زواج متقف

البارت 50

حسناء:(كاتمسح دموعها)بابا أ ماما...بابا للي عمرو رفع عليا صوتو...صدمني فيه اليوم...

الطليقة 3:(نطقات بالغوات)و نوضي يا الحمارة جمعي عليا خناينك...و تحزمي كي ليلياتك...لا تلقاي راسك برا الدار...بسباب ديك اللفعة...

حسناء:(تنهدات بحيرة)نساي عليا مللي نصبات عليا فديك الخلطة...راه البنت كاتبان ضريفة و متبثة...

الطليقة 3:علاه يا المكلخة لاخرى ماشي هادشي للي دارت لباك ...حتى تلوات عليه و ولات تبان ليه غا هي...(كاتزيد تشعل العافية)أ شوفي ا بنت كرشي...ما تنسايش مللي غوت عليك بسبابها هي...الله و علم من هنا لسيمانة شغادير...بيني على شطارتك راكي قدها و قدود...

حسناء:(نطقات بحزم)واخا أ ماما...كانواعدك مغانخلي حتى حد ياخود بلاصتك فهاد الدار...

الطليقة 3:(بخبث قالت)الله يرضي عليك ا بنتي...و علميني بأي جديد...و نخليك دبا راجلي غايجي دبا...

حسناء:(نطقات بلهفة كاتبري فعيونها)عفاك ا ماما ندوز عندك أ غدا؟...توحشتك و توحشت خوتي...

الطليقة 3:هاويلي على تجي...باغا يتجبد ليا صداع تاني بحال ديك النهار بسبابك..ريحي قالاك...مزيان تبارك الله...

قطعات فوجهها بسرعة...و خلات حسناء كابحة دموعها فعينيها...و الحزن طاغي على ملاميحها...بقا فيها الحال على كل مرة فاش كاطلب من مها تشوفها...و تشوف تا خوتها لكاتشوفهم مرة و لا جوج فالعام...و ماماها كاترفض على قبل مصلاحتها و زواجها ما يتخربش...ما عمرها صونات عليها ماماها و طمئنات عليها بل فكل مرة كانت هي للي كاتاصل و طمائن...
تنهدات بغصة واحلا ليها...و هي كاتشوف راسها وحيدة تا حد ما مسوق ليها...لا الحنان لقاتو فوالديها و لا الاهتمام ...

خرجات من بيتها مللي سمعات صوت اللوطو وقفات حدى الباب...بخوف من باها لا يدور فيها دخلات دغيا الكوزينة...لقات جداتها واقفا على الماكلة تسخن فيها...و شاردا كاتفكر...

حسناء:جدة؟..

سميحة:(ضارت لعندها مخرجاها من سهوتها)هااا نعام ابنتي ..

حسناء:(نزلات حواجبها باستغراب)مالك؟...بنتي ليا ماشي تالهيه...الى كنتي عيانة اري نكمل للي فيديك...و سيري للطابلة...

سميحة:لا ابنتي انا بخير...غير سيري قادي الطبلة قبل ما يدخل باك...

حسناء:(رفعات حاجب)و هاديك العروسة الجديدة للفوق محنية مقادراش تنزل...ولا كاتسنا نطلعو ليها العشا...

سميحة:(خنزرات فيها)تجمعي شويا...شفت داك اللسان طوال عندك...باغيا يوقع شي صداع بين و بين باك بسبابها...

حسناء:شفتك وليتي تدافعي عليها ا جدة...صافي كلات ليك حتى نتي العقل...

سميحة:أ سمعي ا حفيدتي نقوليك...هاد السوق خرجي منو نتي...داكشي بين ولدي و مراتو...ما ليك دخل فيه...و نحصلك خرجتي هاد الحوايج لهاديك مك...مغانفكك من يدين باك و نتي عارفاه....

حسناء:(بتوتر مخفي)ماشي حتال ديك الدرجة أ جدة...احم بابا جا انا غانمشي نقاد الطبلة..

مشات سلتات دغيا تقاد الطبلة و خلات سميحة حاطا يدها على حنكها...و كادعي ما تكون قالت حسناء شي حاجة لمها...