جانا الهوى (٢٧)
بقلم / الشيماء محمد أحمد
#شيموووو
آية قاعدة متوترة ومستنية سيف ينطق وأخيرا فك حزامه والتفت ناحيتها وايده على دريكسيون العربية بحزم: علاقتكم دي من امتى ؟
بلعت ريقها بتوتر : سيف اسمعني الأول أنا كنت عايزة أقولك بس ....
قاطعها وهو بيهز دماغه برفض انه يسمع أي مبررات هو مش عايزها دلوقتي فبص قدامه وكرر سؤاله بلهجة حازمة أكتر : سؤالي بيقول علاقتكم من امتى ؟ فما تلفيش وتدوري وتبرري لأني حاليا مش هسمع أي مبررات منك ، كان ممكن أسمع لو جيتي وحكيتيلي لكن دلوقتي خلاص ، نفض ايديه بغضب: خلص وقت السمع ، بح خلاص ، فسيادتك جاوبيني علاقتك بيه من امتى وبدأت ازاي ؟
سكتت فزعق بنفاد صبر : مش هكرر أسئلتي تاني يا آية
انتفضت وغمضت عينيها ودموعها نزلت : من ساعة ما سافرت ، اتقابلنا ومعرفش ازاي بس قربنا من بعض وحبينا بعض - بصتله بترجي يفهمها - حازم بيحبني يا سيف وأكتر حاجة كانت معذباه هو انه يخبي عليك وكان عايز يقولك .
بصلها بسخرية : وايه اللي منعه يقولي ؟ يمكن كنت احترمته ساعتها .
مسحت دموعها : خفت انك ترفض فطلبت منه يستنى وخصوصا خناقاتك مع بابا المستمرة وبعدها انت سيبت البيت وماكنتش عارفة ازاي ممكن نقولك وانت في الوضع ده ؟
ضيقه من نفسه زاد أكتر ؛ لأنه بالفعل أهمل كل عيلته وبيته والنتيجة كارثية بكل المقاييس .
كملت هي : كل شوية كنت بطلب منه يستنى الظروف تتحسن بس مش بتتحسن بالعكس بتسوء ، علاقتك اتحسنت ببابا بس ساءت مع ماما وبرضه خناقكم مستمر وأنا مش عارفة .....
قاطعها بزعيق : امتى جيتي تتكلمي معايا وما سمعتكيش ؟ امتى قعدتي معايا ومشيتك من عندي ؟ امتى ها؟ امتى كان الكلام معايا صعب للدرجة دي ؟ علشان تيجي في أهم حاجة في حياتك وتخبيها عني الوقت ده كله ؟
الصمت وبس اللي بينهم بعد سكوته ،
فجأة افتكر : يوم المطار - ضحك بتهكم- أنا لحد الآن مش مقتنع ازاي جيتوا في نفس اليوم وما اتقابلتوش ؟ انتو جيتوا مع بعض وعشان كده عملتوا القصة دي - استناها ترد بس هي ساكتة فزعق - ردي ؟ جيتوا مع بعض ؟
هزت دماغها بتأكيد وعياطها زاد : سيف حاول تقدر .....
قاطعها وهو بيخبط بايديه على الدريكسيون قدامه بذهول: أقدر ايه بالظبط ؟ ها ؟ أقدر انه معايا طول الوقت وماشي من ورايا مع أختي ؟ أقدر اني بأتمنه يدخل بيتي وشركتي وهو بيطعني بالشكل ده ؟ أقدر ان أختي اللي ثقتي فيها ماكانلهاش حدود خبت عليا وبتخدعني وبتستغفلني ؟ أقدر ايه بالظبط فهميني ؟ ايه اللي عايزاني أقدره علشان أقدره؟
حاولت تتكلم بخوف : قدر اننا بنحب بعض ولو خبينا فعلشان كنا مستنيين وقت مناسب نعرفك فيه مش أكتر .
ضحك بوجع : وقت مناسب ؟ الوقت المناسب يا آية كان قبل ما تقوليله بحبك - كررها تاني بأسف- كان قبل ما تقولي بحبك يا آية .
ليه بيفتكر همس وبيفكر فيها دلوقتي وفي علاقته بيها وبيفكر في أخوها ؟ هل ممكن في يوم نادر يقعد مع أخته ويلومها زي ما هو بيعمل دلوقتي في أخته ؟
ماقدرش ينطق كلمة زيادة لما وصل لتفكيره في همس وأخوها فدور عربيته ودخل بهدوء وهي نزلت أول ما وقف تجري لأوضتها وهو فضل قاعد مكانه مش عارف هيعمل ايه أو هيتعامل ازاي الأيام الجاية ؟
موبايله رن وشاف اسمها اللي قلبه بينبض أول ما بيشوفه بس للأسف ماقدرش يرد ، فضل باصص للاسم لحد ما اختفى واتنهد بوجع .
