-تفتِكر هقدر أنجح؟
-مفتكرش لأ، أنا واثق.
سكت شوية ومِسِك ايدي وقال:
-أنا واثق فيكِ إنتِ، واثق في كيان إنها تقدر تنجح في أي مجال، تقدر تحقق اللي نفسها فيه بكل بساطة، ممكن تتعب شوية، تزهق شويتين لكنها هتنجح، عزيمة كيان فوق عزيمة كل شخص، كيان اللي أعرفها عمرها ما استسلمت وهربت أبدا، دايما بتقف قُصاد مشاكلها بكل شجاعة وبتحلها..
شدد قبضته على ايدي وكمل:
-وخليكِ دايما عارفة إني معاكِ وجمبك وبدعمك، أشطر كتكوت عندنا هو كيان، عندنا كام كتكوت قمر كدا؟
-هو أنا عمري قولتلك إني بحبك؟
هز راسه بمعنى لأ وقال:
-تؤتؤ ولا مرة.
ضربته بخفة على كتفه وأنا بقول:
-شوف شوف غيث الكداب دا.
كنت خايفة وهو بشوية ثقة وحب ودعم احتوى خوفي دا وخلاه يتبخر، أينعم لسه متوترة لحد دلوقتي لكن غيث معايا هخاف من ايه بعد كدا؟
-لأ لأ أنا مش هروح، أنا هعتذرلهم مش هعرف لأ.
مسك ايدي وسحبني لطرف السرير وقعدت، فقال:
-اهدي كدا وخدي نفسك، غمضي عيونك..
غمضتها زي ما قال فكمل:
-تخيلي نفسك في مكان كله لونه أخضر، كله زرع أخضر يشبه لعيونك الجميلة، تخيلي نفسك مع حد بتحبيه..
تخيلته معايا فابتسمت بتلقائية، استنيته يكمل فقال:
-تخيلي نفسك ماسكة ايد اللي بتحبيه، وماشيين سوا ناحية ناس كتير مستنية حضورك، ناس بتحبك وفخورة بيكِ، ناس بتتمنى إنها تشوفِك ولو لمرة، ناس بتتمنى تتصور معاكِ، ناس بتتمنى وجودك حواليها للحظة، ناس بتحبك، ايه احساسك دلوقتي؟
قولت وأنا لسه مغمضة عيوني:
-أنا فرحانة، عايزة أحضنهم كلهم، عايزة أقولهم كلهم إني بحبهم، وإن لولاهم مكنتش هكون هنا ولا وصلت للمكان دا، أنا فرحانة، أنا بنجح، غيث أنا بنجح!
فتحت عيوني لقيته بيبص ليا وعيونه فيها دموع، حضنني وقال:
-أنا فخور بيكِ، فخور بيكِ حد السما.
إنك تحب دا شيء سهل، وإنك تتحب بردو شيء سهل، يمكن مش سهل أوي بس يعني، لكن إنك تتحب من حد شايفَك كل شيء، كل حاجة حلوة في دنيته، شايفك محور حياته، بيفرح لفرحك ويزعل لزعلك، شايفك إنت مصدر نور لحياته ودنيته، بيدعمك وقت خوفك وقلقك دا اللي صعب، صعب جدا تلاقيه، لكنه مش مستحيل، أبدا مش مستحيل.
-خايفة؟
مسكت ايده جامد وقولت:
-وأخاف من ايه وأنا معاك.
طلعت وقفت قدام المايك وأنا بقول:
-انها بحتفل بنجاح البراند بتاعتي، وإنها رغم بساطتها ولبسها البسيط والمحتشم إلا إنها قدرت تنجح، ومش بس تنجح لأ تنجح وتوصل لبلاد كتير كمان، أنا مكنتش متوقعة دا يحصل، مكنتش أبدا أتخيل إن اسمي واسم البراند يتشهر بالسرعة دي، وإن اسمي يكبر وشغلي يكبر معاه، النجاح مش شيء سهل وبسيط، النجاح محتاج تخطيط ودراسة كبيرة، وبالذات لما يكون نجاح مبني على أساس لُه هدف وغاية، مش مجرد نجاح ويكون النجاح دي في شيء فاسد مثلا، النجاح يكون نجاح لما يكون الشيء اللي بتنجح فيه لُه هدف كبير يفيد الناس بالفعل، النجاح لما تحاول تغير وجهة نظر الناس الغلط في أشياء اتربوا عليها للأشياء الأفضل، النجاح خطواته كتير، لكنه مش مستحيل، وأكيد هيجيلك يوم وتنجح.
سكت شوية وبصيت لغيث لقيته مبتسم وبيسقف مع باقي الناس، كملت وأنا ببتسم لُه بحب كبير:
-ولازم وسط كل دا تلاقي حد جمبك، حد واقف معاك وبيسندك في قراراتك، بيدعمك تقف وقت ما تحس إن خلاص فشلت، حاولوا تنجحوا دايما، وافتكروا إن الفشل ممكن يكون أول درجة سلم للنجاح.
"كنت أنا يومًا ما، لكن الآن كلي أنت."
#كيان_الغيث
#أروى_إيهاب
