قلع النضارة برسمية:
-عندها نيوفوبيا.
-يعني ايه؟
-خوف من التجارب الجديدة، خوف من أي حاجة جديدة عمومًا حتى ولو كانت بسيطة.
-عندها توحد يعني؟
-لأ، التوحد والنيوفوبيا شبه بعض في حاجات بسيطة، لكنهم مش حاجة واحدة.
-أنا مش فاهمة حاجة!
مشيوا بعيد عني شوية لكني كنت لسه سامعاهم.
-التوحد مرض صعب التعافي منه، بس ممكن حدته تِقل، لكن النيوفوبيا ممكن الشخص يتعافى منها نهائي.
ضحكت والفرحة بانت في عيونها:
-بجد يا دكتور؟
بص ناحيتي:
-بس هي بس تحاول.
-هتحاول، هخليها تحاول وهتبقى بخير.
-مش بالاجبار يا مدام، لازم بالهدوء، وبمزاجها، وبرضاها وبموافقتها.
طول الطريق كنت ساكتة كعادتي، لكن ماما اللي كانت بتتكلم كتير وبتقول كلام كتير مش فاهماه، أو مركزتش عشان أفهمه، أنا عايزة أروح لسريري.
-هتعملي ايه في يومك النهاردة؟
-هنام.
-مش هتنزلي كليتك؟
قولت بسرعة:
-مش عايزة أنزل.
-طب أكلم غيث يجيبلك أي حاجة من هناك؟
-ماشي، خليه يجيبلي أي محاضرات.
حسيت بزهق فوقفت في البلكونة، هو أنا لحد امتى هفضل كدا؟
هفضل لوحدي دايما؟ خلاص اتكتب عليا الوحدة؟
طب أنا ليه بعيدة عن الكل؟ حتى بعيدة عني، عن نفسي.
بعيدة عن أهلي، مليش صحاب، مفيش ذكريات حلوة أقدر أخلقها، حياتي انتهت من ساعتها.
جسمي اترعش بخوف بمجرد ما افتكرت اللي حصل، قعدت على الأرض وحضنت نفسي وبدأت أعيط زي كل يوم، وفي دماغي نفس السؤال.
كان ليه كل دا؟
-اهدي يا كيان، بالله عليكِ تهدي.
-أنا تعبت يا ماما، تعبت.
-مفيش مرض بنتعافى منه بسهولة يا حبيبتي.
-هو أنا ممكن أفضل كدا على طول؟
-هتخفي، هتخفي وهتبقي بخير يا عيوني.
حضنتها ونمت، مش بخاف أقربلها زي أي حد تاني، بيقولوا مفيش أم بتأذي ولادها، وماما بتحبني، وبتقول دايما إن مش هي لوحدها اللي بتحبني بس.
-غيث جابلك دول، مستنيكِ برا.
-هو بابا هنا؟
-نايم، هتطلعيلُه ولا ايه؟
-هطلع.
خرجت وخرجت وراها، أنا مش عارفة هو عايز مني ايه بجد، لكنه واحد من ضمن الناس اللي لسه بتعامل معاهم بدون خوف، بدون قلق، بدون ألم حتى.
-ازيك يا كيان.
-الحمدلله يا غيث، إنت عامل ايه؟
-كويس الحمدلله، اتفضلي دي المحاضرات.
أخدتهم من ايده وابتسمت:
-شكرا.
-لو في حاجة حابة أشرحهالك مفيش مشكلة، أنا المعيد بتاعك بردو يعني.
ضحكت:
-ولما عمك يصحى ويزعقلك؟
-يابنتي هيزعقلي عشان بهتم بيكِ؟ قصدي خايف عليكِ وعلى مصلحتك يعني؟
-طب تمام، كان في كام نقطة كدا مش فاهماهم.
-طب يلا بينا نشوفهم بيقولوا ايه.
بحاول دايما أسأل نفسي سؤال، ليه كتبت على نفسي الوحدة؟ وليه بخاف؟ ما أنا هفضل طول عمري خايفة لو مجربتش، وفي النهاية اكتشفت إن عندي فوبيا، أو بالأصح عقدة نفسية، هما كانوا سببها، هما كانوا السبب في كل شيء كنت بعاني منه.
