زواج متقف

البارت 61

الفـصـــل الثـاني:ما خــلف الأقــعنة🍷👄

[ما تــخـرجــي... مــن قـلبــي ...الا و نــتــي... فـكـفــن]

𝑩𝒚  𝑺𝒂 𝒓𝒊 𝒕𝒂

      ⚫𝑩 𝒂 𝒓 𝒕  61

ساريتا:[نطقات كاتبعكك و هي كاتعجن]غير حينت أنا مرت باك و كبر منك...غاندير راسي ما سمعتكش الحبيبة...و نتي صغيرة قد بنتي...

سميحة:[شافت فيها بنص عين]وجهك مقزدر أ بنت فضيلة...ما عرفت عين ولدي فين كانت حتى تزوج بيك...و ربط حياتو بيك...

ساريتا:[كاتعجن و تهضر ما مسوقا ليها]القلب هو كولشي...و حبيبي دراغون شاف شي حوايج مغاتعرفيهومش أ خالتي ...غا رتاحي و نعسي على جنب الراحة...

عيشة:[طلعات و نزلات فيها]هييوا ما نكدبوش أ ختي سميحة...البنت عندها لاطاي تاع عارضات الأزياء...عاطية العين و هي للي كاتعمر عين الرجال...

ساريتا:[عوجات فمها]ما بقاتش فلاطاي أ خالتي...بقات فالعقل للي يدوم..[قلبات عينيها لجيهة حسناء]إيوا أ حسناء الحبيبة...راكي كاترشي عليا الزيت كثر ما كاترشيه فالمقلى...ركزي فخدمتك دبا تشعلي فينا العافية..

سميحة دورات وجهها بالكامل لجيهة حسناء...لقات بالفعل بقوة الزربة كاتكب النص فالزيت حداها...

سميحة:يا السلݣوطة حماقيتي باغا تخوي الزيت فمرة...مخدمينك بالضو ولا شن

غا مع بدات كاتمشي لجيهتها...مرداتش البال للزيت المكبوب و عيون ساريتا تابعاها...حتى ما حسات برجلها إيمتا خوات بيها...ما لقات فين تشد توازنها و عمرها ما عاونهاش...و التزليقة خلاتها تخبط مع ساريتا...حتى تسمعات ضربة...
طلعو العيالات ريوسهم كايجريو و ريحة الحوت كاتعطعط...تحناو عاونو حسناء يشدو سميحة كايعاونوها تنوض...مردوش البال لساريتا للي بدات تفقد وعيها اثر الضربة للي جاتها فراسها من جنب البوطاجي...عاونو سميحة حتى وقفات وجهها صفر...عطاتها حسناء تشرب...و عاد ردات وحدة من العيالات البال لساريتا...بلا ما تحس قفزاتهم بغواتهم...

***:واااا قتلتيها ا خويتي قتلتيها...وا مشينا فيها عند دراغون اليوم ينحرنا...

ضورات سميحة راسها دغيا وراها و خرجات عينيها للحد مصدومة...و هي كاتشوف الدمايات نازلة مع بيجامتها...تحنات حسناء لمستوى ساريتا كاتفيقها...و هي كاضرب ضريبات خفاف على وجهها...و يديها كايترعدو...أما سميحة مللي طلعات معاها للي وقع ...و تفكرات ولدها شخصيتو كي دايرا و  شحال كايبغيها ...ضربات فخادها كاتولول...

سميحة:هاويلي يا ويلي أش درت...هاويلي إلى ساق دراغون الخبار غايقلب الدنيا بللي فيها...

عيشة:و صحايبتي ما تخلعيش دبا تولي بخير...اللفاع عندهم سبع رواح...

سميحة:الدم اختي الدم يبين العربون...[ضربات على صدرها و الخوف مالي عينيها]هاويلي عنداك تموت ليا البنت هنا و اشنو غاندير أنا...و ما درتهاش بلعاني...

حسناء:[نطقات مخلوعة و هي كاتشوف فساريتا]الميمة الدم كاينزل كثير...أشغاندير...

سميحة:[تحنات كاتحرك فساريتا للي طار منها اللون]ساريتا...وا ساريتا يا بنيتي نوضي من التبوحيط...ما تخلعيناش عليك...[حيدات الزيف من شعرها و دارتو فبلاصة الجرح يتحبس الدم]ويلي على البنت ولات صفرة كي الخرقومة اشغانديرو ..

عيشة:عيطو لدراغون أ ختي باغاها تموت هنا بين يديك توحل فيك...

حسناء:[بلعات ريقها خايفة من باها]و لكن بابا إلى عرف مغايدوزهاش لينا ...كاملين غايحملنا المسؤولية...

سميحة:[خنزرات فيها و هي جابدا التيليفون من الطابلية للي لابسا]سيري تݣاعدي يا الكلبة لهيه قالاك...باغاني نخبي على ولدي للي وقع...[دوزات الخط حاطاه على وذنها]بالحق الهضرة ماشي دبا تايجي هو للي يعرف ليك...كابا الزيت فالأرض و كاتحلي فمك...[صغرات عينيها]هاويلي مال ولدي ساد التيليفون ما موالفاش ليه...