လျင်သူစားစတမ်း(ဘာသာပြန်){WTA}[Completed]

Chapter 94 Extra 2(Uni+Zawgyi)

Unicode

ဤနှစ်၏ တရုတ်နှစ်သစ်ကူးက ယခင်နှစ်များထက်စောသည်။ ခရစ္စမတ်နှင့် လဝက်လောက်သာ ဝေးတော့သည်။ လီရှော့နှင့် ကျောက်ကျင်ရှင်းက မိသားစုများနှင့်ပြန်လည်ပေါင်းစည်းနိုင်အောင် အားလပ်ရက်ကြီးကြီးမားမားယူကြဖို့ ဆွေးနွေးဖြစ်ခဲ့ကြ၏။

လီရှော့၏ ရုံးခန်းအသစ်က ခုမှစတင်ရုံရှိသေးသည်မို့ လုပ်ငန်းက မကျယ်ပြန့်သေးသလို နှစ်ကုန်ပိုင်းမှာ သိပ်လည်း အလုပ်မရှုပ်ပေ။ အန်းနန်ကတော့ မတူ။ နှစ်ကုန်ပိုင်းရောက်လေ အလုပ်တွေပြုံကျလာလေပင်။ ကျောက်ကျင်ရှင်းမှာ အလွန်တရာ အလုပ်ရှုပ်လို့နေပြီး သူတို့နှစ်ယောက်မှာ ခရစ္စမတ်မတိုင်ခင် အားလပ်ဖို့ဆိုသည်မှာ မဖြစ်နိုင်သလောက်ပင်။

လီရှော့သည် ကြည့်ရတာ စိတ်မချမ်းမြေ့၍ ဘဏ္ဍာရေးရာကိစ္စအတော်များများကို ကူညီတာဝန်ခွဲယူပေးလေသည်။ပထမတော့ လီရှော့သည် သူတို့နှစ်ယောက်မှာ ကိုယ်စီအသက်မွေးဝမ်းကြောင်းလုပ်ငန်းတွေရှိကြတာ ကောင်းသည်ဟု တွေးခဲ့မိသည်။သို့သော်လည်း ဘာကြောင့်ရယ်မသိ၊ အချိန်ကြာလာသည်နှင့် သူဟာ အန်းနန်ရုံးခွဲ၏ မမြင်ရသော ဘဏ္ဍာရေးဒါရိုက်တာတစ်ယောက် ဖြစ်လာတော့သည်။အနည်းဆုံးတော့ ကျောက်ကျင်ရှင်းဟာ ငွေရေးကြေးရေးပမာဏကြီးကြီးတွေ ဆုံးဖြတ်ရသည့်အခါ သူ့ထံသို့သာ လွှဲပြောင်းပေး၍ ကိုင်တွယ်ဖြေရှင်းခိုင်းလေသည်။

ကျောက်ကျင်ရှင်းက သူ့အား မခြွင်းမချန်အလုံးစုံသော ယုံကြည်မှုကိုပြနေမှန်း လီရှော့နားလည်သည်။ ထို့ကြောင့်ပင် လီရှော့က ကျောက်ကျင်ရှင်းဟာ သူ့အား လစာမပေးဘဲ ငှားနေသည်ဟု ရံဖန်ရံခါ စနောက်တတ်သေးသည်။အလုပ်ကိုတော့ သူ့အသက်မွေးဝမ်းကြောင်းလုပ်ငန်းထက်ပင် လေးလေးနက်နက်လုပ်ပေးလိုက်သေး၏။

ဤနေ့မှာတော့ လီရှော့ဟာ ဘဏ္ဍာရေးဋ္ဌာနနှင့် အစည်းအဝေးထိုင်ပြီးနောက် ကျောက်ကျင်ရှင်းထံ စာရွက်စာတမ်းတို့နှင့်အတူ ထွက်လာခဲ့လိုက်သည်။

သူ တံခါးကိုနှစ်ခါမျှခေါက်လိုက်သည်။ သို့သော် အတွင်းက ဘာတုံ့ပြန်မှုမှ မရှိချေ။ ထို့ကြောင့်ပင် သူက တံခါးကို တွန်းဖွင့်ကာ ဝင်လာခဲ့လိုက်တော့သည်။