حكمنا الهوى (٢٥)
بقلم : الشيماء محمد احمد
#شيموووو
الرواية حصري لجروب شيمووو و ممنوع نشرها طوال فترة الحصري .
راقبها وهي بتبعد مع أخواتها و وقف بجمود مكانه لحد ما اختفت وانتبه لصوت عمار بيسأله : انت كويس يا ابني ؟
بصله بانتباه : اه بخير بعد إذنكم .
سابهم وراح أوضته ؛ يحاول يحلل اللي بيحصل أو يفسره أو يفهم ايه الخطوة الجاية؟ بس ولا عارف يفكر ولا عارف يحلل ولا عارف حتى يعيش .
ملك في العربية مع أخوها وأختها في صمت تام وكل واحد غارق في أفكاره الخاصة لحد ما وصلوا البيت وداخلين كلهم بصمت ، خالد اتفاجئ بيهم ويادوب هيتكلم بس ملك طالعة على أوضتها لكن فايزة وقفتها تطمن عليها لأنها ملاحظة دموعها اللي بتحاول تكبتها .
خالد بص لابنه بقلق: في ايه يا نادر وأختك مالها ؟ وكلكم مالكم أصلا عاملين كده ليه ؟
نادر بصله وما صدق انفجر : في ان البني آدم الغبي ده مش عارف أنا ماله ؟ مش قادر أفهم ايه سر العداء اللي جواه ده ؟
خالد بعدم فهم : بني آدم مين ؟ بتتكلم عن مين ؟
جاوبه بعصبية: دكتور زفت .
خالد فهم انه بيتكلم عن دكتور نادر ؛ لأنه لاحظ معاملتهم لبعض فسأله بتعجب: أنا مش عارف انت ليه حاطه في دماغك ؟
رد بغيظ : ويطلع مين هو أصلا علشان أحطه في دماغي ؟ بس هو اللي معاديني - بص لملك بغيظ وكمل -أنا نفسي أفهم انتي ايه اللي عجبك في البني آدم ده ؟ وسط كل الناس اللي بنتعامل معاهم ده يا ملك ؟ نفسي مرة تختاري صح .
ماردتش عليه وفضلت باصة قدامها بجمود ، خالد ابتسم وبص لفايزة اللي ابتسمت هي كمان ان شكوكها صح وان ملك معجبة بيه بس انتبهوا لنادر بيكمل زعيقه فيها : ردي عليا ، اشمعنى ده بالذات ؟
بصتله بدموع بتهدد بالنزول : ماله ده ها ؟
بصلها بغضب : غبي ، بني آدم غبي وحاقد وكاره كل اللي حواليه ، من يوم ما روحنا المستشفى وهو بيكرهنا ، نفسي أعرف بيكرهنا ليه ؟ كل شوية بيتهمنا ، مرة مش بنحب أبونا ودلوقتي مش بنحبك انتي ؟ ده بني آدم حاقد ، بيكره الطبقة بتاعتنا ، هو دكتور وطالع عينه وأي حد غني بيبصله بحقد وكره .
استنكرت بدفاع: هو عمره ما كان حاقد ولا عنده الطبقية دي .
زعق قصادها : امال تفسري معاملته دي بايه ؟
برضه ملك ساكتة ومش بترد فكمل : ماهو طالما معجبة بيه يبقى بتتكلمي معاه وطالما بتتكلمي معاه يبقى انتي عارفة هو بيتصرف كده ليه ؟ فهميني بقى هو بيتعامل كده ليه؟ بيكرهنا ليه أو بيكرهني أنا تحديدا ليه ؟
حاولت تدافع عنه : معرفش وبعدين انت اللي عندك الإحساس ده هو ...
قاطعها بغيظ : هو ايه ؟ بتلككله مثلا ؟ بتبلى عليه ؟ مش قدامكم اتهمنا اننا مش بنحب بابا ؟ ومش قدامكم اتهمني بمثل اني خايف عليكي ؟ ايه بقى ؟
ملك برضه ساكتة وهو صمم : فهميني يا ملك هو بيتعامل كده ليه ؟ بينا وبينه ايه ؟
ملك حركت راسها بتعب : معرفش ، معرفش يا نادر معرفش ، أنا مش عايزة أتكلم عنه اقفل بقى قصته .
نادر علق بتهكم : وأنا لما أقفلها وما أتكلمش فيها هتبقى اتقفلت كده ؟ ملك - بصلها بتحذير - انتي عارفة وساكتة فقوليلي دلوقتي ايه سر العداء ده ؟
ملك زعقت : قلتلك معرفش .
