-ها وبعدين؟
اتخضيت والموبايل وقع من ايدي-بعدين ايه؟
-هتفضلي تراقبي فيه كدا من بعيد لحد امتى؟
-أنا مش براقب حد.
-من امتى وإنتِ بتكدبي يا كيان؟ من امتى وإنتِ بتخبي عليا حاجة؟
-أنا مش بكدب ولا بخبي حاجة يا وعد.
-طب بصي في عيوني وقوليلي إنك صادقة، عيونك قادرة تخليني أصدقك.
جريت عليها وحضنتها، فضلت أعيط، أول مرة أعرف إن الحب بيخلي الناس ضعيفة، مش المفروض حبي ليه يقويني؟
-هتنسيه؟
-كنت نسيته من زمان.
هو مش شخص يتنسي في يوم أو ليلة أو حتى سنين، هو يتحب، يتحب وبس.
-هتفضلي متعلقة بخطاويه كدا؟ افرضي مثلا هو مش عارفك؟ دا انتوا حتى محصلش بينكم ولو موقف واحد.
بثقة-يمكن مش عارفني، بس لو شافني هيعرفني بقلبي، لأن قلبي حبه، والقلب اللي بيحب بيبان على ملامحه.
خمس سنين وأنا متعلقة بكل تفاصيله، تنية قميصه المحبب لقلبي وقت الصيف، البليزر الأسود بتاعه اللي بكون وقتها عايزة أخبيه جوايا من عيون الكل، حبه لشغله وأهل بيته، أخته اللي إلى حد ما زميلتي، بيخاف عليها أوي، بحب حبه ليها، وبحبه.
كنت سهرانة وكالعادة فاتحة الواتساب وبلف فيه بلا هدف، لحد ما لقيت ستيت نازلة باسم "ملك" اتعدلت فجأة من على السرير وكأني هستقبل حاجة تغير مجرى حياتي، فتحتها ببطئ لحد ما الابتسامة كانت بتترسم على وشي وبتوسع بشكل تلقائي، ياوعدي وفرحة قلبي بيها، هي مش قريبة ليا اه لكن بحبها وبفرحلها، كانت بتقول أن خطوبتها آخر الأسبوع وإن كلنا معزومين عندها، فرحتي اليوم دا كانت كبيرة أوي، كنت حاسة إن هو كمان فرحان، فكنت أنا كمان فرحانة.
-خطوبة ملك يوم الخميس الجاي، مامتها اتصلت بيا وعزمتنا، هتروحي بدالي لأنك عارفة مش هعرف أروح.
ابتسمت-هروح أنا و وعد يا ماما.
طول الأسبوع مشوفتوش خالص، هو يُعتبر جاري، بس هو بعيد عني شوية، لكنه قريب من قلبي، كنت بفكر هلبس ايه وكأنها خطوبتي أنا، كنت عايزة أبان جميلة في عيونه، على الأقل يلمحني، صورتي تترسم في عقله، بعد كدا صورتي تتطبع في قلبه.
-شكلي حلو يا وعد؟ يعني الفستان جميل عليا؟
-دي المرة المليون اللي تسأليني فيها، ارحمي أمي التعبانة بقا، وبعدين يعني هي كانت خطوبتك وأنا معرفش؟
-ياريت والله كانت خطوبتي أنا.
-اظبطي كدا بدل ما أظبطك
ضحكت-أوامرك يا فندم.
كنت رايحة وأنا ماسكة قلبي في ايدي، من أي همسة أو كلمة هيقع بين ايديه أكتر، كان نفسي تجمعني بيه ولو كلمة واحدة، لكن أنا حتى عمري ما كنت هسمح بإن الكلام يطول بيننا، أنا اه بدعي بيه وعايزاه يجيلي بقلبه، لكن يجيلي من طريق صح، طريق ظاهر و واضح للكل، مش من طريق مختصر يفقدني نفسي وأخلاقي.
