زواج متقف

البارت 67

الفـصـــل الثـاني:ما خــلف الأقــعنة🍷👄

[ما تــخـرجــي... مــن قـلبــي ...الا و نــتــي... فـكـفــن]

𝑩𝒚  𝑺𝒂 𝒓𝒊 𝒕𝒂

      ⚫𝑩 𝒂 𝒓 𝒕  67

   • الساعة 11:45

      فـــدار بـزنـــازنا 💀

كانت سميحة و حسناء فالصالون ݣالسين...بعد ما سالاو الشغال للي عليهم...و سيقو الكوزينة من الدم مع المرا للي كانت معاهم و مشات...حسناء كاتكونيكطا مع ماماها فالواتساب تسرسب ليها...و سميحة من الجهة لاخرى حاطا يد على حنكها كاتخمم فحالة ولدها و اشنو غايدير...و مرة مرة طلع عينيها للساعة و حر شوق قاتلها تشوف حفايدها للي تعطلو...
حتى نزلات عندهم المرا لي كانت الفوق حاضية ساريتا زعما...كاضور فعينيها و تكمش شي حاجة فيديها...و غير شافتها سميحة ناضت من بلاصتها و قلبها قفز من بلاصتو  ناطقة و هي مخلوعة...

سميحة:شفتك نزلتي...ياكما البنت تزاد عليها الحال أ ختي؟...

•••:لا أ صحايبتي...غا كي عارفا خاصني نمشي نوجد الغدا لراجلي قبل ما يجي من الخدمة و يبدا يخاصم...راك عارفاه...

سميحة:اييه أ خويتي غا سيري...عذبناك معانا اليوم غا سمحي لينا..[نغزات حسناء برجليها]تي نوضي حيدي داك المشقوف ينعل حسك و جيبي داك البلاطو للي محطوط تم...[تسناتها حتى جابتو ليها و عطاتو للمرا]هاكي أ خويتي هاد البراكة لوليدات و ما ترديهاش فوجهي...

•••:الله يطول فعمرك أ ختي...و دوزو بخير...

مشات المرا...و سميحة كاتمشي و تجي الخوف ما هناها...توقع البنت شي حاجا و ولدها يحملها المسؤولية...توجهات لناحية الدروج بغات طلع تشوفها...حتى سمعات صوت لوطو وقفات حدى الدار...قلبات طريقها للباب فرحانة لحفايدها...مشات حلاتو و حسناء من وراها هازا بلاطو فيه جوج كيسان الحليب و التمر...
نزلو الدراري من اللوطو مشاو نيشان عند جداتهم و ختهم يعنقو فيهم...و صوت الزغاريت سميحة مسموعة من بعيد...و دراغون بقا هو اللخر واقف وراهم...داير يديه فجيابو بملاميح عادية مظاهرش عليه الغضب...و عينيه الزرقا كايقلبو  فالداخل الدار على ساريتا...و لكن من بعد قلب نظراتو لجيهة اخرى بلا مبالاة...ظان أنها مخشية فالكوزينة...زفر بضيق و توجه لعند ولادو ناطق بسخرية و هو مخاطب مو...

دراغون:للي شاف هاد الترحيب كامل الواليدا[هز تمرة كاياكل فيها]و بهاد كيسان الحليب و التمر يقول جايين من الحج ماشي من الحبس...

سميحة:هاويلي يا وليدي ما منحقيش نفرح بيهم ولا...راهم حفايدي هادو...[جرها صلاح باس ليها راسها]هما عويناتي للي كانشوف بيهم..

دراغون:[شرب الحليب كامل خابط الكاس مع البلاطو حتى قفزات حسناء]زيدي ضسريهم بفشوشك أ الواليدا زيدي...و لكن بربي لا دوزتها ليهم المرة الجاية...

شاف فبنتو للي حانية عينيها للتحت و ترعد غير بوحدها...تخطاها و دخل للداخل مخنزر و تبعوه فتاح و صلاح ملتازمين الصمت بوجود باهم..و سميحة من وراهم تولول فخاطرها ما عارفا فين تحط الراس مللي يعرف...
و دراغون كايقلب بعينيه على أناكوندتو الصغيرة...دخل نيشان للكوزينة و طلع حاجب باستغراب مللي ما لقا حد فيها...ضار بغا يخرج حتى وقف للحظة حاني راسو للتحت...مللي لمح نقيطات تاع الدم فالأرض...حس بشي واقعا فالدار...فغيابو...دقات قلبو تزادو نبضاتهم من الخفقان...بدا يخطي خطواتو  متبع بنظراتو نقيطات تاع الدم...حتى حبس رجليه قدام الدروج...بلا ما يشعر حط يدو على قلبو للي تزير عليه...و عينيه منحاصرة فالدم للي راسم خط للفوق...الفوق لفيه بيتو هو و ساريتا...مراتو للي ما لمحهاش من أول ما جا...
طاحو فبالو أفكار سلبية كثيرة فبالو ...ل
أكثر من الايجابية...قاطعهم صلاح بسؤالو و هو  كايشوف فيه باستغراب...

صلاح:الواليد نتا بخير؟...

دراغون:[نطق ببحة رجولية قاصحة متجاهل كلامو]ساريتا...فين هي مراتي الواليدا...[دور وجهو لناحية سميحة للي بقوة الخلعة ݣلسات]

صلاح:[قال و هو مصدوم]تا إيمتا تزوجتي الواليد..كيفاش مراتك...