فايزة اتدخلت في الحوار بتردد : أنا عارفة .
كلهم بصولها باهتمام وخصوصا جوزها اللي سألها بدهشة: انتي يا فايزة ؟ عارفة ايه وازاي ؟
بصتله بتوتر : عارفة ليه الدكتور نادر رد فعله بالشكل ده وليه بيهاجم على طول ؟
نور قربت منها باهتمام : انتي يا ماما ؟ طيب قولي ليه بيكرهنا كده ؟
فايزة بصتلهم بتردد وبصت لملك اللي محتارة زيهم وساكتة فنادر زعق بحنق: ما تقولي يا ماما في ايه ؟
بصت لابنها بتوتر : هو أنا مش متأكدة أوي بس شاكة انه ممكن بيعاملنا كده علشان الفكرة اللي انتي وصلتيها عننا .
- كلامها كان موجه لملك -
نادر بص لأمه بحيرة : فكرة ايه يا ماما ؟ تقصدي ايه ؟
ملك بصت لفايزة مش فاهمة هي بتتكلم عن ايه ؟ اتكلمت هي كمان بحيرة : جاوبي يا ماما فكرة ايه اللي وصلتها ؟
اتكلمت بتردد وهي بتنقل نظراتها بين عيلتها : مش قلتيله انهم مش أخواتك وانهم ولاد أبوكي بس واني مش أمك ؟ وقلتيله ان أختك متجوزة أخو خطيبك وأخوكي متجوز من صاحبة مرات خطيبك ؟ مش طلعتينا كلنا مش بنحبك وبنحطك في أوضاع صعبة ؟
نادر بص لأمه بصدمة ومش مصدق اللي سمعه : ده امتى كل ده ؟ مين قالك انتي الكلام ده ؟
فايزة علقت بقلق: يوم ما أبوكم تعب ، كنت قريبة منها وكنت عايزة أروح آخدها في حضني علشان ما تحسش انها لوحدها لما أبوها وقع بس شوفتها واقفة معاه وبتتكلم فقلت لما تخلص كلامها معاه وتطمن منه ، بس اتصدمت من الكلام اللي بتقوله ، كنت عايزة أفهم بتقوله كده ليه ؟بس حالتي ماكانتش اني تسمح أفكر في حاجة غير أبوكم فقلت خلاص خليها تفضفض معاه شوية وبعدين أبقى أفهم هي ليه قالتله كده ؟ أبوكم اتحسن الحمد لله والأمور مشيت فما حبيتش أتكلم بقى في الموضوع ده يعني علشان ما أسببلهاش أي إحراج .
كلهم بصوا لملك اللي مصدومة ومش عارفة تدافع عن نفسها ، نادر بصلها بصدمة أكبر : بعد كل ده هو ده تفكيرك عننا ؟ بعد كل المصايب والأمور اللي مرينا بيها دي نظرتك لينا ؟
حركت راسها برفض : لا لا يا نادر أنا بس كنت مصدومة بتعب بابا وخايفة عليه و ...
قاطعها أبوها بعتاب : خوفك عليا خلاكي تنكري ان دول أخواتك وتنكري وقوفهم جنبك مرة بعد مرة ؟ وتحملهم لكل اللي اتعرضوله بسببك ؟ طيب ليه ؟
ما ردتش على أبوها وماعرفتش ترد أصلا ، هتقول ايه ؟ انها حست باهتمام نادر وحبت تستحوذ عليه ؟ ولا ان عجبها إحساس انها تكون ضحية ؟ ولا ممكن تقول ايه ؟
نور قاطعت صمتها ده بحدة : كنت فاكرة انك اتخطيتي حبك لكريم المرشدي، لحد امتى هتفضلي تحبيه ؟ امتى هتفوقي لنفسك ؟
ملك بصلتها بصدمة : انتي بتقولي ايه ؟ كريم ايه وحب ايه ؟
نور زعقت : حب ايه ؟ الحب اللي مش عارفة تخرجي منه ، امال ليه قلتيله اني اتجوزت أخوه ونادر اتجوز صاحبة أمل ؟ ليه قلتي ده ؟ ليه اشتكيتيله حبك القديم ؟
حركت راسها برفض : اسكتي يا نور لو سمحتي .
نادر رد بغضب: ليه تسكت يا ملك ؟ ما تجاوبيها ليه عملتي ده ؟ ليه حسستيه انك ضحية أخواتك ؟ كان مطلوب مننا ايه نعمله واتأخرنا فيه ؟ مش أنا قبل ما آخد أي خطوة ناحية مروة أو هي تاخد خطوة ناحية مؤمن انتي أكدتيلنا انه انتهى من حياتك ؟ دلوقتي بتلومينا ؟
زعقت هي كمان قصاده باستنكار : امتى لومتك ؟ كريم ما يعنيليش أي حاجة لا هو ولا مراته ولا أي حد .
