အခန်း ၆ အပိုင်း ၁
ဘုတ်!
ကျယ်လောင်သော အသံနှင့်အတူ ရှောင်းယိုနဥ်တစ်ယောက် နူးညံ့ပျော့ပျောင်းသော ထိုင်ဖုံတစ်ခု၏ပေါ်သို့ ပြုတ်ကျသွားသည်။ ဖြစ်ပျက်နေသည်များကို သူမ နားမလည်နိုင်သေးခင်မှာပင် ယဲ့ရှန်းက အထဲကို ဝင်လာသည်ကို သူမ တွေ့လိုက်ရသည်။ သူက ထိတ်လန့်တကြားဖြစ်နေသော သူမနှင့် သိသိသာသာ ဆန့်ကျင်ဘက်ဖြစ်နေကာ ငြိမ်သက်နေပုံရပြီး အေးအေးဆေးဆေး ထိုင်ချလိုက်သည်။
ဟုတ်တယ်၊ တကယ်တော့ ထိတ်လန့်မိတဲ့အတွက် သူမကို အပြစ်တင်လို့ မရပါဘူး၊ အဖြစ်အပျက်တွေက မျက်စိတစ်မှိတ်အတွင်းမှာပဲ ဖြစ်ပျက်ခဲ့တာလေ။
ရထားလုံးက ထိုနေရာသို့ စဝင် ဝင်ရောက်လာသည့်အချိန်မှ စ၍ ပြန်ထွက်ခွာသွားသည့် အချိန်အထိ လုံးဝ မရပ်ဘဲ ဝိုင်းရံနေသော လူအုပ်ကြီးကြားထဲမှ မြှားတစ်စင်းကဲ့သို့ အရှိန်ပြင်းပြင်းဖြင့် ပြေးထွက်သွားခဲ့သည်။ ရထားထိန်း၏ လျင်မြန်မှုနှင့် လိုက်ပါစီးနင်းသူ၏ သွက်လက်မှုက အလွန်ကောင်းမွန်နေသည်။
ယွမ်ကော်က သူမ၏သခင်မလေးနောက်ကို လိုက်ရန် အသည်းအသန်ကြိုးစားခဲ့ပြီး နောက်ဆုံးအခိုက်အတန့်တွင် အရှိန်ပြင်းပြင်းဖြင့် ပြေးနေသော ရထားလုံးဆီသို့ ခုန်ဝင်လိုက်သည်။ သူမ၏ ခန္ဓာကိုယ် တစ်ဝက်က လှည်း၏ နံဘေးတွင် ချိတ်ဆွဲမိသွားပြီး ခြေထောက်များက တွဲလောင်းကျနေကာ သူမကို အညှာမတာစွာ ဆွဲငင်ခံလိုက်ရသည်။ သို့သော်လည်း သူမက သူမ၏ အသက်ကို ဂရုမစိုက်ဘဲ အားတင်းကာ သူတို့နှင့်အတူ လိုက်ပါသွားသည်။
သူမ ခေါင်းကို လှည့်ကြည့်လိုက်ချိန်တွင် နောက်မှ လိုက်လာသောသူများက သူမ၏ ခြေဖနောင့်နားတွင် နီးနီးကပ်ကပ် ရှိနေသည်ကို သူမ တွေ့လိုက်ရသည်။ သို့သော် ရထားလုံးက လျှပ်စီးကြောင်းကဲ့သို့ ရွေ့လျားနေပြီး သူတို့ကို အမီလိုက်ရန် ခက်ခဲစေခဲ့သည်။ သိပ်မကြာခင်မှာပင် ထိုလူများ၏အော်ဟစ်သံများက လျော့ပါးလာပြီး တဖြည်းဖြည်း တိုးဝင်ပျောက်ကွယ်သွားကာ နောက်ဆုံးတွင် မြင်းခွာသံများနှင့် တကျွီကျွီမြည်နေသော ဘီးသံများကိုသာ အစားထိုး ကြားနေရတော့သည်။
YOU ARE READING
ဒုတိယအကြိမ်...လက်ထပ်ခြင်း
Historical FictionMyanmar Translation of China Web-Novel "Second Marriage" English Title : Second Marriage Original Authors : 喵蓝 English Translators : https://www.novelupdates.com/group/wordrain/ Episode : 66...