-أنا آسفة، حقِّك عليا.
بصيت لها بحُزن ورديت:
-مفيش بيننا اعتذارات يا وعد، يكفي إنه يكون عتاب على الأقل، لكن اللي حصل دا ياريت ميتكررش تاني.
-حقك عليا أنا الغلطانة.
-احنا مش في مين غلطان ومين لأ يا وعد، احنا فينا احنا، احنا ملناش غير بعض، من ساعة ما وعينا في الدنيا دي واحنا كتف في كتف، مينفعش في لحظة أو بمجرد موقف تسيبيني وتمشي أو حتى تختفي، تعالي واتكلمي معايا، قوليلي سبب زعلك مني، عاتبيني وأعاتبك، لكن مش نسيب دنيتنا تتهد علينا كدا بسبب موقف صغير.
كانت هتعيط بس بتداري وبتكتم جواها فقالت:
-بس إنتِ عارفة إني بحبك صح؟
-عارفة يا وعد عارفة، ودي المشكلة إني بردو بحبك.
رفعت حاجبها وردت:
-مشكلة!
-طبعا مشكلة طبعا.
قربت منها ومسكت ايدها وضحكت في وشها زي عادتنا كل موقف، حضنتها لما دمعة من عيونها وقعت.
-بنتنا وعد طول عمرها عيوطة، بس عمرنا عمرنا كدا ما نروح نقول.
-كيان أنا بجد بحبك.
-عارفة عارفة أنا أستاهل أتحب أصلا.
ضربتني على كتفي بخفة وقالت:
-بصراحة كدا عندك حق، وبصراحة كدا أنا جعانة ومأكلتش وعايزة آكل أوي.
-بس كدا بينا ناكل شاورما يا صاحبتي بينا.
-بس إنتِ اللي هتدفعي.
-سيد عيب كدا احنا أهل، طبعا إنتِ اللي هتدفعي.
مسكت ايدها وخرجنا من البيت، كنا داخلين واحنا شايلين هموم الدنيا كلها، دلوقتي خارجين واحنا بنضحك وبنهزر وفرحانين، وجود شخص معاك كل الأوقات ميبعدش مهما فرقتكوا الظروف واقف في ضهرك ومعاك دايما رغم الظروف والمشاكل والحوارات كفيل إنه يخليك تحس براحة وسط كل مشاكلك وهمومك.
"لربما التقينا يومًا يا صديقي وحينها تشبثت بك للأبد."
#كيان_وعد
#أروى_إيهاب
