راجس

132

طاح راس سلطان بشويش من فوق طرف الكنب ففتح عيونه برنعاج وهو يحك عيونه وبدأ يحس بألم رقبته الخفيف بسبب نومته وهو جالس

ثتاوب وهو يشوف المكان حوله شبه مظلم ومافي الا نور خفيف جاي من ورى الستارة العازلة على الناحية الثانية

نزل عيونه وشاف البطانية فوقه فبعدها عنه وهو يوقف ويمدد يدينه ولساته يتثاوب مع كل حركة

مسح عيونه وتحرك ناحيت الطاقة يرفع الستارة بحكم انه ما يعرف اماكن مفاتيح الانوار هنا

رفع الستارة وبانت الغرفة اكثر .. التلفزيون مقفل .. الكنبة فاضية معادا من البطانية الا كانت فوقه والمخدات الا كانت تحت جسمه واللي اعطت جسمه نومة مريحة بدل ما يقوم متكسر بنسبة ألفين من مية

طالع حوله بالغرفة .. من امس لاحظ انو مافي اي ايطار صور هنا .. سهل تعرف انها شقة ايجار بسبب ذا الشي ..

تحرك بشويش وهو يتكلم بصوت عالي
- انس ؟ .. انس

بس صوته كان يتردد في الشقة وواضح انها فاضية .. وكأن انس كان مجرد وهم هو تخيله فقط

تنهد ورجع المجلس يدور جواله .. مسكه وحاول يفتحه بس ما رضي يشتغل .. تذكر ان جواله طفى امس وما طلب من انس شاحن لما وصلوا .. عقله ما كان يفكر بأي شي فنسي يطلب شاحن

رفع عيونه يطالع الشقة .. هو لحاله .. عيب يفتش الغرف بس هو يبغى شاحن عشان يكلم انس عشان ما يبغى يخرج من الشقة بدون ما يعطيه خبر بس بنفس الوقت لما يقدر يعطيه خبر بدون شاحن !

وقف وتحرك بشويش ناحيت الباب الاول وهو ينادي للان
- انس ؟ .. انسسس

دق الباب قبل ما يحاول يفتح الباب وانفتح الباب على غرفة مختلفة تماما عن الصالة .. جدرانها بلون غامق عكس الصالة والممرات .. فيها شوية بوسترات معلقة على الجدارن .. بعضها لأفلام قديمة وبعضها لدزني لاند .. تحرك ناحيت الجدار اللي فيه صور وطالع فيهم .. اغلبها فيها كذا طفل او طفل واحد مع اشخاص مختلفين

قلب عيونه بين الصور قبل ما يدقق في ملامح الطفل .. يحس انو يعرفه بس ما يعرف مين هو بنفس الوقت .. مهو انس .. ملامحه مو ملامح انس .. هو شخص ثاني

كمل يطالع الصور إلين وصل لصورة فيها ٣ اطفال .. بنت صغيرة بنفستان احمر عليه ورود ووراها ولدين صغار ببدل .. نفس الطفل اللي بباقي الصور وهو لافف يدينه حولين البنت الصغيرة ومبتسم بينما الطفل الثاني يطالع شي ورى الكاميرا بعيون باردة .. بدون اي ابتسامة .. بدون اي احساس ..

سلطان طالع بعيون الطفل .. ذا هو انس .. بنفس وقفته .. نفس بروده .. ونفس الملامح .. عادي يكون الشخص بريئ اكثر وهو طفل .. بس انس .. انس هو نسخة نفسه حتى بطفولته

بعد عن الجدار وطالع في الغرفة .. يشك انها غرفة انس .. لانو كل الا فيها ينطق بأسم شخص غيره