-عندكوا أكل ايه النهاردة؟
-مش عاملين أكل.
-مكرونة بشاميل؟ أنا نقطة ضعفي المكرونة البشاميل.
-مزهقتيش؟
-وكمان بتعزميني؟ قومي افتحي الباب بس كدا هتلاقيني واقفة.
لبست وروحتلها، خبطت على الباب ففتحتلي وعلى وشها نظرة عارفاها كويس.
-مش ناوية تدخليني يعني؟ أندهلك طنط تيجي تزعقلك؟
-يا كيان أنا خايفة عليكِ.
-خايفة عليا من ايه؟ قولي بصراحة خايفة أخلص صنية المكرونة القمر اللي جوا دي اللي طنط بتعملها؟
-كياان؟
-نعم؟
-كفاية.
-كفاية ايه؟
-كفاية وجع لقلبك.
-أنا أوجع قلبي؟ ايه ياوعد دا إنتِ أكتر واحدة عارفاني يعني.
-عارفاكِ وعارفة إنك تعبانة ومش هتتكلمي ومش هتقولي، وعشان هو أخويا بس بقولهالك أهو هو ميستاهلكيش واللهِ.
-طب اسكتي.
-يا كيان اسمعي مني بس.
-ياوعد خلاص سمعت كتير، سيبيني لنفسي بقا.
كُنت عارفة إنه مش موجود في البيت، دخلت أوضته وحطيت الورقة في البلكونة وكُنت هنسى ومش هحط المشبك فيها، المشبك دا يمكن هو اللي مداري عليا لحد دلوقتي، لأن وعد قالتلي بيفتكر إن حد راميها، ميعرفش إني بحطهالُه بايديا الاتنين دول كل مرة.
كنت كاتبالُه فيها المرة دي:
هناك قلب مُعلَّق على أطراف أظافرك، بمجرد كلمة مِنكَ تكون قادرًا على أن تُسقِطه، وبكلمة أُخرى يُمكنك أن تضمُّه.
مش سهل أبدا الحب من طرف واحد، إنك تكون مش متشاف أصلا، مجرد هامش وبس، غيث شخص لطيف، يمكن بس الدنيا اللي خلت طريقُه ملخبط شوية، متشتت شويتين، لكنه شخص كويس، محتاج بس حد ينورله طريقه عشان يوصل للطريق الصح.
-ليه بتحبيه أوي كدا مع إن عمرُه ما بادلك بأي شيء؟
ابتسمت بحزن ورفعت كتافي-مش عارفة، حُب بدون أسباب، وبدون أي مقابل، لكن قلبي حَبه بكُل بساطة، قلبي بيتحرك جوايا وقت ما بلمحه، قلبي بحس بيه بيترج جوايا لما بس بيقولي ازيك وقت ما باجيلك ويفتحلي الباب بالصدفة، هو حلو، حلو لدرجة تخطف القلب، لكن أكتر حاجة وحشة فيه هي إنه مش شايفني عشان يحبني.
أنا مش حزينة للدرجة دي أوي يعني، لكن أوقات بتصعب عليا نفسي، أنا أستحق أتحب، دايمًا مؤمنة إن أي حد يشوفني هيحبني لنفسي، طب هو ليه محبنيش؟ بتصعب عليا نفسي أوي لما بسأل السؤال دا جوايا، بحس وكأني شيء قُليل أوي، برغم إني عارفة إني مش كدا، برغم إني عارفة إني أستحق الأحسن والأفضل، بس أنا عايزاه هو، ربنا أكيد هيكتبلي الخير فيه أنا حاسة، غيث مش وحش أبدًا، غيث بس مستني حد يمدلُه ايدُه ويشده من اللي هو فيه، غيث يستحقني زي ما أنا أستحق قلبُه.
-رسالة النهاردة فيها ايه؟
-سر.
-عايزة أعرف بتكتبيلُه ايه بجد؟
-شيء سري بيني وبينُه.
-لكن هو ميعرفش إنها منك إنتِ، أنا اللي أعرف.
-مش هقولك بردو.
كُنت كاتبة وقتها:
توقف عن كونك بعيدًا، اقترب هُنا، كُن على مقربة من قلبي، فَقلبي لا يرى سواك.
