زواج متقف

البارت 32

بعد دقائق كان وقف اللوطو حدى الكلينيك...نزل دغيا مخلي الباب محلول و مشا حل الباب من الجيهة الاخرى...هز ساريتا بين يديه و دخل كايجري للداخل...و كايغوت على الأطباء لجاو كايجيرو لعندو مدام عرفو شكون هو...

الطبيب:تقدر تحطها ا سي دراغون فوق النقالة...ينقلوها للغرفة باش نفحصوها...

دراغون:(نطق بصوت خشن)غانحطها بيدي (رمقو بشوفات خايبين كايركبو الخوف)و يا ويل شي زا*مل نشم ريحتو حداها...سير جيب ليا طبيبة...(غوت عليه حتى قفزو)تق*وووووود شكاتسنا....

مشا الطبيب كايجري مزاد معاه الكلمة...خايف على روحو...اما دراغون مشا دخل ساريتا للغرفة حطها فوق الباياص...شاد ليها يدها بين يدو...و بلا ما يحس حطو فمو على راحة يدها طابع قبلة سخونة...و عيونو فيها نظرة مخالفة على لقبل...نظرة خوف من الفقدان...شكون لقال دراغون لكان ما كان خايف على حد من غير مو...و لا يخاف على بنت...و ماشي اي بنت بل هادي مراتو...و السبب بوحدو لعارفو...سبب مخليه للحد الآن كايوسع خاطرو معاها و يصبر لتصرفاتها...
بعد دقائق كانت داخلا طبيبة و معاها جوج فرمليات عينيهم غاياكلو الدراغون...

الطبيبة:سي دراغون تقدر تمشي تخرج ترتاح...و حنا مللي نساليو نعلموك باللي كاين...

دراغون:(تلفت لعندها مخنزر فيها)من هاد البلاصة ممحركش...دوزي ديري خدمتك و سكتينا...

تكا على الحيط مربع يديه و عينيه على ساريتا كايتسناها غير ايمتا تفيق...و تحل عينيها لديما مخرجاهم فيه...معجبوش الحال و هو كايشوفها بهاد الشكل...بهاد الضعف...تنهد مطولا قبل ما يخرج من الغرفة و يخلي الطبيبة تركز فخدمتها...
هز تيليفونو و دوز للخط لبنتو لفورا ما شافتو تاصل جاوباتو دغيا...

حسناء:ألو بابا...

دراغون:(دوز صباعو على لحيتو)حبيبة باباها...غايدوز عندك عويتق و عطيه شي بيجامة مع جلابة مستورة و زيفها...و داكشي لاخور تاع البنات(قصد دوبياس🙂)

حسناء:(نطقات بخجل و هي فاهمة قصدو)واخا بابا...غانوجدهم دبا...

دراغون:الواليدة حداك؟..

حسناء:لا...من صباح و هي فبيتها...

دراغون:طلي مرة مرة عليها...و شوفي واش خدات دواها ولا مزال...

حسناء:(كتشوف فجداتها لكاتغمزها)يعني مجايش للدار اليوم؟...

دراغون:(رفع حاجبو)كثرو الأسئلة اليوم...على اي ديري داكشي لقلت ليك...

قطع عليها و ضار دخل للغرفة...لقاهم عاد سالاو...نطق باستفسار و هو مخاطبهم...و عيونو متمركزة على ساريتا...

دراغون:(نطق بلهفة)كي دايرة حالتها؟...

الطبيبة:متخافش...حالتها مزيانة دبا...

دراغون:علاش فقدات الوعي؟...

الطبيبة:طبيعي تفقد الوعي و هي ما واكلا والو...زائد البرد لخدات...

دراغون:(طرطق عنقو منيرڤي)واخا و البرودة باقا فيها لدبا؟

الطبيبة:حاليا عطيناها برا غاتعدل درجة حرارة جسمها...و لكن ضروري تبقا تاخود شي حاجة سخونة ...تعاون فحالتها تزيد تحسن...

دراغون حرك راسو ليها بشكر...و تاجه لعند مراتو وقف حدى راسها...كايدوز يدو على شعرها بحنان...و عيونو فيهم بريق مميز و غريب...تحنا شوية طابع قبلة على جبينها و أنفاسو السخونة كاضرب فوجهها...ݣلس على الكرسي لبجنب الباياص...ماسك يديها و ساهي فملاميحها كايحفضهم فذاكرتو...