بصلها بعدم تصديق: امال قلتي الكلام ده ليه ؟ ها؟
بصت قدامها بجمود : أنا تعبانة وعايزة أرتاح .
جت تتحرك بس مسك دراعها بغضب : ردي عليا، ليه قلتيله ان كريم كان خطيبك؟ ليه اتهمتينا بالاتهامات دي ؟
شدت دراعها وزعقت : حكتله عن حياتي بشكل عام مش اتهامات ، وبعدين لو ماما فايزة استنت شوية كانت سمعتني وأنا بقوله اني كنت الطرف السيئ في حكايتي ما تزعلش على صورتك ، قلتله اني شريرة الرواية ، مامتك ما سمعتش غير جزء صغير من كلامنا ، لأني أول ما حسيت انه بيلومكم قلتله الحكاية دي كنت أنا الطرف السيئ فيها مش انتم .
زعق برفض لكل كلامها : حتى لو قلتي ده ، مجرد تسميتك لكريم انه كان خطيبك واننا ارتبطنا وربطناكي بناس حواليه ده عملك ضحيتنا ، امتى كنتي ضحيتنا ؟ قلتيله انك كنتي هتوصليها للإعدام لما سكرتي ؟ ولا مارضيتيش تقولي انك كنتي سكيرة ؟
زعقت بصوتها كله بقهر : قلتله ، قلتله كل حاجة عني ، قلتله اني غبية ومتخلفة وسيئة ، قلتله عن اختياري لسليم الكلب - كانت بتعيط وبتتكلم فكملت بحزن - قلتله عن كل مصايبي ، وبالرغم من كل ده كان شايفني برضه إنسانة كويسة ، معرفش ليه ؟ بس نظرته ليا ما اتغيرتش ، كل ما بقوله عن أخطائي كل ما بحس انه بيهتم أكتر ، قلتله كل حاجة سيئة عملتها يمكن يبعد بس ما بعدش ، حتى بعد ما شاف ماما لما جتلي واتخانقت معايا في المستشفى برضه ما بعدش مع اني تخيلت انه هيحتقرني بعد ما يشوفها بس كان صدر حنين وما بعدش ، قلتله امنع عني الزيارة مش عايزة أشوف حد تاني قالي عيلتك بتحبك وأخواتك بيحبوكي ما تبعديهمش عنك ، عايز تعرف ايه تاني يا نادر ؟ تحب أسيبلك البيت وأمشي ؟
حاول يتكلم بس نور اتدخلت بجدية : خلاص يا نادر دلوقتي وكفاية بقى ، ده مش وقته أصلا - بصت لأختها اللي بتعيط- اطلعي يا ملك أوضتك ارتاحي ، تعالي يلا .
راقبوها ، ونور بتساعدها وبعد ما اختفوا خالد بص لابنه بأمر : بعد ما أختك ترتاح وتهدا عايزك تقعد معاها وتتكلم معاها وتفهم الحكاية كلها ، هي بتحبك وبترتاحلك وهتفتحلك قلبها ، اقعد معاها و ...
قاطعه نادر بغيظ : أنا يا بابا ؟ ما تحبش بالمرة أروح للدكتور نادر ده أفهم هو اتقمص منها ليه؟ وقاطعها ليه و أصالحهم ؟
فايزة ردت بعفوية : يا ريت .
بصلها بصدمة و مش عارف ينطق وهي وضحت بهدوء : لو فكرت شوية بعقلك دكتور نادر مش وحش - جه يعترض بس سكتته- أيوة مش وحش ، دكتور ومحترم وأخلاقه كويسة والأهم انه عرف حكايتها وبرضه متمسك بيها .
نادر علق باستنكار: بأمارة ايه ؟ انه بيهرب منها وبيبعت دكتور زميله يتابع الحالة ؟ هو بس اتعاطف معاها و ....
قاطعه أبوه بحنق: بطل افتراضات وافهم من أختك طبيعة علاقتهم ايه ؟ انت ونور أقرب مننا ليها وهتفتح قلبها ليكم بس انتوا حاولوا تعرفوا ايه اللي حصل ؟ يمكن يا ابني تكون دي فرصتها وده وقتها !
أخد نفس طويل ورد : ربنا يسهل أنا رايح الشركة مروة كلمتني من بدري .
انسحب وسابهم وهما الاتنين قعدوا مع بعض يتكلموا عن ملك ونادر .
