-أنا محدش عارف يفهمني.
-حاولي معايا وخليني أفهمك.
-مش هينفع، وجودك هنا هيتعبك.
-أنا عايز أفضل هنا، دا اختياري.
-ودا قراري، حياتي مينفعش أشاركها مع حد.
-جربي، مش هتخسري حاجة، بل يمكن تكسبي.
-وهكسب ايه؟
-نفسك، وشريك حياة يمكن؟
-هييجي اليوم اللي تزهق فيه وتسيبني زيهم.
-كنت زهقت ومشيت من زمان يا كيان، لكن أنا حابب وجودي هنا، حابب أكون معاكِ.
-ليه؟
-يمكن لأني بحبك مثلا؟
-الحب مش كفاية، الحب بيهدم حاجات كتير.
-إنتِ ليه بتهربي من الحقيقة؟ إنتِ بتحبيني وأنا بحبك، ليه مانعة نفسك عن إنك تعيشي حياة طبيعية زيك زي أي بنت؟ ليه بتكابري وعايزة تفضلي في دايرة الحزن دايما؟
دموعي خانتني للمرة الألف ونزلت:
-أنا خايفة، خايفة أتساب تاني لوحدي، خايفة الأذى يصيبني زي ما هو دايما بيصيبني، وأنا لوحدي تعبانة، لكن تعبي لوحدي بعيد عن البشر هيكون أهون لما يكون التعب بسببهم، أو بسببك إنت يا غيث.
-وأنا عمري أذيتك يا كيان؟
بصيت في عيونه، كانت عيونه بتسألني، هو عارف الرد رغم إني مقولتوش، عارف إن هو أكتر شخص عمره ما هيفكر يأذيني ولو بكلمة، عارف إن هو الشخص الوحيد اللي برتاح وأنا معاه بعيد عن البشر، لكني خايفة، خايفة الدنيا متفضلش وردية، والحياة تنتهي بيننا، خايفة ميكُنش هو اختياري المناسب، مش يمكن هو مش نصيبي؟
-ممكن تتكلمي معايا؟ تخرجي كل اللي جواكِ؟
غمضت عيوني، أخدت نفس عميق، اتكلمت وكأني بكلم نفسي:
-أنا أوقات كتير بحسني غريبة، ممكن في لحظة أضحك وبعدها أعيط، ممكن أكون متفائلة جدا وفي ثانية أشوف العالم كله باللون الأسود، بيشوفوني دايما إني باردة ومش باخد رد فعل، لكنهم ميعرفوش إني عمري ما كنت كدا، عمري ما كنت هادية، أصوات عقلي عمرها ما كانت هادية أبدا، وقت ما تحتاج نصيحة هتلاقيها، وقت ما تحتاج حد يسمع هتلاقيني، وقت ما تحب تتجنن هتلاقيني أكتر شخص مجنون، وقت ما هتحب تشوف شخص عاقل هتلاقيني أعقل من ناس كتير، مترددة دايما وبخاف آخد القرار الغلط، لكن أحيانا باخد قرارات بسرعة ومتهورة، وفي معظم الأوقات باخد قرارات عشوائية جدا، أنا جوايا كذا كيان مش كيان واحدة بس، جوايا ألف شخص، كلهم عكس بعض، أنا أكتر شخص متناقض في الدنيا، أنا صعب حد يفهمني، صعب حد يفضل معايا ويكمل.
-أنا معاكِ، وهفضل دايما معاكِ، وهنحاول سوا، ينفع؟
-صعب يا غيث، صعب، أنا كل اللي بيقرب مني بيسيبني ويمشي، مش بيكمل، كلهم بيبعدوا عني، أنا شخص غير صالح للحب، غير صالح للعلاقات، مينفعش أبدا أقرب من حد لأنه هيتأذي مني، وأنا مش هستحمل في يوم إنك تأذيني، مش هستحمل في يوم أشوف نظرة الكره في عيونك ليا، مش هستحملها أبدا يا غيث.
-لو الأذى منك فأنا هستحمله بكل حب الدنيا، إنتِ يا كيان مقتنعة إنك انسانة مؤذية لأنك إنتِ اللي اتأذيتي مش أذيتي غيرك، ربنا وقعك مع ناس كانوا هما اللي بيأذوكي، وعشان يداروا أذاهم دا قالوا إنك إنتِ المؤذية، وأكبر دليل على كلامي إني عمري ما اتأذيت منك، لو في أذى وحيد إنتِ كنتِ السبب فيه هو إنك دايما كنتِ بتخليني بعيد.
-لأني خايفة.
-طب ما تسمحيلي أكون جمبك، أشاركك خوفك، نتغلب عليه سوا، ونكمل حياتنا بكل بساطة، نكملها سوا، ملناش غير بعض، ومش عايزين غير بعض، لأننا فعلا لبعض.
-وتفتكر هنقدر؟
-طول ما الحب موجود هنقدر نتغلب على كل المشاكل.
-الحب هو العلاج؟
-بالحب هنقدر نكمل، وهنقدر نتعافى، وهنقدر نتغلب على مشاكلنا، إنتِ بس محتاجة تتحبي.
-محتاجة أتحب!
-ومش هتلاقي حد يحبك قدي ولا زيي.
"كنت أنا يومًا ما، لكن الآن كلي أنت."
#كيان_الغيث
#أروى_إيهاب
