زواج متقف

البارت 43

جرها من خصرها حتى تضاربات فيه...مخلي رعشة سرات فذاتها...رمقها بنظرات سلبو كيانها...و هي مبادلاه ابتسامة نصر...

دراغون:درتي عقلك...و لكن بقا اللسان طويل و ماضي...

ساريتا:(نطقات بهمس) حينت ببساطة لساني قال الحق و ما نافق...

دراغون صغر فيها عيونو ...بغا يدوي و كانت عيونو طاحت على شي حمورية فجبين ساريتا و منفوخة...خلاه يحط صبعو على الضربة بشوية بلا ما يوجعها ...حتى قفزات من صبعو البارد لتحط...

دراغون:فين كنتي غادا زربانة؟(رمقها بتخنزيرة حارة)يا ويل و نلقاك كنتي ناويا تهربي...

ساريتا:(رفعات حاجبها ليه)كون كانت نيتي نهرب..كون درتها فكل فرصة كاتجيني اراجلي العزيز...

دراغون:(بنبرة باردة)اذن اش مخرج ملتك للبرا؟...

ساريتا:(قلبات عينيها للجيهة الثانية)مادام لقيتيني ما هربتش...ما كايهمش الباقي...

دراغون:(زير على خصرها حتى تأوهات)سؤالي ماغانعاودوش جوج مرات ...

ساريتا:(نطقات بصوت هامس)احم عادي الى خرجت نسول على راجلي العزيز فين معطل برا...

دراغون:(كايحرك صباعو على خصرها ببطئ حتى حس برجفتها)تشوشتي عليا؟..

ساريتا حركات راسها بأه...ناطقة بصوت مستفز...

ساريتا:نخاف توقع ليك شي حاجة و نصبح ما أنا مزوجة ولا مطلقة...

دراغون:(نطق بنظرة قاصحة ليها و هو ضاغط على خصرها اكثر من اللول)فحالة غاتوقع...مغانمشيش بوحدي و نخليك من ورايا...مكاين للي يفارقك على دراغون...

يالاه بدا يقرب راسو لجيهتها و هو يحس بنفسو كاتقطع...بحالا شي حد قاجو...نفس الشعور زارو عاوتاني...خلاه يرخا منها دغيا منيرڤي مخليها فحيرة من أمرو...و يتاجه نيشان للحمام بلا ما يدور...قبل ما تستاوعب اشنو وقع قفزات من الخبطة لخبط للباب...
نزلات حواجبها باستغراب من حالتو...بغات تمشي تشوف حالتو و لكن رفعات كتافها بللا مبالاة...و تاجهات للباياص تكا...

••بعد 10 دقائق فالداخل...

كان كايغسل فوجهو و يعاود...حتى حس براسو مزيان شويا...و هز الفوطة كاينشف وجهو للي معليه حتى تعبير...كايتصرف ببرود غير طبيعي...يمكن هدوء قبل عاصفة...اولا تعود على هاد الحال...سالا و فتح الباب...مشات عينو نيشان لساريتا و هي مخشية فالباياص غارقة فالنعاس لداها دغيا...شاف فيها بنظرات باردة و تاجه نيشان للفوطوي لتماك...بلا ما يعير اهتمام ليها...و نعس فوقو عاطيها بالظهر...

             
         • •  أصبحنا و أصبح الملك لله • •

             فحــــــي مـــولاي رشــــيد

توقفات لوطو كحلة كاتبري امام دار دراغون...خلا للي عندها شي تقبة خشات منها العين و للي عندها كرسي هزاتو و دخلات...نزل من اللوطو دراغون بحوايج مغايرين...لابس قميجة فالرمادي مطلع كمايمها للفوق...و حال جوج صدايف فوقانيين كيف عادتو بارز الوشم لفعنقو و السنسلة الذهبية...مع سروال فالأسود دجين سليم و سبرديلة فالرمادي و الكحل...
قلب ادراجو للجهة الاخرى...فتح الباب و مد يدو الكبيرة للداخل حتى تحطات فيها يد صغيرة...أصابعها مزينة بخاتم الزواج...تحطات رجل فالارض كاتبان غا بليغة فالبيض...و ضهرات ساريتا خارجة من اللوطو...بجلابة عصرية فالزرق...طالقا شعرها على طول...و وجهها ما فيه نقطة ماكياج...