السلام عليكم
حكمنا_الهوى
مش عارفة الكلام ده بيتكرر للمرة الكام بس حقيقي أنا اتضايقت والموضوع بقى مستفز جدا
اللي بيتابعوني شوفتوني كتبت العنيد بأجزائها هل لقيتوا الأحدث دينية؟ طب مرتبطة بالدين؟ لا
رواية عشقت متمردة ، مر العمر ، القدر ، لعنة الماضي ، وغيرهم هل شوفتوني ف مرة بتطرق في الدين أو بخلي الشخصيات بتتعامل بالتزام؟ برضه لا
رواية العاصفة فيها التزام ومبادئ ؟ ايوة فيها
هل انا قلت كل الروايات هتبقى على نفس النمط ؟ لا
أنا ككاتبة ملزمة أكتب حسب هوى كل واحد؟ لا طبعا ، انا بعرض فكرة وحبكة بصيغها حسب الرواية وبعرض أفكاري بطريقة مافيهاش خدش لحياء القارئ مثلا ! بس في نفس الوقت ماقلتش اني كاتبة دينية
انا اه بحب أحط نصايح ورسايل وسط الروايات بس ده مش معناه ان هعمل كل الأبطال مثاليين ما بيغلطوش
اه بنحط لمسات واقعية لكن في نفس الوقت لازم نراعي حبكة الاحداث ونحط لمسة رومانسية تخرجنا من الواقع الجامد اللي كلنا عايشين فيه .
الرواية أو أي رواية جاية هنفضل نقارنها بالعاصفة والأبطال المثاليين يبقى بلاها كتابة أساسا ونكتفي بالعاصفة افضلوا اقرأوها واستمتعوا بأبطالها المثاليين .
سبق ووضحت في جانا الهوى ان الرواية مختلفة عن العاصفة وبطبيعتي بنوع بين القصص بكل ما فيها فماينفعش واحنا واصلين للجزء التاني من الرواية حكمنا الهوى ولسه ف ناس بتعمل مقارنة وماسكين في حاجة معينة! أنا بحب المشاركة والتعليقات وبتقبل الآراء بس دي مقارنات سخيفة ! حتى أي موقف بيحصل للأبطال بلاقي ناس تقول احسن بسبب التجاوزات
كل رواية ليها حبكة وليها أبطالها وليهم أخطاؤهم ونزواتهم وحياتهم وما ينفعش أو احنا كبشر للأسف مش بنراعي الحلال والحرام في كل خطواتنا فبلاش نكون أو نكتب كومنتات وآراء عايزين ملايكة وناس مثالية مش موجودة في الواقع
اللي فينا مش بيغلط واللي فينا منزه عن الخطأ يجي يكلمنا ويقولنا أنا معصوم من الخطأ وبراعي ربنا في كل كبيرة وصغيرة في حياتي .
لازم ننوع ونراعي كل الفئات ونراعي كل البنات ونقدم كل النماذج الموجوده سواء الكويس أو الوحش .
واللي مش عاجبه ده يسألني في البداية أبطالك مثاليين زي كريم وأمل ولا ناس عاديين؟ وبناء على كدا يحدد هيقرأ ويستمتع ولا هيقرأ علشان يفضل يقارن بينهم ويقول ده غلط وده عمل معرفش ايه وده بيتعاقب وده نزل من نظري !
مش هتكلم تاني في الموضوع ده ياجماعة اللي مش حابب الرواية أنا مش بجبر حد يتابعها فرجاء بلاش كلام يعصب ، اللي حابب يستمتع بالرواية وعنده من النضج اللي يخليه يفصل بينها وبين العاصفة فهكون سعيدة أكيد واللي مش قادر يفصل بينهم ففي الحالة دي يخلي مقارنته لنفسه لاني مش هقبل بوستات من النوع ده لاني وضحت كتير
آسفة للإطالة
#شيمووووو
