راجس

176

رغم قرب المكان للطريق السريع الى انه كان ظلام .. انوار الشارع ما توصله .. الصحراء قدامك من كل ناحية واصوات السيارات وراك ..

لما قرر راشد يشتري سيارته كجيب هو تأكد انو يقدر يدخل البر فيها .. يقدر يدخل الرمل ويطلع بيها بوسط الكثبان .. عكس رازي وراجس .. هو مو رجل بحر .. هو يحب هدوء الصحراء اكثر .. يحب برودتها في الليل .. ريحة الحطب وهو ينحرق وطعم كوب الشاهي لما يسويه على الجمر

بس اليوم هو مو بمزاج يشب النار حتى .. كان موقف سيارته ويطالع الفراغ قدامه ..

كلمات راجس في عقله تردد .. هو خبى عليهم شي يخص وفاة ابوهم .. ابوهم هما مو ابوه هو .. لانو ولد شخص ثاني .. شخص عمره ما اعطاه اهتمام او حاول يقرب منه حتى ..

لو ما كان عادل يدري كان عذره .. بس عادل قرر ياخذ راجس ويتركه .. رغم انو راشد ولده ..

غمض عيونه ومسح وجهه .. ما حيسمح لذي الافكار تدخل عقله .. هو اخوهم الكبير .. راجس هو اخوه الصغير العاق اللي عاش بدلع فما يعرف يتكلم .. يب هذا هو راجس .. هو ما كان يقصد اي شي .. ولا شي ..

فتح راشد عيونه بهدوء .. حتى لو ما كان يقصده .. وجع كلماته كان عميق ..

حط راشد يده على صدره .. يحس بالفراغ هناك .. هو ما حس كذا لما ابوهم مات .. ولا لما ماتت امهم .. ولا حتى جدتهم .. هو حس بذا الفراغ من كلمات اخوه اللي ظل سنين يحاول يكسبه لصفهم ..

حس بجواله يهتز فسحبه وطالع بالاسم .. شادي .. ابتسم بهدوء .. حتى شادي قد اذاه .. هو رفضه عشان يحميه زمان .. عشانه يعرف انو شخص منحل .. انو شادي يستاهل شخص نظيف .. شخص يحبه من كل قلبه ..

يمكن راشد ما يعرف يحمي .. لانو مو معقولة كل مرة يقرر يسوي شي عشان يحمي بيها الناس اللي يحبها .. يخسرها ..

سمع دق على القزاز وبسبب الظلام برة توقعه عسكري عشانه موقف بعيد ومطفي الانوار

فتح القفل تبع البتب ورخا القزاز بس الباب انفتح من برة وفي شخص سحبه ناحيته يحضنه

راشد ظل لحظات قبل ما يستوعب انو بحضن شادي !

رفع رسه يتأكد قبل ما يفز ويخرج من السيارة ومسك شادي يسنده لانو مستحيل يكون واقف بالعصايا بذا الرمل وكيف وصل لهنا و ..

راشد رفع جسم شادي وهو يتلفت بس سيارة شادي مو هنا .. في اثر على التراب ..  اثر مشي !

هو طالع في شادي وتقريبا نسي كل شي وتكلم
- عندك مصباح علاء الدين ؟!

شادي ما قدر يمسك نفسه وبدأ يضحك بينما راشد كان يتكلم بكل جدية بس ما قدر ما يبتسم وهو يشوف ضحكة شادي

شادي مسك وجه راشد وباس شفايفه بوسة سطحية قبل ما يبعد ويطالع في عيون راشد وهو يمسح بأبهامه على خد راشد
- بطرد راجس من البيت