اقتباااااااااااس
خرجوا الاثنين وبيتحركوا بس مؤمن مسك دراعه : ابوك رفض .
بصله باستغراب واتكلم بتريقة : ياه تصدق مخدتش بالي ؟
مؤمن كرر تاني جملته : ابوك رفض يا كريم .
بصله بغيظ : يا ابني ما انا كنت متنيل وقاعد معاك جوه مالك بتقولي وكأني مغيب ؟
هنا هو وضح وهو بيتلفت حواليه : امال لما يعرف ان سيادتك كنت بتاخد رأيه من باب العلم بالشيء وانت اوردي اتصرفت هيعمل فيك ايه ؟ او هيعمل فينا ايه ؟
قبل ما كريم يرد اتفاجئوا الاثنين بحسن وراهم : عمل ايه ؟
الاتنين بصوله بصدمة ومحدش فيهم نطق ، مؤمن رجع خطوتين لورى ورفع ايديه باستسلام : اب وابنه ودي مسألة عائلية استأذن انا .
جري وساب كريم اللي شتمه وبعدها بص لأبوه : هنتكلم في البيت تكون دماغك رايقة مش هنا ، بعد اذنك يا بابا .
جري هو كمان من قدامه وحسن نادى عليه بغضب بس ما ردش وهيدخل مكتبه بس ابوه هيلحقه فجري عند امل اللي اتفاجئت بيه بيدخل : في ايه مالك ؟
بيبص حواليه : عايز استخبى .
فتحت بوقها مش مستوعبة وقبل ما تنطق لقت جوزها بيحرك الستارة بس شفافة مش هتخبيه وهي بتتفرج ومش فاهمة هو بيستخبى من مين اصلا ؟
كريم بصلها وبعدها سمع صوت ابوه بينادي وهي شهقت : بتستخبي من عمي ؟ عملت ايه ؟
زق كرسيها ودخل تحت المكتب : اوعي تنطقي حرف .
امل كانت هتضحك بس الباب اتفتح بعنف وحسن قدامها في قمة نرفزته وبلهجة اول مرة يكلمها بيها : جوزك فين يا امل ؟
ما قدرتش تنطق بس حركت راسها وهو كشر : لو شوفتيه بلغيني .
قفل الباب وهي متنحة بعدها رجعت بكرسيها لورى وبصت لجوزها وبهمس : عملت ايه ؟ انا اول مرة اشوفه كده .
اتنهد واتربع مكانه وسند على رجليها وبيتكلم : مجرد اني افتكرت لما ابوكي اخدك مني وكنت زي المجنون بس عايز اطمن عليكي .
امل زقت الكرسي وقعدت في الارض قصاده : بتتكلم عن ايه يا كريم انا مش فاهمة حاجة ؟ ايه اللي فكرك بده دلوقتي ؟
بصلها كتير وضمها لحضنه : مش متخيل ابدا انك ممكن تبعدي عني او حد ياخدك مني او ظروف تبعدنا عن بعض.
امل ضمته بحب : حبيبي محدش ابدا في الكون ده كله يقدر يبعدنا عن بعض .
بصلها وابتسم بحزن : ساعات بتحصل ظروف بتكون اقوى مننا وبتربطنا وبتبعدنا غصب عننا .
حركت راسها برفض : اتحدينا كل العواصف ومفيش اي عاصفة ممكن تكون اقوى من حبنا يا كريم ، دلوقتي فهمني عمي ماله وايه اللي جننه بالشكل ده ؟ وايه علاقة ده بحبنا ؟
اتنهد وحكالها وهي سمعته واتوقع منها تنفجر وتلومه بس هي ابتسمت : هو انا قولتلك قد ايه انا بحبك ؟
استغرب وهز دماغه فهي باسته : انا بعشقك فوق ما تتخيل ولو خطتك دي نجحت هكون اسعد واحدة في الدنيا .
ابتسم وهو مستغرب : طيب وبابا ؟
طمنته : عمي قلبه ابيض وطيوب هو بس اتنرفز انه عرف بالطريقة دي ، هنسلط عليه نونا وهي هتتعامل معاه .
ضمها بحب : انا كنت هعمل ايه بس من غيرك ؟
بعد مرة واحدة وكشر : فكريني اضرب الواطي اللي سابني وجري - بيقلده- قال ايه مشكلة بين اب وابنه ؟ اه يا واطي .
ضحكت بصوتها كله وهو من غيظه ضحك معاها كمان .
بقلم : الشيماء محمد أحمد
#شيموووو
