زواج متقف

bart 117

الفـصـــل الثـاني:ما خــلف الأقــعنة🩸🫦
               ___________________
                       𝑩𝒚  𝑺𝒂 𝒓𝒊 𝒕𝒂

      ⚫𝑩 𝒂 𝒓 𝒕  117

ساريتا:[نطقات بصدق]تيقيني إلى قلت ليك باقا فكرة الهروب متشبة بيها...[حطات يدها على قلبها]عندي إحساس بلي غاتوقع شي حاجة...كانحس براسي مرتاحة نسبيا مع دراغون...كانحس بلي فأي لحظة و بشي تصرف ما هواش غايدفني و أنا حية...

فاتي:[شداتها البكية على حالة صاحبتها] وليتي خايفة منو؟...

ساريتا:[بتاسمات باستهزاء]الخوف لي فيا دبا عمرو كان ملي كنت عايشة مع واليديا...

فاتي:[بمواساة]فرأيي ما تحكميش عليه دغيا و تخافي منو...كون بغا يقتلك يديرها النهار اللول فاش جيتي تال عندو و لكن هو تفهمك بعمرو...و حطك فصورة بنتو...

ساريتا:[رمشات ببطئ ساهية فالفراغ]نتي ما عارفا والو...معارفاش بلي دراغون بحال شي بير غارق كلما زعمتي عليه كثر و كثر غايكون الموت اخيرتك...هو غامض و لدبا باقي غامض فتصرفاتو...

فاتي:أ نعلي الشيطان و جمعي راسك قالاك غامض...بالسيف ما يكون هكاك[بنبرة حاقدة ملي تفكرات نجلاء]لو تشوفي البنات كي يدورو براجلك بحجة الخدمة يضرك خاطرك...

ساريتا:ك..كيفاش[خرجات عينيها معصبة]شكون هادي هاا؟...فاتي قوليلي نيشان أش واقع؟..

فاتي:[قررات تقول ليها لي عرفات و ترتاح]لي واقع هو واحد بنت القا•ف كاضور براجلك و هادشي شفتو بعيني و تخيلي بلي هي نج..

قبل ما تسنط لهضرتها كاملة قطعات الخط دغيا ملي سمعات صوت الخطاوي جايين...دغيا مسحات نمرة فاتي و حطات التيليفون فبلاصتو...

🔙🔙🔙

دوشات دغيا و لوات عليها فوطة...تقابلات مع المراية و بأعين حمرا ناطقة بشر...

ساريتا:شكون ما تكون هاد الكلب•ة لي تجرئات تقرب من أرغد..غاندمها على النهار لي فكرات تلمس حاجتي...غير حتى نعرف الباقي من عند فاتي و ديك الساع غانوريها...لا هي و لا هاد طليقتو ما غانخليهم مرتاحات و هما كايحومو حدى راجلي...

             مــــــكــــان آخـــــــــــــر

كانت نجلاء غادا بخطى سريعة..يد هازا بيها صاكها و يد هازا بيها داك الصندوق لفيه أغراض ساريتا...كاتقلب بعينيها كاتشوف قريبة توصل للبنك هازا التيليفون حاطاه على وذنها كاتهضر...و نظرة شر مكشوفة من عيونها...واخا مريضة و مقادراش تمشى عادي و لكن إصرارها تنهي حياة ساريتا هو الأهم...

نجلاء:من عيونك يا حبيبي راح سوي لك شو بتطلب...بس كم مليون بحسابي يا نور عيون القمر...

•••:15 مليون يا حلوة...إنتي طليبي و شرطي على راحتك و كيلشي راح يوصلك كاش...

بغات تهضر معاه حتى قرنات حواجبها محيدا التيليفون مقابلاه معاها و هي كاتشوف ذاك المشعوذ كايصوني ليها...دغيا زربات على الڤيكتيم ديالها و قطعات عليه مدوزا الخط للمشعوذ...

نجلاء:أمدرا كولشي واجد...

المشعوذ:[بشر]كولشي محطوط قدامي بقا غير حوايج البنت لي باغا تسحري ليها و الفلوس يكونو كاش...

نجلاء:[بنظرة حاقدة كاتشوف فالصندوق]ما طلبتي غا الموجود...لقيتيني واقفا حدى البانكا نهز الفلوس لي وصلوني و ندوز لعندك...

قطعات الخط و دخلات للبنك تسحب الفلوس لي وصلوها...دقائق و كانت خارجا هازا صاك صغير فيه الملايين و ضحكة مرسومة على وجهها بفرحة...لي غاترتاح من ساريتا...
وقفات حدى الشانطي كاتنسا فشي طاكسي يوصلها غافلة على عيون من بعيد كايراقبوها...رفعات راسها الفوق ملي لمحات طاكسي واقف فالجنب الاخور...قطعات دغيا باش تركب فيه بوحدها ..حتى و قبل ما تهضر مع مول الطاكسي حسات بيد تحطات على الصاك لفيه الفلوس...قبل ما تدور تستاوعب لي واقع كان صاحب الموطور لي داير الكاسط طير ليها الصاك و كسيرا بسرعة كبيرة...ما خلاها فين تبعو حتى بعد عاد بدات تسرى معاها موسعا عينيها بخوف...

نجلاء:ال..الصاك...[بعدم تصديق]الفلوس طارو...ما يمكنش...م..ما يمكنش يوقع ليا هاكا...[غوتات بحر جهدها كاتشير لجيهة لي مشا منها الشفار]و عباااد الله عتقووووني...عتقووووني الشفار مشاااا و دااا ليا رزقييييي....