اقتباس
همس بصت لخلود قوي وركزت معاها لقتها مندمجة تماما في مذاكرتها وهنا الغيرة زادت في قلبها خلود مش بس بتنافسها في دراستها دي بتنافسها في كل حاجة واولها سيف ، عايزة سيف يشوفها زي ما شافها هي قبلها ، هي متخيلة ان سيف اتشد لهمس بس علشان مركزها كأولة الدفعة ، لقت نفسها بتكتب لسيف (( هو انت حبتني علشان انا كنت الاولى ؟))
استغرب جدا رسالتها (( انتي بتتكلمي بجد ؟ همس سؤالك ده بجد ولا هزار ؟ ))
كتبت بتردد (( بجد ، عايزة اعرف ليه حبتني ؟ ))
اتنهد وفضل باصص لموبيله محتار يكتب ايه ولا يكلمها ولا يفضل ساكت ؟ اي علاقة هينهيها وهو بيكلمها كل يوم بالشكل ده ؟ ده كده مش انفصال ابدا ، ده مجرد نوع من انواع العذاب اللي بيعذبوا بعض بيها كل يوم .
بعتت هي علامة استفهام وهو كتب (( حبيت البنت اللي بهدلت قميصي وخلتني لابس جاكت البدلة طول اليوم وانا هموت من الحر ، حبيت اللي وقفت في وشي وقالتلي اخبط دماغك في اتخن حيط قدامك ، حبيت اللي وقفت في وش الدكتور بتاعها وقالتله انت هنا مجرد شخص عادي وبتضايقني فابعد عن وشي ، حبيت كتير قوي يا همس لكن كونك اولى الدفعة او لا ده ماجاش في بالي بس ما يمنعش انه مخليني فخور بيكي وعايز فخري ده يستمر حتى لو مش معايا ))
كتبت وهي مبتسمة (( انا عمري ما قولتلك ابعد عن وشي ))
ابتسم وكتب (( قولتيها كتير جدا يا همس ولو مش بالكلام فبالاشارة او بالفعل ))
كتبت (( لو اشوفك دلوقتي مش هقولك ابدا ابعد عن وشي بالعكس هدفن نفسي في حضنك ))
بعتتها وهو قراها وقلبه نبض بعنف
#شيمووووو
