راجس

170

زياد مسح وجهه بارهاق .. التحقيق انتهى متأخر .. الاثنين اعترفوا نهم المسؤولين عن عمليات النقل والا هو نفس السيناريو اللي جولان قاله انو حيصير

غمض عيونه يتذكر كلمات جولان
- مستحيل يقولو اسماء الناس اللي فوقهم .. كل الا سويته دحين هو انك رجعتنا ورى بدل ما ننهي المهمة ..

بس هو اصلا عمره ما دخل بمهمة بذا الحجم .. هو يحقق في قضايا صغير تضم اشخاص او مجرمين منفردين .. مو كيانات وعصابات ! .. يمكن كان الافضل يسمع كلام انس .. بس

فتح عيونه يطالع باب الفيلا .. هو يحتاج يعرف ايش وصل عامر لطلال .. ايوة جزء منه كان يبغى يخرب كل شي على انس وجولان عشان يقدر يفهم علاقة عامر بطلال قبل ما يعرض حبيبه للخطر !

سحب شنطته قبل ما يطلع من سيارته

طالع بالساعة والوقت متأخر جدا وأكيد طلال نايم .. اخر رسالة من طلال له كانت من ساعتين يقوله ينتبه على نفسه ..

دخل البيت بهدوء عشان لا يصحي احد وتحرك يطلع الدرج

بس لفته النور من غرفة المكتب فتحرك لهناك .. يمكن سياف بيشتغل على شي مستعجل ..

بس عقد حواجبه لما شاف جابر جالس هناك على المكتب .. جنبه كوب حليب بالكركم .. تقدر تعرف انو بالكركم من لونه الاصفر .. ذي احد الامور اللي طلال تعلمها من ابوه من سنين ودحين زياد عرف ليش دايما طلال يشربه قبل النوم !

دق الباب بشويش وجابر رفع راسه وطالع في زياد باستغراب قبل ما يلف وجهه يطالع الساعة ويتأكد من الوقت بعدها يرجع يطالع زياد
- الوقت متأخر

زياد دخل جسمه ناحيت المكتب بس لا يزال واقف عند الباب
- اتأخرت بالشغل شوي .. ليش صاحي للان عمي ؟

جابر أشر على الالبوم المفتوح قدامه
- فجأة جاني حنين للصور القديمة

زياد دخل المكتب اكثر وترك شنطته فوق الكرسي الثاني ووقف يطالع في الصور .. كانت صور لطلال وسياف وهما صغار .. الاثنين واقفين فوق حجر كبير وحولهم بيئة مليانة اشجار .. لابسين شورتات بيجية وطلال لابس تيشرت اسود وقبعة صيد فوق راسه تغطي شعره بينما سياف كان لابس تيشرت احمر وواضح انو ضيع القبعة من شعره المقربع

بس زياد لما طالع بالصورة شاف شخص ثالث وراهم بيمشي ناحستهم وهو ماسك قبعة سياف وبيده ويبتسم

أشر زياد على الشخص اللي مو مرة واضح
- ذا انت ؟

جابر طالع بالصورة قبل ما يهز راسه بلأ ..
- ذا واحد من اصحابي ..

طالع زياد في ملامح ذاك الشخص اللي مو واضحة .. شكله شوي مألوف بس مو عارف فين شافه ..

جابر اشر على صورة ثانية
- ذي كانت اخر اجازة مع امهم الله يرحمها