عاصفة الهوى
الناس اللي بتتكلم وتسأل وزعلانة ونسيت الاحداث و و و و
تعالوا نتكلم بالعقل شوية وبالمنطق
الرواية اخر حلقة اتنشرت في شهر ٧ اللي فات وقتها كنت مسافرة عند جوزي وبالرغم من انها يدوب ٣ شهور بنسافرهم في السنه بس ضيعت نصهم علشان اكمل الروايه وخلصنا في نص ٧ تقريبا كملت الاجازة ونزلت مصر على بداية الدرس اللي هو في اول ١٠ كان المفروض اكمل رواية المعرض اللي هي كلمات الجزء الثاني والمعرض في آخر يناير وبالفعل كان صراع مع الزمن و صراع مع الدار لأني المفروض اسلمهم الروايه على الاقل قبل المعرض حتى بأسبوع يلحقوا يطبعوا وانا سلمتها قبل المعرض بيومين اللي هو كانوا بيشدوا في شعرهم حرفيا والمطبعه كل يوم بتسلمهم ٥٠ نسخة بالعافية يمشوا نفسهم وعلشان كده في ناس كانت بتروح المعرض ما تلاقيش الرواية والدار مشكورة كانت بتاخد عنوانهم وتليفوناتهم وتبعتلهم الرواية بدون تكلفة شحن ( توصيل مجاني )
فكده خلصنا شهر ٢ واحنا دلوقتي شهر ٤ هل متخيلين أخلص روايه ضخمة دامجة فيها روايتين من أكبر الروايات في شهرين ؟ سيبكم من الامتحانات والعيال واني لوحدي مسؤلة عن كل تفاصيل العيال بحكم سفر زوجي وبحكم اني في بلد بعيد عن اهلي وعيلتي لان زي ما انتو عارفين اني في القاهرة وعيلتي في الوادي فهو من كل النواحي
هل شهرين كفاية اخلص الروايه ؟ طيب الامتحانات ؟
طيب الدروس ؟ طيب التمرين ؟ طيب مين هيوصل العيال ؟ طيب مين هيعمل شغل البيت ؟ طيب مين هيذاكر معاهم ؟
طيب هنخلص الامتحانات اهو ادوني فرصة اكتب .
امتي هتنزلي الرواية ؟
علشان اكون صريحة مش قبل ما كل الامتحانات تخلص وخصوصا ثانوية عامة
كلنا عارفين عيالنا بتتمرقع وكلنا امهات ليل نهار ندعي على التليفونات واللي اخترعوها فهل متخلين انشر وقت امتحانات او قبلها ؟
وام تسأل بنتها بتعملي ايه تقولها منتظرة الحلقة شيمو هتنشرها ؟ متخيلين الام دي هتقول ايه ؟ فأنا مش هنشر قبل الامتحانات ما تنتهي تماما .
المهم الكتابة هواية مش ضغط عصبي ولا هم محتاج اعمله فعلشان اكتب حاجة كويسة لازم اكون نفسيا مستقرة ، ادوني فرصة واعذروني وقدروا ظروفي .
اول ما اعرف ميعاد للنشر هعلن عنه .
*الناس اللي بتطلع اشاعة الجزء الجديد ورقي بطلوا الاشاعة دي ، عاصفة الهوى هتنزل هنا في الجروب مش ورقي .
دمتم بخير وسعادة ودامت المحبة بينا وحاضر هنزلكم اقتباسات من عاصفة الهوى .
اه الروايات الورقية لطلب اي رواية تواصل معايا على الخاص الكومنتات صدقوني مش بشوفها الا صدفة او نادرا اصلا فاللي عايز اي رواية او حتي عايز يعرف سعر يبعتلي خاص وهرد عليه .
#شيمووووو
