جولان طالع بالمواقف .. مافي سيارات كثير عشان الوقت .. بس لوكيشن انس وسيارة عامر بالناحية الثانية من جدة ! .. مو معقولة المرسول ما يسلم الفلوس اليوم ! .. المبلغ كبير .. عامر يكره انو الامور ما تكون تحت سيطرته عشان كذا دايما يسوي كل شي بنفسه
رجع رفع الجهاز
- اخوان عامر .. في احد منهم قد استلم الفلوس من قبل ؟
انس عقد حواجبه لنظرية جولان وضغط على سماعته يرد
-هو الوحيد اللي ابوه معتمد عليه بكل الاستلامات .. الباقين سبق وانسحبوا من سالفة من سنين .. هما اجبن من انهم يتمسكو بعملية تهريب للفلوس
جولان سحب الجهاز
- المرة اللي اخذك فيها .. هو راح قدامك للمخزن استلم الفلوس ورجع عشان يوريك هيا ويعطيك دليل واضح على المبلغ اللي لازم تتصرف فيه صح ؟ .. ( بلل شفايفه بتوتر ) .. بنفس الفترة اللي كانت فيها زياراتك لهنا محدودة ؟
انس غمض عيونه .. كلام جولان بيودي لنظرية وحدة .. عامر كان بيحاول يثير اعجاب انس عشان كذا اخذه ووراه انو ساطي وما يخاف ولا ينتبه .. بينما هو في الحقيقة شخص حريص .. بس شخصية عامر اصلا متهورة .. او يمكن هو يبغى الناس تعتقد انو شخصيته كذا !
زياد سحب الجهاز لما انتبه للشخص اللي خرج من الكافيه وركب السيارة
- في شخص جديد ! .. اللي بيسوق الان .. شخص مختلف !
جولان رفع المنظار يطالع وشاف السواق مختلف .. كم عدد المناديب اللي عامر بيرسلهم ؟
زياد ظل يطالع وينقل التحركات لأنس
- السواق فتح الشنطة .. الفلوس مقسمة في شنطتي زي ما استلمها .. في شخصين دحين .. واحد اخذ وحدة والثاني اخذ شنطة ثانية .. الشنطتين يشبهوا بعض فما بتقدر نميز ايت شنطة الفلوس وايت شنطة البضاعة !
جولان ضرب الدركسون
- بالعربي احنا ممكن نتبع شخص ويطلع غلط !
زياد تكلم بسرعة
- بخبر الدعم ! .. بعطيهم لوحات السيارات واوصافها .. لو ما قدرنا نلاحقهم فعلى الاقل بنوقفهم ذي المرة !
انس تكلم
- لأ ! .. لو وقفتهم ما بنقدر نثبت انو عامر متورط !
زياد عقد حواجبه
- أولويتي دحين مو عامر ! .. اولويتي انو محد يتضرر من ذي البضاعة وانو الفلوس اصلا ما توصل !
انس كشر .. عشان كذا يكره انو يشتغل مع شخص جديد ! .. هدف المهمة هو اثبات التهمة على عامر بس ضمير زياد اللي شغال اكثر من اللازم حيعيق تحقيق الهدف ذا !
زاد انس سرعته لما شاف عامر بيزيد سرعته ورفع عيونه يطالع الاشارة و .. الاشارة صفرا .. حتصير حمرا قبل ما يوصلها عامر بذي السرعة ولا بيعرف يوقف !
لحظات وتجاوز الاشارة وساهر صوره .. انس اضطر يوقف .. لو قطعها وراه بيوضح انو يطارده .. بس هو فهم .. عامر يبغى دليل انو ماله شغل .. انو بعيد وانو كان يسوق بشكل طايح في طريق الملك بالوقت اللي البضاعة فيه بتتقسم ويصير التبادل ..
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
