زواج متقف

البارت 11

[ما تــخـرجــي... مــن قـلبــي ...الا و نــتــي... فـكـفــن]

◾البارت 11

دازو دقايق و نانسي بقوة الوقوف ݣلسات...فوق الكرسي دايرا رجل فوق رجل بحال القايد...و العيالات قدامها كل وحدة كاتشوف فلاخرى...كولشي ولاو زرقات بقاو  فيهم غير العينين بيضين خارجين...حتى صفقات نانسي بيديها و بداو كايفركو دغيا...لهفانين للنتيجة الزينة...اما نجلاء و فاتي دارو التشليلة اللخرة و مع النوضة لغاينوضو...بدا يتسمع نݣير العيالات..

•••:هاويلي افوزية... هادشي شد فيا شدة العما فالظلمة ما بغا يحيد...

العروس:(كتبكي و خناينها دايزين)واااا مّي هادشي ما بغا يتحيد...و اليوم يطلقني راجلي بالثلات و ما يبرد...

•••:و عوكعووووووك اعباد الله نصبو علينا و داو لينا رزقنا...

صواتهم كايزيد يطغى و يرتافع... و يتحول لغوات و هوما لحمهم بقوة الحكان غايطيرو جلدتو...و اللون الزرق تاع النيلة حلفات لا تحيد...نانسي تقادات فالݣلسة مللي شافت القضية بدات تسخن...و هي براسها مصدومة لا هي لا البنات لجاو لحداها...ما سحبو غا تعواج ليهم الأفير بهاد الشكل...و الخلطة طلع مغشوشة...

نجلاء:هاويلي يا خويتي اش سايرا نشوف...تي راه كولشي ولا زرق هنايا هاا ميمتي...

نانسي:(طوات يدين الجلابة و جبدات من حداها )ويلي ما يمكنش ا البنات ديرها بينا السيدة و هي تقة...

فاتي:ايييه ا خويتي ...كون منها الغلط...غايطلع معاها القالب هي اللولى...(سكتات شوية مخرجا عينيها فيها)ها ناري واقيلا نتي الصكعة للي كثرتي من النيلة و هي وصاتك م ا ت زي د ي..

ثقلات كلماتها اللخرين من الخوف بزز باش كملاتهم... و هي كاتشوف العيالات بداو كايقربو لجيهتهم...و كل وحدة منها جوج تشدك تعفط عليك عفطة وحدة نيشان للقبر...و عينيهم حمرين و باينة فيهم ما ناويينش على خير...و ما غايدوزوها ليهم بجغيمة لما...و هوما كايسحابو ضحكو عليهم...و خادو فلوسهم...نانسي شافت هادشي مغايوصلها فين و الفلوس لحطوها فهاد الخلطة غاتمشي هكاك... و هي تنوض نوضة وحدة كاتݣفض على جلابتها...و تهضر بشوية مع البنات...و دفعات السطل برجليها لعمرات حتى زاد تبلل الزليج بالصابون...

نانسي:غانشد ليكم بلاصة حدى الشوكة البنات...و المسامحة من دبا...

نجلاء:(كتقفقف بالخلعة) تي اش سايرا تقولي...

نانسي:(غوتات بصوت مرتافع و هي كاترجع باللور)هربووووو...

قالت كلمتها و طلقات رجليها للريح معاوداتش تلفتات...و نص فالعيالات تبعوها كايجريو و صوت غواتهم كايتسمع من بعيد...و كاين للي زلقات و طاحت على طولها...الشمتة نساتهم فالعرى لمعريين كيف ولداتهم مهم...و الخيورات كاطلع و تنزل معاهم...جاب الله النيلة غطات مفاتنهم...كايتجاراو تابعين نانسي لقطعات الشانطي ...و دخلات مع اول درب بان ليها...فم الناس تحلو مع العيالات...كاين لخافو يسحابو علامات الكبرى بانو...من شكلهم و لونهم تحلف عليهم الى جنون الزورق بانو...و كاين لطاح للرض كايتمرغ بالضحك...و كاين لهاز التيليفون يصور و يلوح...

••••نرجعو للحمام...

هيوا يا سيادنا غا مشات نانسي...خرجو البنات عينيهم تال لحد من هاد المصيبة لطاحو فيها...و صاحبتهم لهربات و خلاتهم و حالفين ما يخليوها فيها...و لكن  مللي شافو شوفات العيالات لبقاو و للي عارفين اش من وراهم مزيان كملات الباهية...شدات فاتي يد نجلاء و ناضت دغيا باش تهرب...المهم تنجى بعظيماتها  هي و صحبتها...و لكن غير بغات تزيد الخطوة اللولى و من الصابون البلدي لما ردات ليه البال...و جات مشبحة على الزليج ...

و شفتوها طاحت غير بوحدها؟نو غير طاحت و هي تجر معاها نجلاء...زعما بغات تشد فيها ساع جات مشبحة بطرمتها نيشان.. جا مع وجه فاتي للي خرجو عينيها...ولات تشم غير العنبر و عينيها حوالو...صبحات نجلاء طايحة على ظهرها و مطلعا رجليها الفوق و وجه فاتي مخشي تحت تغمة نجلاء...و معاها تطلق صوت نجلاء...

نجلاء:أااااااا الحفييييض اللله...

فاتي:تي نوضي عليا طرمتك من وجهي... يحرق اصل جد بوك خنقتيني...

نجلاء:هاو عتقي ا فاتي...البزيزيلة اخويتي عتقي...و رجليا وحلو الفوق...

فاتي:(نيفها مقابل مع مخرج العنبر نيشان)و تي جمعي عليا حزاقك...راك فرعتيلي نيفي...

نجلاء:و الميمة صبري نفك راسي...

فاتي:(بغات تحرك و مقدات و هي كاتحس بعضامها تهرسو)و ينعل جد حسي فهاد النهار...على للي يتبع ديك الكافرة بالله...