهاردة ؟
-بنتي ! حبيبتي ! خش في الموضوع ياحج علي طول
-بنتي وفاهماني ، طبعا انتِ عارفة اني أنا وأمك مش عايشينلك طول...
-باااااس أنا عارفة الدخلة دي كويس عريس مش كدا !
-هتقعدي وتشوفيه ولو ارتاحتي حلو مرتاحتيش يبقا ارفضي وانتِ عارفة اني مش هضغط عليكي في الموضوع دا بالذات .
-حاضر يا بابا بس دا بكرا العيد هما هييجوا بكرا ولا ايه !
=لا طبعا هييجوا آخر يوم العيد يعني كمان 4 أيام .
كلام بابا صح بس أعمل ايه في قلبي المهزأ دا اللي متعلق بواحد تاني !! روحت قعدت في الجنينة في مكاني المفضل وكنت بكتب وغيث كان قاعد بعيد عني بشوية بس أنا مخدتش بالي منه
-حاسبي !!
اتخضيت -ايه في ايه ؟
-كان في فار معدي جمبك .
-فار... أه ماشي شكرا .
-مالك باين عليكي زعلانة وسرحانة كدا ؟
-لا أنا كويسة عادي مفيش حاجة .
-علي غيث بردو ؟
-جايلي عريس .
ملامحه اتغيرت-عريس ! طب وفيها ايه يعني ما انتِ هتطفشيه زي غيره ايه الجديد ؟
-الجديد اني ناوية آخد خطوة كبيرة في حياتي بس عايزة حد يشجعني واني أحاول أفتح قلبي يعني وأحب وك...
-ت ايه ؟ سمعيني كدا تاني ؟
-أحب يا غيث فيها ايه ما اي بنت بتحب حتي أي شاب بيحب ما انت بتحب رانيا عشان كدا خطبتها صح ولا أنا غلط ؟
-لأ صح بس اللي متعرفهوش ان..
-غيث تعالى كلم طنط
-حاضر جاي
التفتلي-كلامنا لسه مخلصش
-أظن ان كدا خلص
أنا فعلا بفكر أوافق علي العريس دا ، ماهو أنا مش هعلق نفسي بواحد خاطب ومش معبرني أصلا ، وخلاص أنا مينفعش أكلم غيث تاني ولازم أبدأ أنساه
"أول يوم العيد"
كالعادة بابا وعمي وغيث وأحمد بيصلوا العيد ويرجعوا البيت يعيدوا علينا ، أول مرة مكنش مستنية عيدية غيث ، كنت خلاص اتقفلت منه لكن القدر يريد شئ آخر
-انتِ بتتهربي مني ولا ايه ؟
-....
-لا وكمان مش بتردي عليا ! مالك يا روان ؟
-أتهرب منك ليه أنا عايزة أكون لوحدي مش أكتر .
-مش عايزة تاخدي عيديتك مني طيب ؟
-عيدية ايه ! أنا خلاص كبرت علي العيديات وكل الكلام دا ، ناس تانية أولي بالعيديات .
لمحت ضحكته فكان لازم أداري المصيبة اللي قولتها فكملت -أحمد مثلا أو مرام وملك ولاد فاطمة أختك .
-لا انتِ مستحيل تكوني نور بنت عمي لا مستحيل .
سابني ومشي وحقيقي كنت عايزة آخد العيدية فعلا عشان أحتفظ بيها زي الباقي ، لكن احنا كدا بنطلب الحاجة ونكون عايزين عكسها .
-ايه يا أحمد مش هتخرج مع خطيبتك ؟
-لا يا مرات عمي هي خارجة مع صحابها وقرايبها .
-طب عيدت عليها يابني لأحسن تقول عليك قليل الأصل ولا حاجة !
بصلي-لأ لسه لما أشوفها .
خوفت من بصته دي وقومت طلعت أوضتي ، مفيش حد فاهمني غير الكتابة هي بس اللي بتهون عني كتير كتبت شوية وكنت بعيط ونمت محستش بنفسي الا تاني يوم الضهر .
