رقدت نومة بعد وجع كي تضت لقيت ريمة قاعدة شاعلة التيلي تتفرج ، قعدت قتلها مزالك هنا شاورتلي على السرير قاتلي من اليوم راح نولي أنا وياك في شمبرة وحدة نونسك . قتلها اصيل لي قالك ضحكت قاتلي ايه هو وجابلي قبيل السرير تاعي هنا . تنهدت وقفت جيت داخلة للدوش لقيتها لاحقتني شفت معاها منيتك راح تدخلي معايا للدوش قاتلي هو وصاني أنا خاطيني تحوسي يقتلني لبارح غير كي مرضتي ومافقناش قريب وصلت كبيرة معاه . قتلها وش دخلني فيكم كيفاه هادي تدخلي معايا للدوش وين صارت هاذي كي يسقسيك اكذبي عليه وصاي ياك ما عندو وين راح يشوفك . قضيت صوالحي وخرجت لقيتها جابتلي غدايا قعدت كليت شوي صونا تلفوني كي شفتوا لقيتوا عليلو عيطلي 22 مرة وانا ما فقتش بيه كوبيت عليه ودرتو سيلونس ياك مزال سمانتين و نروح عندو حتى يكره من جدي علاه راه يعيط غير تفكرت قنطت يا ربي فرجها عليا بقيت قاعدة مع ريمة حتى جات مرت خالي قاتلي راكي نايضة خطيبك جا يشوفك قتها علاه جا هدا قاتلي راه يقول يعيطيك متهزبش عليه . بدلت وهبطت عندو لقيتوا قاعد مع خالي في الصالة قدم راه يسلم عليا بعدت خالي في بالوا حشمت منو قالي نخرج نخليكم براحتكم . خرج قالي عليلو علاه راني نعيط من الصباح وانتي متهزيش كلب عندك أنا . كنت راح نقولوا كلب وستين كلب . قتلوا مكانش عيني نهدر وش سحقتي قالي توحشتك قتلوا راه مزال سمانتين وتلقاني في دارك كل يوم وجهي مقابل وجهك علاه متوحشيني قالي جوليا علاه راكي تهدري معايا هكدا قتلوا نهدر كيما نحب ياك درتلك لي حبيت درك متسالنيش كيفاه نهدر قالي وش قصدك بيها الهدرة هادي قتلوا انت علابالك وانا علابالي علاه قبلت بيك ملا مطمعش روحك بلي راح نعيش معاك نورمال أنا نكرهك ونكره الساعة لي شفتك فيها باه يكون في علمك عمري ما راح نحبك بسبابك راني كل يوم نعاني . جا راح يمد يدو بحكمني عيطت عليه قتلوا بعد يدك عليا متحطش يديك لموسخين عليا فهمت . قالي علاه راكي تعيطي متخلينيش نجهل عليك جوليا أنا نحبك وراح تحبيني بسيف عليك فهمتي قتلوا منحبكش وعمري ما نحبك انت مش تحبني انت مهووس بيا بسيكوبات مريض روح داوي روحك . قالي معليش مزال سمانتين ونشوفو ادا تبقاي على نفس هدرتك ولا لا . وخرج قعدت طلعت لشمبرتي لقيت ريمة قاعدة كنت محتاجة صح حاجة تكالميني قتلها انتي مش راح تخرجي من شمبرتي قاتلي راني قتلك بلي راح نبقى معاك حبيت نجبد السيرانق والدوا من الخزانة ونديرهم في توالات بصح خفت تفيق بيا قتلها صحا اخرجي نبدل قشي قاتلي هزي قشك وروحي بدلي في الدوش عيطت عليها قتلها متفهميش قتلك اخرجي راح نبدل بقات تشوف معايا بشك من بعد قاتلي معليش راني خارجة علاه راكي تعيطي . غاضتني لي عيطت عليها بصح صح كنت محتاجة حاجة تكالميني باه تفهموا الوقت هذا كان وقت قريب المغرب كانوا كل في الدار بيسك هما يتعشوا. ورا المغرب . المهم هيا خرجت وانا. قفلت الباب هكاك برك بيسك كان مكسر من المرة لخرة . جبدت السيرانق والدوا بالخف مع هزيتهم في يدي دزت ريمة الباب ودخلت لقاتهم في يدي شافت معايا قاتلي جوليا وش هدا لي في يدك خبيتهم ورا ظهري قتلها والوا قدمت عندي تحوس تجبد يدي من ورأيا باه تشوف وش فيها دزيتها قتلها قتلك والوا متفهميش قاتلي وش في يدك جوليا راني شفتك وش راكي هازة راكي تدروقي هبلتي قتلها لالا مش كيما راكي فاهمة هذا دوا . عادت تبكي قاتلي وش من دوا تحسابيني منعرفش أصلا اصيل عندو الحق هو شك فيك هو قالنا راني شاك فيها راهي تشرب في دوا مش مليح عسوها متخلوهاش وحدها وانا قتلوا مكانش منها ومصدقناهوش كامل . وانتي ظهرتي تضربي في الهروين تحسابيني منعرفش درك نهبط نقولو كلشي وخرجت تجري شمبرتي أنا في ليطاج الاول رميت من يدي ولحقتها قبل ما تهبط لتحت وتفضحني حكمتها في راس الدروج كانت راح تهبط حكمتها كانوا كامل لتحت ودروج وين وقفنا تبان بيسك كانوا قاعدين في الاوول تاع الدار حكمتها قتلها ريمة اصبري نفهمك ونخبرك كلشي أنا اختك متقولي لحتى واحد تعيشي ريمة قاتلي لالا لازم نقول لأصيل هو وصاني مستحيل نخليك تديري في روحك هكدا قتلها لالا متقوليلوش علابالي يرميني في السبيطار علابالي مستحيل واحد يقبلني بحالتي هادي ياك مزالني سمانتين ونروح ومتزيدوش تسمعوا بيا خلاص تعيشي ريمة خليني نفوت هاد السمانتين ونوعدك نحبس تعيشي قاتلي لالا اصيل يحبك مستحيل يرميك في السبيطار لازم نقولوا وانتي أصلا مستحيل تقدري تحبسي منيش صغيرة تحشيلي بزوج كلمات جوليا لازم نقولهم جوليا في مصلحتك دارت راح تهبط وانا حاكمتها من دراعها جبدت روحها عليا وتقولي اطلقيني وانا حاكمتها ومتعافرين ونتعايطوا في زوج هيا حابتني نطلقها وهيا حابة تهبط تولهولنا كامل يشوفوا معانا مفهمتش كيفاش تغمضوا عينيا من الخوف دزيتها من فوق الدروج طاحت تكركب حتى وصلت للأرض . هنا معلاباليش اسكوا أنا لي دزيتها ولا هيا طاحت وحدها بيسك كان مسيطر عليا الخوف والمونك المهم في هذيك اللحظة ما فقتش مع روحي حتى نسمع في العياط التحت ونشوف فيها رأسها كامل دم لا حركة لا كلمة بقيت واقفة نشوف كاني كنت غايبة عن الوعي أنا مستحيل نأذي ريمة أنا نحبها ريمة مستحيل نخمم نهار نأذيها .
