-نفسك في ايه؟
ميلت براسي على كتفه وابتسمت:
-نفسي اللحظة دي تدوم للأبد.
ابتسم:
-واحنا سوا؟
مسكت ايده وبادلتُه الابتسامة:
-واحنا سوا.
***
-أول شرط...
-هو في شروط كمان؟
-أكيد طبعا، إنت فاكر إنه حاجة سهلة إنك تتجوزني ولا ايه؟
-لا طبعا.
-حضرتك متطولش أصلا.
ضحك:
-ما أنا بطول أهو.
-احنا هنهزر!
ابتسامته اختفت:
-اتفضلي كملي.
حاولت أهدى، ملامحي لانت، كيان الرقيقة، البنت اللطيفة، الطفلة اللذيذة حلّت عليا أخيرًا.
-الشرط الأول وهو إنك تحاول تفهمني، عارفة إنه هيكون صعب في أوقات كتير، لكنه مش مستحيل، هتحاول معايا هتلاقيني تلقائي بستجيب، لكن لما تسيبني، وتحسسني إنك بتبعد تحت مسمى إنك سايبني أهدى فأنا عمري ما هقبل دا أبدا.
ابتسم:
-وتاني شرط؟
-إنك تحسسني إني فعلا الأولى، والأخيرة، وإن مينفعش عينك وقلبك يشوفوا غيري، في اليوم اللي تشوف فيه بنت أجمل مني أرجوك سيب ايدي وامشي، لأنك وقتها هتكون بطلت تحبني، وأنا مقدرش أفضل في مكان مفيهوش روح بتحبني.
ابتسامته زادت:
-والتالت؟
-بيتنا يكون مبني على أساسات كتير، أولها وأهمها الاحترام، المودة، الرحمة، والحب، الحب حاجة مهمة جدا، ويكون الدين وحبه في قلوبنا هو اللي جمعنا، لأن اللي بيتجمعوا على طاعة ربنا مستحيل يتفرقوا.
-كلامك جميل أوي بجد.
-مقتنع بيه؟
-مقتنع جدا.
-بس أنا لسه مخلصتش.
-سامعك.
-نحاول منخليش المشاكل تطول بيننا، مفيش بيت بيخلو من المشاكل، كل البيوت بيحصل فيها مشاكل، لكن البيوت القوية هي اللي بتعرف تتعامل صح مع المشاكل دي وبيعدوها وبيتخطوها، وبيكملوا سوا، والمشاركة، المشاركة بإنك تساعدني حتى في شغل البيت ولو بحاجات بسيطة، محدش يعرف الست بتتعب قد ايه في بيتها، وكمان لو كانت مرأة عاملة.
-فاهم واللهِ أكيد ومقدر دا كويس.
-معندكش اعتراض على أي حاجة؟
-نهائي بجد، قولتي كل اللي كنت حابب أقوله.
ابتسمت:
-ومعندكش مانع إني أشتغل؟
-ما هو أكيد متعلمتيش سنين عمرك دي كلها وهاجي أنا أقولك متشتغليش، لكن لو إنتِ مش حابة تشتغلي دا شيء يرجعلك.
-ولو جيت في يوم وقصرت في شغل البيت؟
-تحاولي تفهميني، تقوليلي مش قادرة مثلا، ونقسم الأدوار علينا بشكل بسيط، وأكيد زي ما أنا هشيلك في يوم من الأيام هييجي اليوم اللي تشيليني فيه بردو.
-ردي هبلغه لبابا وهو هيقولك.
قام وقف وقال وهو بيبتسم:
-بتمنى من كل قلبي لو لينا نصيب في بعض ربنا يجمعنا على خير.
ابتسمت:
-لو احنا الخير لبعض أكيد هنكون نصيب بعض، وطرقنا ساعتها هتتلاقى.
-تفتكري؟
رفعت كتافي:
-ليه لأ؟
***
-كنت عارفة إنك هتوافقي.
-أوافق على ايه؟
-على العريس.
-بس أنا لسه موافقتش.
-هتوافقي.
-وعرفتي منين بقى؟
-واضح أوي إنه عاجبك، بس عمرك ما تروحي تقولي.
-تفكيره اللي عاجبني، مش هو خالص.
-لا بجد؟
-يا وعد بقى!
-خلاص هسكت، بس ناوية تعملي ايه؟
ابتسمت:
-هوافق.
