-رب الخير لا يأتي إلا بالخير.
ابتسمت بحزن وبصيتله:
-عارفة، بس أنا..
-مفيش بس يا كيان، إنتِ خسرني ابنك زي ما أنا خسرته بالظبط، الفرق إني راضي، وعارف إنك راضية، وعارف إنه صعب عليكِ تتقبلي فكرة إن ابننا مات من قبل حتى ما يتولد، بس احنا منعرفش حكمة ربنا فين، ودا الخير يا حبيبي، ليا وليكِ، ويمكن ليه هو كمان.
عيطت:
-أنا بس كنت عايزة أشوفه، كنت عايزة ألمسه، كنت عايزة أحضنه، كنت مخططة لحاجات كتير في دماغي، لو كانت بنت كنت هحكيلها عني، هحبها أكتر من نفسي حتى، كنت هلعب معاها، مش هزهق منها أبدا، ولو كان ولد، كان هيغلبني آه، بس مهما كان هو ابني، ابني وحبيب روحي وعيني، أنا بنيت توقعات وأحلام كتيرة يا غيث وفي ثانية راحت واختفت، أنا قلبي بيوجعني، مش حاسة بشيء فيا غير وجع، وجع وبس.
مسك ايدي وقرب مني وحضني بشويش:
-وأنا معاكِ يا كيان، كل فترة مش كويسة هنعديها سوا، فاكرة احنا عدينا بايه؟ وقت الخطوبة ووقت تجهيزات الفرح، أوقات زعلك مني وأوقات خناقنا، فاكرة أكبر حاجة ضايقتك وزعلتك في حياتك؟ فاكرة قولتي على كام موضوع مش هيعدي وبتتفاجئي في الآخر إنه عدى واتنسى كمان؟ ربنا مش بيسيب حد ولا بينساه يا كيان، ربنا بيحبنا، ربنا أقرب لينا من نفسنا، ربنا عارف بوجعنا، عارف معاناتنا، ودا ابتلاء واختبار من ربنا، لازم يا كيان لازم نعدي منه.
-ونعم بالله عندك حق.
مسك ايدي أكتر وقال بهمس:
-طول ما احنا مع بعض مفيش حاجة هتفرقنا، وطول ما احنا مع بعض بردو مفيش صعب هيتغلب علينا، هنخلي رضانا بحكمة ربنا أكبر من أي شيء بنملكه، هنفضل ماسكين ايد بعض كدا لنهاية الطريق، بدأناه سوا وهننهيه بردو سوا، وربنا هيعوضنا، ربنا عوضه جميل.
مسحت دموعي وأنا ببتسم:
-ربنا عوضه حلو فعلا، إنه عوضني بيك ورزقني حبك ورزقني بيك، أنا بحبك أوي.
ميلت راسي على كتفه وغمضت عيوني، برضا، بفرحة، وبحب.
"كنت أنا يومًا ما، لكن الآن كلي أنت."
#كيان_الغيث
#أروى_إيهاب
