رازي قفل الموية ورفع وجهه يطالع في المرايا .. طالع بملامحه في المرايا ..
اخذ نفس عميق قبل ما يطلع من الحمام ويشوف نواف واقف يكتب بالجوال
ابتسم وتركه وتحرك لبرة الغرفة وشاف راشد ينزل من الدرج وهو لابس ثوبه .. حلو يعني اليوم اخيرا راشد بيروح الدوام
ألتفت ناحيت غرفة راشد وشاف الباب مفتوح بشكل بسيط وواضح من الظلام والمكيف انو شادي نايم بعمق
لف بيرجع غرفته بس عيونه طاحت على غرفة ابوهم .. اللي فضوها لأنس الجاحد اللي ما جلس فيها غير ليلة وما كملها !
قلب عيونه بانزعاج وهو يجلس فوق السرير ويطالع حوله .. ابوه غير الغرفة بعد ما امه طلبت الطلاق .. غير مكان السرير والدولاب والتسريحة .. للان يتذكر لما رجع من المدرسة وشافه واقف معرق وهو يطالع بالغرفة ويلهث لانو جلس يحركهم لحاله
ابتسم وهو يتخيل ابوه واقف قدامه يطالع الغرفة .. لو ظل هنا وشاف انس أكيد بيتجنن من سعادته .. كان دايما يقول تمنيت اكون ابو البنات بس صرت ابو العيال !
وقف رازي بيطلع من الغرفة ومر من جنب التسريحة ووقف .. ألتفت ناحيتها وهو يتذكر .. في مخبئ صغير وراها .. صح ؟
تحرك ورجع يطالع الغرفة من الباب .. لو يتذكر .. قبل ما امه تطلب الطلاق .. التسريحة ما كانت هنا .. كان مكتب ابوه هنا بعدين نقله لغرفة ثانية ( غرفة راجس حاليا ) .. بس قبلها .. مكتبه كان هنا .. وبطرف مكتبه كان المخبئ ذاك
تخيل نفسه جالس فوق المكتب وهو ياكل الحلاوة المصاص في فمه وابوه يرتب الاوراق
بعدها يحطها جوة فايل شفايف ويطويها .. بعدها حطها بداخل علبة خشب .. علبة اخذها من جدتهم زمان .. اي احد يشوفها بيحسب بداخلها خردة
بعدها انحنى ودف المكتب على قدام شوي .. على الجدر في بلاط مسوي ايطار على كل الجدران بالغرفة .. وحدة منهم ابوه حركها ودف العلبة بداخلها .. بعدها وقف وطالع في رازي وضحك وهو يقرب ويحط يده قدام فمه
- ذا المكان سر
رازي ضحك وهو يطلع الحلاوة من فمه
- بنخبي فيه كنز ؟!
ضحك رواد وهو يمسح على راس رازي
- يب .. بحط فيه كنز ما ينفع احد يشوفه .. لا راشد ولا ماما ..
رازي ميل راسه وعيونه تتوسع بسعادة انو ذا سرهم الخاص
- ولا حتى راجس ؟!
ابوه سكت لحظات قبل ما يهز راسه
- ولا راجس .. ذا بيني انا وانت وبس .. طيب ؟
رازي هز راسه بالقوة وهو متحمس وراود مسك يد رازي بعدها
- يلا نروح نجيب ايس كريم ؟
رازي نط من فوق المكتب وهو ماسك يد ابوه
- لنا احنا بس ؟!
رواد ضحك
- لا .. الايس كريم لنا كلنا بس السر بيبقى حقنا ! .. اووووص
رازي غطى فمه بيده وهو يضحك ويقلد ابوه
- اوووووص
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