كان في ظرف جمب الباب فتحته كانت عيدية غيث حضنتها حسيت بفرحة متتوصفش ، أكني بنت عندها 6 سنين وبتاخد العيدية من باباها ، عينتها مع الباقي ومشوفتش غيث نهائي بعدها لمدة يومين .
النهاردة اليوم اللي جاي فيه العريس ! أنا مش هوافق لأ أنا مش قادرة أتخيل نفسي مع حد غير غيث أصلا ، وان مكنتش ليه ف أنا مش لغيره .
اليوم كان بيعدي بصعوبة قلبي بيوجعني أوي عايزة أشوف غيث حتي ولو من بعيد مش قادرة أبعد عنه أو أكون لغيره .
-انتِ لسه ملبستيش يا نور دا الناس علي وصول يابنتي !
-ماما أنا مش عايزة أخرج ولا أشوف حد مش عايزة أتجوز أصلا .
-وترضي تحرجي أبوكي مع الناس يعني ؟ وكمان هو قالك مش هجبرك علي حاجة هتقعدي معاه وتتكلموا ارتاحتي ليه يبقا تكملي مرتاحتيش يبقا كل واحد في طريقه يابنتي استهدي بالله كدا وقومي البسي يلا .
لبست وكنت قاعدة خايفة لحد لما ماما دخلت وندهتلي ، خرجت ولمحته وأنا داخلة معرفهوش حتي ! قعدت جمب بابا وفضلوا يتكلموا كتير وبعدها سابونا لوحدنا ، فضل ساكت وأنا كمان كنت ساكتة لدرجة اني اتخنقت من الزهق دا .
-طب ايه هنفضل ساكتين كتير !
-مش عارفة
-علي العموم أنا مصطفي 25 سنة مهندس ومتدين الحمدلله بس مش متدين بشدة وقسوة يعني، وأنا عارف كل حاجة عنك لأني بشوفك من سنتين وانتِ بتروحي كليتك ومقدرتش مفكرش فيكي و..
-هو مش المفروض تغض بصرك بردو ؟
بابا وماما و والده دخلوا
-ها يابنتي قوليلنا رأيك !!
-استني يا عمي أنا عايز أكلم نور 5 دقايق بس .
-طب مش دلوقتي يا غيث طيب !
-آسف يا عمي بس الموضوع ضروري .
قومت معاه وخرجنا البلكونة
-مستحيل تتجوزيه أو تتخطبي ليه فاهمة !
-انت بتتدخل بصفتك ايه أصلا ؟ دي حياتي وأنا حرة فيها ومسمحلكش تتدخل كدا .
-بتدخل بصفتي اني بحبك يا هانم .
اتصدمت -بت..بت ايه !
-أيوة هقولك كل حاجة أنا من قبل العيد وأنا فسخت خطوبتي مع رانيا عشان عرفت معني الحب منك انتِ وبحبك ومش هسمح تكوني لحد غيري والا هكسر دماغك .
-....
-انتِ مبترديش ليه ؟ علي فكرة أنا عارف انك بتحبيني وك..
-أنا بحبك أوي والله وكنت بعيط كتير عشان انت غبي ومكنتش حاسس .
-طب بس خلاص متعيطيش ويلا نخش وأنا هكلم عمي .
كلم بابا وأقنعه والنهاردة كتب كتابنا ومش هنعمل فرح عشان أنا اللي طلبت ، وحقيقي فرحتي مش عارفة أوصفها حاسة اني بحلم بس حلم جميل جدا وأتمني أفضل عايشة فيه .
-محدش قدك ياعم بقا .
حضنتها وعيطت -مريم أنا بحبك جدا
-وانتِ قلب مريم أصلا ويلا عشان المأذون مستني برا .
خرجت وأنا فرحانة جدا ومبسوطة وأسعد واحدة في العالم كله وحسيت بنظرات غيث ليا بس مبصتلوش خالص خالص .
"بارك الله لكما وعليكما وجمع بينكم في خير"
فجأة شدني لحضنه وحسيت اني في عالم تاني بس عالم حلو أنا وغيث وبس .
"كنت أنا يومًا ما، والآن كلي أنت."
#أروي_إيهاب
