كيان الغيث

اسكريبت 24

-نهار أبوك منيل! إنت ايه اللي مهببه في الشقة دا؟
رد وهو بيتأتأ وقال:
-‏كنت بروق الشقة بس.
-‏بتروقها ولا بتهدها؟ دا إنت بوظت أم الشقة خالص، ايه اللي نيلته دا؟ هاا رد عليا.
-‏معلش أنا آسف، كنت بدور على حاجة بس، هتصل بماما تبعت واحدة تنضف.
-‏بتدور على ايه؟ بتدور على ايه تحت الكنبة أفهم بس؟ بتدور على ايه تحت السجاد؟ كنت بتدور على التراب؟ ولا بتلحس الأرض، ولا إنت كان أصلك صرصار يلا؟ إنت جاي تشلني؟ قسما بالله يا غيث لو ما روقت الزريبة دي لهنكد عليك نكد عمرك ما شوفته ولا هتشوف زيه قبل كدا.
بدأ يجري ويلم في الحاجات اللي واقعة وقال:
-‏لا وعلى ايه دا كله إلا زعل كوكو حبيبتي.

-أنا تعبت، مش قادر.
-متعبتش إنت وإنت بتنيل الدنيا كدا؟ متعبتش وإنت شايفني بروق طول النهار وتيجي في خمس دقايق وتبهدل الدنيا كدا؟
-‏مش قصدي أنا آسف بس تعالي نساعد بعض.
كان بيبص ليا بنظرة الطفل قبل ما بييجي يعيط كدا، واللي هو استعطاف ليڤل الوحش، وطبعا أنا قلبي رقيق وجميل وساعدته، خلصنا ترويق أو بمعنى أصح خلصت أنا ترويق، لأن الباشا كان عامل زي تيتا اللي عندها 100 سنة، وأنا عملت كل حاجة لوحدي.
-عارفة يا كيان أنا بحبك ليه؟
بصيتله باستغراب شوية من سؤاله وقولت:
-‏بتحبني عشان سبب؟ إنت أهبل يابني؟
-‏قولي ليه بس.
-‏ليه؟
رفع كتافه وقال:
-‏صدقني أنا لو أعرف هقولك.
حدفته بالمخدة في وشه وقولت:
-‏أبو تقل دمك، مبحبكش يلا واللهِ ولا بقبلك كدا.
-‏ياحبيبتي مش محتاجة تقولي، كل حاجة باينة في عيونك.
قربت منه وقولت بتريقة:
-‏لا واللهِ؟ وايه باين بقا يا أستاذ غيث؟
غمز وقال:
-‏شايفني جواهم أهو.
-‏هما مين دول؟
-‏عيونك يا كوكو في ايه مالك توهتي كدا ليه؟
بعدت عنه بعد ما اكتشفت إني سرحت فيه، الله يخربيت كدا، بريستيجي ضاع، كمل وقال:
-‏هو مين بريستيجك دا؟
ضحكت وقولت:
-‏اللعين؟
ضحك لما فهم قصدي وقال:
-‏اللعين.
-‏لا بقا لا بقا لا بقا، بينا نعمل حاجة حلوة حالا بالا وتقرألي رواية هالحين زي بودي.
ضحك وهو بيقول:
-‏اللعنة أنا لست بودك.
-‏يعجبني فيك إنك فاهمني كدا وماشي معايا على الخط، تعامبوسك بقا.
-‏آجي مجيش ليه.
-‏تيجي فين يلا أنا بهزر أقسم بالله.
-‏معندناش حريم بترجع في كلامها لأ.
-‏يا غيث يا حبيبي اهدى بالله عليك، أنا عيلة، هتاخد بكلام عيلة؟
-‏أيوة أنا كمان عيل ولا تزعلي.
فتحت الباب وقولت قبل ما أجري منه:
-‏أنا نازلة عند حماتي الست الغلبانة الطيبة.
سمعت صوته من ورا الباب وهو بيضحك وبيقول:
-هبلة بس بحبها.
قولت بصوت عالي عشان يسمع:
-سمعتك على فكرة، وبحبك يلا واللهِ ومش هقولك تعامبوسك تاني لأ تُوبت.

"كنت أنا يومًا ما، لكن الآن كلي أنت."
#كيان_الغيث
#أروى_إيهاب