الفـصـــل الثـاني:ما خــلف الأقــعنة🍷👄[ما تــخـرجــي... مــن قـلبــي ...الا و نــتــي... فـكـفــن]
𝑩𝒚 𝑺𝒂 𝒓𝒊 𝒕𝒂
⚫𝑩 𝒂 𝒓 𝒕 64
فاتي:ياربي حمدتك و شكرتك للي مزال صاحبتي عايشة...الحمد لله يا ربي للي البزناز ما رزاناش فيها...
ساريتا:[نترات منها ضايرة عندها...عاقدة غوباشتها]يا لحسك شلا باش تفايلتي عليا ...فمك كايقطر غا السم...[طلعاتها معاها بقرصة حتى قفزات]هادي هي يتوحشتك الكلبة و على سلامتك...
فاتي:و نسخا بيك انا..[جبدات ليها حناكها غا طير من الفرحة]يا الهبيلة غا ضاحكة يعطيك دقة..أجي نعنقك أجي..
جراتها كاتعنق فيها و تبوس مزيرا عليها و ساريتا مبادلاها العناق...فرحانة لشوفة صاحبتها..
ساريتا:[فصلات العناق ناطقة ببسمة حزينة]توحشتك الدحشة...نتي و نجلاء و كريمو...هما لاباس عليهم؟...
فاتي:كريمو راك عارفاه البلية هي البلية عمرو يتوب...[قلبات عينيها بعصبية]أما لالاهم نجلاء تقولي هزيتيها و حطيتي وحدة فبلاصتها ماتعرفيهاش من فعايلها...
ساريتا:[شيرات لطاكسي حتى وقف و ركبو...و هي عينيها كايضورو فالأرجاء خايفة دراغون يحصلها]علاه مالها تاني...اش دارت؟..
فاتي:تدار ليها ان شاء الله...خلينا منها و عاودي ليا هاد البلان على غفلة و بهاد الزربة معاجبنيش...[طلعات و نزلات فالجلابة للي لابسة]و مالك مخشية فهاد الخنشة...ناويا تجاهدي...
ساريتا:[رخفات الشال و هي مغمضة عينيها بتعب]ختي يرحم باباك ما طبخيش ليا راسي بالأسئلة...راسي ضارني ما تزيدنيش...
فاتي:واخا أ لالة هاني ساكتة...حتى نشوفو فين غانوصلو بهادشي ديالك[تلفتات ليها بغات تكمل الهضرة حتى خرجات عينيها من وجهها الصفر و الدم للي لاصق فعنقها]هاويلي حي مال عنقك عامر دم... أش دار ليك داك الكافر بالله...
ساريتا:[بصوت مبحوح]ماشي هو أ صاحبتي...غير حادثة صغيرة وقعات ليا و صاف...[كاتاكل فالليمون يرجع فيها الروح شويا]عطي الفلوس لمول الطاكسي و قولي ليه يزيد فالسرعة قبل ما يجي دراغون...
_ بعد دقائق طويلة كانو وصلو...خلصو مول التاكسي و نزلو...و فاتي شادا فساريتا للي متكية عليها...مغطية وجهها على الشمس...و شاردة فالفراغ كاتفكر فاللي جاي...معارفا لا واش التقاف غايتحيد ليها و لا غايبقا تابعها حتال اخر يوم فحياتها...
وقفو قدام نفس الدار للي جات ليها المرة اللولى دارت فيها التقاف...ضورات وجهها كاتشوف ففاتي...و من نظراتها و يديها للي كايترعدو باينا شحال خايفة لا ما يتحيد...و ضيع حياتها...و فاتي بحالا حسات بأشنو كاتفكر ...طبطبات على يديها مزيرا عليهم...ناطقة بتأكيد...فاتي:حبيبتي تهدني كولشي غايدوز مزيان...و التقاف غايتفك إن شاء الله...و غاتوصلي بكري قبل ما يجي البزناز...
ساريتا:[نطقات بحزن كبير]معنديش الوجه حتى نطلب ربي يسامحني على الغلطة للي درت...[خدات نفس عميق]ما علينا يالاه ندخلو...
دخلات و هي عازمة تحيد الربطة للي ربطات بيها حياتها...فهل الحظ غايوقف معاها و تحيدو؟...و لا فات الفوت و وضعات نهاية حياتها بيديها؟...
أنت تقرأ
زواج متقف
Romanceقصة أحداثها كادور فحي شعبي معروف فمدينة الدار بيضاء...غانعيشو بعض من احداثها فأخطر حي من أحياء الدار البيضاء ...و لهو حي مولاي رشيد...حاكمو بزناز فالخمسينيات...مجرم و تاجر فالمخدرات رتاكب جرائم كثيرة و دخل الحبس مرات عديدة ...حتى ولا معروف بين الحبا...