ဝိညာဥ်​ရေးရာအပင် ဆရာသခင်အဖြစ် ကူး​ပြောင်းလာခြင်း

Chapter 108: Come back home

Unicode

“ရှောင်သခင်လေး မင်းဘယ်သွားမလို့လဲ” အိုးယန်မင်ယွဲ့က ရှောင်ကျင့်ထျင်ကို တားပြီးမေးလိုက်သည်။

“ခဏတာ အနားယူဖို့ နေရာရှာရမယ်” ရှောင်ကျင့်ထျင်က မရေမရာသာ ပြောလိုက်သည်။

“မင်းက ချီကျင့်ကြံဆင့်ရဲ့ နဝမအဆင့်ရောက်နေပြီဆိုတော့ အုတ်မြစ်ချအဆင့်ကိုတက်ဖို့ ပြင်ဆင်နေသင့်တယ်” အိုးယန်မင်ယွဲ့က ပြောသည်။

ရှောင်ကျင့်ထျင် ခဏလောက်အံ့အားသင့်သွားပြီး “အိုးယန်သခင်မလေးက နောက်နေတာပဲ၊ ကျွန်တော့်ရဲ့ အရည်အချင်းက အကန့်အသတ်ရှိပါတယ်။ ကျွန်တော်က အုတ်မြစ်ချတည်ဆောက်ခြင်းဆေးလုံးကို မဝယ်သုံးနိုင်ဘူး၊ ဒါကြောင့် အုတ်မြစ်ချအဆင့်ကိုတက်ဖို့ခက်လိမ့်မယ်”

အိုးယန်မင်ယွဲ့က သံသယအနည်းအကျဉ်းဖြင့် ခေါင်းညိတ်လိုက်ပြီး “ရှောင်သခင်လေးက အရမ်းအဖိုးတန်တဲ့ ဝိညာဉ်ဆေးပင်နှစ်ပင်ကို ဆက်တိုက်ဝယ်ယူခဲ့တာကို ငါမြင်ခဲ့တယ်။ ရှောင်သခင်လေး မင်းက အဂ္ဂိရတ်ပညာရှင်လား?”

ရှောင်ကျင့်ထျင်မှာ နှလုံးများခုန်လာခဲ့သည်။ အိုးယန်မင်ယွဲ့က တော်တော်လေး သတိထားနေခဲ့၏။ အကယ်၍ အိုးယန်မင်ယွဲ့သည် ဤအရာများကို တွေးတောနိုင်လျှင် အခြားသူများလည်း သံသယဖြစ်လာနိုင်ဖွယ်ရှိသည်။ ရှောင်ကျင့်ထျင်သည် ခဏတာတံခါးပိတ်ကျင့်ကြံရန်စိတ်ကို တေးထားလိုက်သည်။

“ဘယ်လိုလုပ်ဖြစ်နိုင်မှာလဲ? တချို့ဆေးတွေကို သန့်စင်နိုင်ပေမယ့် အဆင့်မြင့်ဆေးတွေ မဟုတ်သေးပါဘူး။ အဆင့်မြင့်အဂ္ဂိရတ်ပညာကိုလေ့ကျင့်ဖို့ ဒီဝိညာဉ်ဆေးပင်နှစ်ပင်ကို ကျွန်တော်ဝယ်ခဲ့တာပါ” ရှောင်ကျင့်ထျင်က ပြောသည်။

အိုးယန်မင်ယွဲ့က ခေါင်းညိတ်ပြီး “ဒါ့ကြောင့်ကိုး!”

“ရှောင်သခင်လေး၊ အုတ်မြစ်ချတည်ဆောက်ခြင်းဆေးလုံးကို သန့်စင်ဖို့အတွက် မင်းဝယ်ထားတဲ့ ဝိညာဉ်ဆေးပင်နှစ်ပင်လိုတယ်လေ။ ဒါကြောင့် မင်း အုတ်မြစ်ချတည်ဆောက်ခြင်းဆေးလုံးကို သန့်စင်တော့မယ်လို့ ငါထင်လိုက်တာ” အိုးယန်မင်ယွဲ့က ပေါ့ပေါ့ပါးပါးပြောလိုက်သည်။