كيان الغيث

حكاية 18

-مش هنحدد معاد الفرح بقا؟
-‏اتكلم مع بابا، إنت بتتناقش معايا أنا ليه دلوقتي؟ أفهم بس؟ علىٰ أساس إني لو قولتلك يلا بكرا الفرح هيتم بكرا يعني؟
ضِحك-مالِك دخلتي فيا شمال كدا ليه؟
-ماهو إنت اللي بتقول كلام يعصب يا غيث، وبعدين هي فين وعد أختك قامت وسابتنا بقالها نص ساعة، هي الكلبة دي راحت فين؟ ‏
-‏هو احنا مينفعش نقعد مع بعض كدا شوية من غيرها يعني؟
-‏لأ مينفعش ياغيث، وقولتك الموضوع دا أكتر من مرة، لو سمحت متفضلش تكرر نفس الحوار كذا مرة كدا.
اتنهد-‏حاضر يا كيان، حاضر.

دايمًا بيتفنن إنه يعصبني بالطريقة دي، مخطوبين بقالنا 6 شهور والمفروض معاد جوازنا يكون قريب، بس مش عارفة ليه قلقانة؟ ليه خايفة؟ ليه مش متطمنة؟

-أنا كلمت عمي علىٰ فكرة وقالي أتكلم معاكِ ونختار المعاد اللي يناسبنا سوا وهو مُوافق على أي معاد.
-‏تمام شوف إنت أي وقت عادي.
-‏أنا لو عليا يبقا بُكرا لو حابة، عايزك تكوني معايا دلوقتي قبل بُكرا كمان.
-‏يانوحي يانوحي.
-‏هو إنتِ كدا دايمًا ولا أوقات وأوقات؟
-‏لا معاك إنت بس.
-‏ايه؟
-‏ايه؟

بحبه؟ اه بحبه مش هكدب، لكن في شيء جوايا مش قادر، مش موافق، مش حابب يكمل، مش عارفة أنا عايزة ايه وتعبت، لأ أنا عرفت، أنا جعانة هاتولي آكل.

-بالله نكدية، نكدية والنكد بيجري في دمك كدا، لو حللنالك هنلاقي دمك فيه كرات دم حمرا وبيضا وبلازما وكرات نكد صغنونة كدا.
ضحِكت علىٰ تشبيهها-‏يابنتي افهميني، غيث شخص كويس، وأنا واثقة فيه، وبحبه، لكن في شيء غريب، حاسة بشيء ناقص في علاقتنا، مش عارفة ليه حاسة بفتور وملل كدا، هو أنا مزوداها في ضوابط الخطوبة أوي؟
-كيان يا حبيبتي أخويا هيطق منك كدا، اللي هو أنا لو مكانُه كنت رميتلك الدبلة في وشك أصلا، مش عارفة مستحملك ليه كُل دا بجد؟
-‏مانتِ أخته، أشكي لمين همي بس ياربي.

يمكن دا توتر ما قبل الفرح صح؟ أكيد صح، ماهو أنا مفضلتش أحب فيه دا كُله عشان أبوظ الجوازة بسبب أوهام وتخاريف، الأحسن أقوم أتخمد وتبا للتفكير الكتير.

-تمام كدا الفرح بعد شهرين، علىٰ ما نكون ظبطنا كُل حاجة محتاجنها وكدا، تمام؟
-‏ها؟ بتقول حاجة؟
-‏لا دا إنتِ مش معايا خالص بقا.
-‏لا معاك معاك.
-‏مالك يا كيان؟
هو بيسبِّل كدا ليه؟ أقولُه ما تنشف يلا كدا وأخليه يكرهني؟ ولا أبتسم كأي أُنثى في مكاني؟
-اهدي طيب، اهدي، ياريتني ما سألت واللهِ خلاص أنا آسف، حقك عليا.
طبعًا معيطتش خالص، لا دا أنا استرونج جامد أوي يعنى طبعًا أُومال.
-بتعيطي ليه طيب فهميني؟
-‏ماهو أنا لو أعرف هقولك.
-‏إنتِ عبيطة يابنتي؟
-‏وكمان بتتريق على أحزاني؟ روح منكلله يا أخي منكلله.
-‏هو أنا جيت جنبك يابت إنتِ، كيان متعصبنيش، في ايه؟
بهمس-‏خايفة.
-خايفة! من ايه؟
عياطي زاد-‏مش عارفة.
-‏طب اهدي طيب، خلاص واللهِ مفيش حاجة، كُله هيكون تمام ماشي؟ متزعليش بقا ياقمر إنتِ.
ابتسمت-‏ماشي، هاتلي شاورما سوري بقا.
ماهو المرء لو متعافاش بالأكل هيتعافىٰ بايه؟