ចាញ់ស្នេហ៍ភរិយាសម្អប់

ភាគទី៤៥ (តចប់)

“បើអស់អីហើយ ខ្ញុំសុំទៅវិញមុនសិនហើយ”
“បាទ”ដានីលងក់ក្បាលឆ្លើយតប ។ វីលញញឹមដាក់នាយបន្ដិច ក៏ឆ្លៀតចោលភ្នែកទៅកាន់អេរ៉ានជាលើកចុងក្រោយ មុននឹងបង្វែរខ្លួនចាកចេញ ។

“ខ្ញុំវីសតែហ្នឹងភ្លេច នេះទូរស័ព្ទរបស់អេរ៉ាន ខ្ញុំប្រគល់វាឱ្យទៅលោកទុកឱ្យនាងទៅចុះ”បម្រុងនឹងចេញទៅហើយ ក៏នឹកឃើញថាទូរស័ព្ទអេរ៉ាននៅនឹងគេនៅឡើយ ទើបគេហុចទៅដានីល ទុកឱ្យនាងជំនួសវិញ ។ ដានីលមិនបាននិយាយអ្វី ក៏លូកដៃទទួលទូរស័ព្ទពីវីល មុននឹងតាមមើលរហូតដល់គេចេញផុត ។

វីលចេញទៅមិនបានប៉ុន្មាន ដានីលក៏ចាកចេញទៅដែរ ព្រោះមិនចង់រំខានពេលប្អូនសម្រាក ម្យ៉ាងគេក៏នៅមានការងារផ្សេងត្រូវធ្វើ មិនបាននៅកំដរនាងជាប់លាប់ទេ ។

@ភូមិគ្រឹះ ឆូ

ទឺត! ទឺត!...
“ឡានី! ឆាប់ទៅទទួលទូរស័ព្ទទៅ” ទូរស័ព្ទលើតុស្រាប់តែរោទ៍ឡើង លោកស្រីផារីនងាកទៅប្រាប់ឡានីដែលកំពុងជួយគាត់ធ្វើដំណាប់ផ្លែឈើទុកសម្រាប់យកទៅផ្ញើរកូនស្រី ត្បិតគាត់មានបំណងថានឹងទៅលេងនាងនៅឯផ្ទះល្ងាចនេះផង ។

ឡានី កាលបើចៅហ្វាយបញ្ជា នាងក៏ម្នីម្នារត់ចេញពីផ្ទះបាយទៅបន្ទប់ទទួលភ្ញៀវ ដើម្បីលើកទូរស័ព្ទជំនួស ៖

«ហាឡូ! ជម្រាបសួរចាស៎»
(ឡានីមែនទេ? អ្នកមីងនៅផ្ទះដែរទេ?)
«ចាស៎! លោកស្រីនៅតើលោកគ្រូពេទ្យ»
(ខ្ញុំសុំជួបគាត់បន្ដិច)
«ចាសបាន! សូមចាំបន្ដិច» ឡានីទុកទូរស័ព្ទមួយឡែក រួចរត់ទៅផ្ទះបាយវិញដើម្បីប្រាប់លោកស្រីផារីន ។

“លោកស្រី! គឺលោកគ្រូពេទ្យដានីលខលមក ហើយគាត់ចង់និយាយជាមួយលោកស្រី”
“ហ៊ឹម! យើងដឹងហើយ” គាត់ងក់ក្បាលបន្ដិច ទើបប្រញាប់ប្រញាល់លាងសម្អាតដៃដែលប្រឡាក់ មុននឹងចេញទៅនិយាយទូរស័ព្ទជាមួយដានីល ។

«មានអ្វីចង់និយាយជាមួយមីងហ្ហេស៎ដានីល?»
(គឺពេលនេះអេរ៉ានកំពុងសម្រាកព្យាបាលនៅមន្ទីរពេទ្យ ខ្ញុំចង់ឱ្យអ្នកមីងអាចមកកំដរនាង)
«ថាយ៉ាងម៉េច? អេរ៉ាននៅមន្ទីរពេទ្យ?» អ្នកជាម្ដាយ ស្លុតចិត្តមិនស្ទើរពេលដឹងដំណឹងកូនស្រីចូលមន្ទីរពេទ្យបែបនេះ ។
(បាទ! មែនហើយ)
«ចុះឯងមានខលប្រាប់ថេយ៉ុងហើយឬនៅ?»
(នៅទេអ្នកមីង!...)
«អ៊ីចឹងមិនអីទេ! ប្រហែលកន្លះម៉ោងទៀតមីងទៅដល់ហើយ»
(បាទ! ជម្រាបលាអ្នកមីង)